Esekiɛl 1 - BII BILA

Mɛlɛka cɔmnun Esekiɛl

¹ O vɔsi beleyàándɔɔ nin, paangii hiɔɔlundɔɛi va malɔ leŋuɛɛnu, i va vanaa ndáà kɔɛ o biyɔɔ nin-nda tɛɛn o peo Kebar kɔngɔ, mí halataalaa kumbin, mí Hala cɔm ya dɛnɔɔ pum o vundulen nin.

² O paale ŋuɛɛnundɔlen coo o paangii ken nin, vɔsi ŋuɛɛnundɔɔ va kon, o biyɔɔ nda bii masaa Yoyakin má kɔa a ndu-o ni,

³ mí sɔɛi Mɛlɛka-e dimulun ya Esekiɛl, po Busi va vana-solia-lasálàá o lɛŋnde Babilɔnnda nin, o peo Kebar kɔngɔ-o, lon ba Mɛlɛka-o tol-la coo ni.

⁴ I va tofaa, mí ca hoeyii fùkù-fùkùei cɔnɔnndo a ba luaŋ-ndo, mí yumbuyumbu bɛndu-bɛndoo a yinnden le va hunɔɔ ndi laci, mí ɲɛ-tengaa balu tengaa pindo. Ɲɔɔ va piɔndio lenin o siaŋa mɛɛ tɛ́ngɛtɛ́ngɛla leyinndan la piɔndi nuaa yɛ, o va piɔndio o yinnden tɛɛn.

⁵ Ɲaa yoomaa pum va lenin nda hiɔɔlu maa n'vanndaciee.

⁶ O kɛ́-kɛ̀ ndóò nɔ hɔlla a hiɔɔlu, o kɛ́-kɛ̀ ndóò nɔ vɛlɛ kumbanndan tan hiɔɔlu.

⁷ Pelun ndan va n'sandaa sanaa-sanaa, bɛngula ndala kɔltan la va maa buukula naw téndé, la va volio ŋɛlɛngi-ŋɛlɛngi maa daɲɛi kpɔlɔkaa.

⁸ Ndáà nɔ balan maa bala vanaciee o kumbannda va nda o kpengun hiɔɔlon-ndan bɛngu. Ɲaa yoomaa hiɔɔlua kan kpow, ndáà nɔ hɔlla a kumbanndan.

⁹ Kumbannda ndala lan la va laciiŋianndan vellaa-velle, ndáà mùlin o kɔlan te, kɛ o kɛ́-kɛ̀ va kɔlan ndu pila laci sakpo.

¹⁰ Hɔlaa ndaa va maa hɔlaa vanaciee, nda hiɔɔlu kpow ndáà nɔ hɔlla o ba kɛndɔɔ coo maa hɔlaa yàlà, hɔlla va nda o ba mɛllo coo maa hɔlaa naw, nda hiɔɔlu kpow ndáà nɔ hɔlla maa hɔlaa kovɛ.

¹¹ Hɔlaa ndaa a kumbannda ndalan la va lasɛyanndan a lecoo. Nda hiɔɔlu kpow, o kɛ́-kɛ̀ ndóò nɔ kumbanndan latiɔn labaalanndan, latiɔnndan lapilɛlan la va le dialun ndan kumbɔɔ.

¹² O kɛ́-kɛ̀ va kɔlan nɛɛ hɔlaa ndɔa va a mulia-a sakpo. Nɛɛ hoeiye va kɔlan-nda nda bɛɛ va kɔlan ni, kɛ a ve mulin o kɔlan te.

¹³ Vanáà ca ko ɲaa yoomaa kan aa dɛngulta biyaala sɔngɔɲɔnndan ni, vanáà ca nda ko aa tɛngɛla leyinndan ni. Yinnde len le va hiŋnɔnndo nda tɛɛn, le va pangeloo tiwvo kpede, le va volio ŋuanndi-ŋuanndi.

¹⁴ Ɲaa yoomaa kan va kɔlan a hunɔɔ a kiltan maa mɛɛ taŋnden le keleŋa nuaa yɛ.

¹⁵ I va ɲaa yoomaa kan tofaa, mí ca ɲɔɔ maa bɛngu ɲɛ ɲaanan lɛŋ ndon nda ikɛi, o hɔlaa ndaa hiɔɔlua laci.

¹⁶ Hɔlaa bɛngula ɲɛ ɲaanannda lan a mɛɛ la toosian yɛ, vanáà ca ko lan deŋio aa a pow krisolite ndáà toosiaa lan ni. Mɛɛ láà va yɛ a mɛɛ láà toosian yɛ, tan hiɔɔlu kpede láà velan taw. Vanáà ca ko aa bɛngu ɲɛ ɲaanan oo bɛngu ɲɛ ɲaanan va o luɛyaa o bɛngu ɲɛ ɲaananndo pilɔɔ nin.

