Esai 9 - BII BILA

¹ «Vanaa va kelaa o ɲumndan nin-nda ce ɲɛ-tengaa bɛndoo. Pangeloo tenga vanaa va icali o lɛŋnde vunduma piɔ́mnden nin-nda coo.

² Òó Mɛlɛka, a vangala vannda ha ma kui taw, a yɔngu nda kɔlkɛndɔɔ taw-taw. A co ɲaaloo dɔwnɔnndo nɔm o hɔl mɛɛ vana dɔawnun ɲaale telen koavaa n'mallo yɛ, mɛɛ vana yonda a kɔlkɛndɔɔ o ɲɛm nda hɛlu yaamɔɔa o ba o cɔwvo-on piɔwvo nin yɛ.

³ Kani yɔm lebol va nda lusullo o lebol-lo, tinda nda va nda kɔɔlan lɔɔ-o, sionnde va vana va nda soŋɔ̀ɔ́-o o ba len, nɔm a yimi ɲɛm mun kpow maa paale Madiannda bumba má sɔɔndian-nden.

⁴ Bau samtala vana vownun o cɔwvo lan kpow, a volɔɔla cuɛinannda lekuubala lɔngɔlian a koovan-ndan, la viawnunnin o yinnden nin mì la ŋɔɛ selemenden.

⁵ Kani cɛlɛkpɔɔ vilun naa, hɔ́ɔ́ piaandoo yɔngun naa, masalen kpow le vanin ndu o congú, o nɔnin diolan aa: ‹Ɲaa-fàngà, vana silaa nɔ velan too. Hala-Kpaayaa, fuɲa fɛɛn-fɛɛndo, masa kɔlɲuloo.

⁶ Tofa vɔ ɲɛ o tosanin-ndo: masalen pɛngɛlaa mì le kui, vana co o kpɛŋɛ lemasa David-o coo-o a masale ndɔlen kɔlɲulu nɔ lamɛɛlu loo yɔngoo, yoomuan masale ndɔlen lueiyo a len simio yili, a dɛnɛ sandaa a sakpoyɛi, kandɔɔ sisa háá le fɛɛn a fɛɛn. Dɛnndan ndan Mɛlɛka-Nɔ-Kpaayaa-Kpow-vo tosanin a dialun fulaan ni.›»

Hala kɔngɔlan Israɛlla

⁷ «Maalii yɔngu cuavaa Yakɔb-a yoongoo, mí yoongu kon del Israɛlla coo.

⁸ Vannda kpow a sinanin isɔɔ a yoongu kon o kɔɔ. Cuavaa-imamaa Efraim-nda a vanaa co icali Samari-a co dimio a heelɔnndo a kɔl yongaa aa:

⁹ ‹Kpilikion deli, kɛ n minginin tangul a powta sialaalan. Buumbuue cuu kili, kɛ n co yɔmii Sɛɛdrei mingi o fonda kon.›

¹⁰ Lelan, Mɛlɛka cuanin yaamɔaa Resin-nda mà simul nda, o tosanin mì yaamɔaa ndɔa simul ndu.

¹¹ Aramiia co a ba paalen le can-ndo-a a Filistia co a ba paalen le del-lo-a kisikisinin lɛŋnde Israɛl-ten ma tɛɛmbuu len. Kɛ a kon kpede, kɔl ndɔ tuwvo ɲulul-lɔ nin te, ba ndɔɔ va vɔnin o heelaa.

¹² Kɛ vannda ha muungu Mɛlɛka va nda sanga kon tuisio coo-o o ibuŋ te, a muli hɔlla o Mɛlɛka-Nɔ-Kpaayaa-Kpow-vo lo le.

¹³ Lelan, Mɛlɛka faŋanin bollen a puilen, siɔ̀ɔ́la vawlan a kpɛ̀ndɛ̀len o lɛŋnde Israɛl-ten nin o paalen ten pilɛ nin.

¹⁴ Kasoŋaa kɔlkalua a vanaa bