Esekiɛl 13 - BII BILA

Le vanaa-tɛɛngaa-diom Hala-a lacòòvaa

¹ Mí Mɛlɛka soaa o ya lo, mó dimul-la aa:

² «Po vanacieo sei, yondal vanaa-tɛɛngaa-diom Hala-a Israɛlaa co diom Hala-o tɛɛnguuo-a, mà dimul vanaa co diom Hala-o tɛɛnguuo o vunduma nda pila-an nin-nda aa: ‹La yaŋ nilan o sɔɛi Mɛlɛka-e.

³ Ɲɛ Maalii Hala dimi-o co hoo ni aa: Dɛnɛ palaa co le vanaa-tɛɛngaa-diom Hala-a pe lebol te-a, a co delɔɔ yiyannda ndalan kɔɔli hali mà ci ɲɛ-ɲɛ le-a.

⁴ Kpòkóó Israɛl taanin! Mɛɛ kàá co o cɛila piɔlɛilan nin yɛ, lende vanaa-tɛɛngaa-diom Hala-a nɔmnda co ni.

⁵ Niaa vanaa tɛɛngaa-diom Hala-a, la hel le tɛɛngon kiindiaa le, la tengul kpaki le cuavaa Israɛlla kandaa haliko ma nɔla simndan le cɔwvo o paale Mɛlɛka len coo le.

⁶ A co vunduma lacòòvan cɔu a yoongula palaa n'vanndan tɛɛnguuo, nda kpede a co dimio aa: ‹Diom Mɛlɛka soo-o co hoo ni›. Nduyɛ Mɛlɛka vim nda le. A co vannda tiindanndo yɔngoo maa sɔɔn nda dimi-on peelunnin.

⁷ Vɛ̀ɛ̀ o co vunduma fondoan te niaa co cɔ kon te? Vɛ̀ɛ̀ o co sɔɔn lacòòvan te niaa co dimio hoo maa n co hunɔɔ tosan te? La co dimio aa sɔɛi Mɛlɛka dimi-e co hee ni. Nduyɛ ya Mɛlɛka, i suu le.

⁸ Le hee, la tuei-yɔ ɲɛ ya Maalii, o co Mɛlɛka-o dimi-o: Le tùú sɔɛi niɛi co sɔɛi fondoei-yo, le tùú vunduma niaan ma co còòlan-ndo, ya pila i cɛn le niaa cɔlɔbaa. Ya Maalii, ya co Mɛlɛka-o soo nuaa ni.

⁹ Ba nuu tisanin vanaa-tɛɛngaa-diom Hala-a co vunduma lacòòvan tɛɛnguuo a sɔɔn lacòòvan dimio-a coo cili. A venin o cuungian vanaa niaa coo le, diola ndalan la sɛvannin o diola cuavaa Israɛlla coo le, a tiiyanin o lɛŋnde Israɛl-ten nin di le. O kon niaa sinanin ni maa ya co Maalii ni, Mɛlɛka pɛɛn.

¹⁰ Kani a co vanaa nia laasiaa, hali telen kɔlɲulu co loo, a co vanaa nia dimullo aa kɔlɲuloo co. A co a kɔlkɛndɔɔ o kpaki vanaa nia cɔwvo nin. Tofa vɔ, a co ndu yikpaa.

¹¹ Lelan dimul vanaa co kan kpakio yikpaa-a maa kpaki kon hun kombanin! Piɔɔ bɛndu-bɛndoo sianin. I tuisinin loeon delian mì hoeyii fùkù-fùkùei pesipesi ndu kpede.

¹² La tuei-yɔ, te kpakio komba pɛ, a ɲunanin niaa aa: Ɔ́ɔ̀ niko ɲɛ niáà yikpa ndu-o?

