Esekiɛl 11 - BII BILA

Yamɛi kilulunnin simlacia Israɛlla-e

¹ Mí kɔl Hala-o cua ya, mó kɔa a ya o dio Cɛi-Mɛlɛka-o sondoo, dio co a ba paalen le can-ndo-o, o muli hɔlla a kpengii paalen le can-ndo-o pɛɛn. Tofa vɔ, vanpiaandua bidiin a à ŋuɛɛnu a va o dio kon sondoo, mí ca Yaasania po Asur-o nda Pelatia po Benaya-o, a va simlacia vannda-a o vanaa kan tɛɛn.

² Mí Mɛlɛka dimul-la aa: «Po vanacieo sei, vannda ha co tuula yɔŋ vɔɔnndan a silala vɔɔnndan yɔngoo o kobio ho nin ni.

³ Nuaa nda co dimio ni aa: ‹N co keleŋa lacɛi tangul te. Kobio ho, kpɛɛnɛi o co ni, naa n co lenin nda vision naa n co ni.›

⁴ Lelan, tɛɛngul nda diom fula Hala o sondo-o, tɛɛngul nda ndu, nɔm Po vanacieo.»

⁵ O kon, mí kɔl Mɛlɛka-o toal-la coo, mó dimul-la aa: «Dimi aa nuaa Mɛlɛka soo ni aa: ‹I tuei sɔɔn niaa co dimio-on, niaa cuavaa Israɛlla pɛɛn. I sina ɲɛ co o yiyannda niaalan nin-ndo.

⁶ La lo vannda diwvo o kobio ho nin tei mí nɛila kobi kalaa la pia a vanvílɛ́iya.

⁷ Lelan la tuei-yɔ mɛɛ Maalii, o co Mɛlɛka-o soo yɛ, o dimi aa: Vanaa niaa niaa diw mí la mɛli nda o kobio ho nin-nda, nda co vision ni. Kobi kalaa yɛ niko, ndu co kpɛɛnɛi ni. Kɛ niaa, a co niaa soli lenin.

⁸ Siòònde co niaa a mɔɛi cɔwve, kɛ i co niaa cɔwvo tuisi coo. Ya Maalii, ya co Mɛlɛka-o soo nuaa ni.

⁹ I solinin niaa o kobio ho nin, i malnin niaa mialla o ba, lende ya kilulnin niaa yamɛi nii ni.

¹⁰ I mɛlinin niaa o mɔɛi cɔwve bɛngu, i kialunin yamɛi niɛi o pɛɛngula lɛŋnde Israɛl-ten. O kon, la sinanin maa ya co Mɛlɛka ni.

¹¹ Kobio ho venin ikpɛɛnɛ le niaa le, kɛ niaa la vanin vision lenin. O pɛɛngula lɛŋnde Israɛl-ten ya kialunin yamɛi niɛi ni.

¹² La sinanin o kon maa ya co Mɛlɛka ni, kani la kela o silala nilan coo le, la bii tɔŋnda nilan te, kɛ mí la tosa dɛnndan mɛɛ kelala vanaa-mangalaa-isɔaa balu niaa-a co yɛ.»

¹³ O kon, telen ya va diom Mɛlɛka kon tɛɛnguuo-o, mí Pelatia po Benaya-o vu. Le hee, mí (ya Esekiɛl) del lɛŋ o kuumbuan o kɔl coo, mí koŋul coocoo kpélén aa: «Éé Maalii Hala! Vɛ̀ɛ̀ a yeema ma cii Israɛlaa tɔ̀a lo yoomu-a diw?»

Kpemala Mɛlɛka yiilul vanaa kɔɛ o biyɔɔ nin-nda lan

¹⁴ Mí Mɛlɛka soaa o ya lo, mó dimul-la aa:

¹⁵ «Po vanacieo sei, puapilɛa nɔmnda, ndepilɛa nɔmnda, vanaa co vanayan nɔmndon nda, cuavaa Israɛlla kpow pɛɛn, nda co vanaa co icali Yerusalɛm nda dimullo ni aa: ‹La lo Mɛlɛka levil lende polon dɛ! Kani naa lɛŋnden nden le yɔngun le len loovo ni.

¹⁶ Lelan dimul nda aa nuaa Maalii Hala dimi i aa: i sɛŋi nda nɛɛ levil o vanaa-mangalaa-isɔɔa tɛɛn, i sɛŋi nda o lɛŋii bɔɔ-bɔɔ nin, kɛ i siŋnunnin telen pum Cɛi-Diandaa le nda o lɛŋii nda kɔɛ nin-nde nin.›

¹⁷ Le hee, dimul nda aa nuaa Maalii Hala dimi ni aa: ‹I faŋanin niaa nɛɛ nia co vanaa súúla celen nda tɛɛn-nda, mì cuungiaa niaa. I solinin niaa o lɛŋii niaa co a saŋnannda nin-nde nin, mì mɔɔsiaa niaa, mì yɔngu niaa lɛŋnde Israɛl-ten.

¹⁸ Lon niaa hunnin ni, mì la faaŋiaa ɲɛm nɔɔlɛiyon kpow a dɛnnda laasiɛilan kpede.

¹⁹ I yɔngunin niaa kɔl pilɔɔ. I vownin yiyan sɛnɛiyo nia nin. I solinin kɔl co niaa nin o kala kpoke maa pow-vo, mì yɔngu niaa kɔl n'diallo,

²⁰ haliko mi la kela o silala nilan coo, mì la bii tɔŋnda nilan, mì la kela lecoo. O kon la vanin vanaa nia, mì ya i va Hala niaa.

²¹ Kɛ le vanaa kɔlta ndalan la hɛnan dɛnnda nɔɔlɛilan a sɔɔn laasianndon tosaa-a, i tuisinin nda kɔmnde dɛnnda ndalan o lebol. Ya Maalii, ya co Mɛlɛka-o soo nuaa ni.»

Biilu Hala-o faŋan Yerusalɛm

²² O kon mí mɛlɛkaa kanda ɲɛm Hala-on-nda a pɛɛnga kumbannda ndalan. Bɛngula tiilannda ndalan la va a nda latulu, biilu Hala Israɛlla va coocoo nda coo.

²³ Mí biilu Mɛlɛka-o can coocoo o kobio tɛɛn, mó kɔ cal o pembii co kobi kon a ba paalen le can-ndo-e coo.

²⁴ Mí kɔl Mɛlɛka-o cua ya, mó yaa ya o vanaa co o biyɔɔ nin-nda lo. Mí vundule ya va len cɔu len le faŋan ya, mí le lo ya o hɔl.

²⁵ O kon, mí dimul vanaa co o biyɔɔ nin-nda sɔɔn Mɛlɛka cɔm ya mun-ndon kpede.