¹⁷ Bɛngula ɲɛla ɲaanannda lan láà va pɛ kɔlan, láà kɔɛ o kpengun ndan hiɔɔlon coo sanaa, kɛ la ve hiŋnɔn o kɔlan te.

¹⁸ Ciliŋun tiilaŋun bɛngula ɲɛla ɲaanannda lan láà va coo-on, mun bandu mí mun vueinun o tofaa taw, ciliŋun tiilaŋun bɛngula ɲɛla ɲaanannda hiɔɔlula lan kpow n va n'piaa cá a hɔltan nɛɛ-nɛɛ ka.

¹⁹ Te ɲaa yoomaa kan ndáà va pɛ kɔlan, bɛngula ɲɛla ɲaanannda lan bɛɛ láà kɔɛ nda ikɛi, te ndáà cɛn pɛ coocoo mì ndáà faŋan lɛŋ, bɛngula lan bɛɛ láà cɛn coocoo.

²⁰ Nɛɛ hoeiye va hɔlla mulio-a nda bɛɛ va kɔlan ni, kpengii hoeiye va kɔlan nde pɛɛn. Bɛngula ɲɛla ɲaananndan la va cɔnɔnndo a nda latulu, kani yiyannda ɲaa yoomaa kan la va o bɛngula ɲɛla ɲaanannda lan nin ni.

²¹ Lelan te ndáà va pɛ kɔlan, bɛngula ɲɛla ɲaanannda lan bɛɛ láà kɔɛ. Te ndáà sim pɛ, lan bɛɛ láà sim. Te ndáà cɛn pɛ coocoo, lan bɛɛ láà cɛn a nda latulu, kani yiyannda ɲaa yoomaa kan la va o bɛngula ɲɛla ɲaanannda lan nin.

²² O bolii ɲaa yoomaa kan coo, ɲɔɔ va maa halataala, o va ŋɛlɛngi-ŋɛlɛngi maa mɛmma n'kpungba, o va nda o bolle coo o kɔannan tɛ́ngɛ̀-tɛ́ngɛ̀.

²³ O ɲɛ tɛ́ngɛ̀-tɛ́ngɛ̀ kon bɛngu, kumbannda ɲaa yoomaa kan la va lapɛɛngaalan sakpo, o kɛ́-kɛ̀ va o pilɔɔ laci sanaa. Ɲɛ yoomaa oo ɲɛ yoomaa ndóò nɔ kumbanndan latiɔn le ndu pila kuumbɔnndo, ɲɛ yoomaa oo ɲɛ yoomaa ndóò nɔ latiɔn le dialun ndɔn kumbɔɔ.

²⁴ Te ndáà va pɛ kɔlan, yáà tuei kumbannda ndalan diom maa mɛɛ mɛmma bɛndu-bɛnduan ma và kuŋndo nuaa yɛ, maa mɛɛ diom Vana-Kpaayaa-Kpow co yɛ. Vanáà tuɛi ko ɲɔɔ sɔɛi ivɔkɔ-vɔkɔɛi aa bɔɔluu vanaa cɔwva ni. Te ndáà sim pɛ, ndáà liima kumbannda ndalan.

²⁵ Diomndo va vɛlɛ fulaa o ɲɛ tɛ́ngɛ̀-tɛ́ngɛ̀ va kon nda o bollen coo maa halataala-o nin. Te ndáà sim pɛ, ndáà liima kumbannda ndalan.

²⁶ O ɲɛ tɛngɛ̀-tɛngɛ̀ va kon nda o bolle coo-o lekɔɔli, ɲɔɔ pum va lon velanndo a pow safir, vanáà ca ko ndu aa kpɛŋɛ lemasaa ni, ɲɔɔ pum va maa vanaciee o ɲɛ va kon maa kpɛŋɛ lemasaa-o coo.

²⁷ Mí ca vɛlɛ ɲɔɔ maa leyin, ɲɛlan la va piɔndio lon maa latɛ́ngɛ́-tɛ́ngɛ́. Ɲɛ va kon maa leyin-ndo va tengaa lon sɔ́, kandɔɔ o càŋaa ɲɛ va kon maa vanaciee-o háá lecoo, kandɔɔ vɛlɛ o càŋaa ndɔa háá lebɛngu, mí ca ɲɔɔ maa leyin a pangeloo ndu balɔɔ pindo.

²⁸ Mɛɛ ninginangaa fula o yumbuyumboo coo a paale piɔɔlen nuaa yɛ, lende ɲɛ-tengaa ndóò kilan yɛwve ndu balɔɔ sɔ́-o va ni. Biilu Mɛlɛka-o ndóò cɔmnun kon lende kpendekele ni. Mɛɛ ya ce ɲɛ kon, mí del lɛŋ, mí kuumbuu hɔlla lɛŋ. O kon, mí tuɛi diom vanacieo sɔɛi o ya lo.