¹³ Ɲɛ Maalii Hala dimi-o co hoo ni aa: «I tuisinin hoeyii fùkù-fùkùei o kɔl ni tuwvo nin. O kɔl ni fulaa nin, i tuisinin piɔɔ bɛndu-bɛndoo, mì loeon deli a kɔltuwvo le ɲɛ-ɲɛ yoomaa ciiyo diwvo kpede.

¹⁴ I pesipesinin kpaki niaa yikpa-o, mò komba lɛŋ vuluvulu. Fonda o kilan coo-o fulanin ceen. Kpaki kon kombanin mì niaa vi o bémbélan bɛngu. O kon niaa sinanin ni maa ya co Mɛlɛka ni.

¹⁵ Kɔltuw nuu coŋnin o kpakio coo, mò hulun vanaa yikpa ndu-a coo. O kon i dimulnin niaa aa: ‹Kpakio co lɛ le. Vanaa va ndu yikpaa-a, o pilɛ bɛɛ co lɛ le.

¹⁶ Vanaa-tɛɛngaa-diom Hala-a Israɛlla, a va diom Hala-o tɛɛnguuo a Yerusalɛm o kɔɔ-a, a va vunduan cɔu o ndu coo, mà va ndu dimullo aa kɔlɲuloo co, hali mi kɔlɲulu ve bɛɛ le-a, o pilɛ bɛɛ co lɛ le!› Sɔɛi fula Maalii Hala o sondo-e co ken ni.

Le vanlaandua tɛɛngaa-diom-Hala-a lacòòvaa

¹⁷ Nɔm Po vanacieo sei, muli hɔlla o vanlaandua yungu nɔmndo lo, vanlaandua co diom Hala-o tɛɛnguuo a yiyan nda pilaa-a pɛɛn. Tɛɛngul nda diom Hala-o.

¹⁸ Dimul nda maa nuaa Maalii Hala dimi ni aa: «Dɛnɛ palaa co le vanlaandua co kolala n'pɛngɛlan sɔndɔɔ le bala kpeŋndan kpow, a kolala vaan-vaanndan tosaa le vannda kpow, mɛɛ nda co yɛ-a. A co kon tosaa le yoomula vannda ciiyo! Vɛ̀ɛ̀ lende niaa ciinin yoomula vanaa nia, mì la mɛi la niaa pila lan la kɛndɛ ni?

¹⁹ La co ya bɛ̀ɛ̀lan ciiyo vanaa nia o hɔl le ɔrse baa ca a le bulula bingilan, mì la va yoomula vanaa bɛnda le piɔ́m sɔla le-a ciiyo, mì la va vanaa bɛnda le piɔ́mndo sɔlaa-a mɛiyo yoomu. La co vanaa nia còòlan dimullo, mì nda va còòla lan biyɔɔ.

²⁰ Lelan sɔɛi fula Maalii Hala o sondo-e co hee ni aa: «I bii kolala n'pɛngɛla niaalan tɛɛ, kolala niaa co yoomula vannda biyɔɔ nin maa n'yow lan. I sɛɛsiaanin ndan niaa o lacongú, mì mal yoomula vanaa niáà bii maa n'yow lan.

²¹ I sɛɛsiaanin vɛlɛ kolala vaan-vaannda niaalan, mì hɛlu yungu nuu niaa o ba. A ve lɛnin maa leyaŋɔɔ niaa o laba le, o kon niaa sinanin ni maa ya co Mɛlɛka ni.

²² Kani la co vana sandaa yoomuan solio a còòlan, nduyɛ, ya pila, i tɛɛmbuu nda kɔl te. La co vana kɔlvesɛiyo yoomuan lueiyo yɔŋii o mal kɔlvesɛi kon, mò ciindiaa yoomu ndɔɔ.

²³ La ci lɛnin vunduma lacòòvama man te. La dimi lɛnin sɔɔn co hunɔɔ yɔŋnɔn-ndon te, i baŋanin yungu nuu niaa o ba. O kon niaa sinanin ni maa ya co Mɛlɛka ni.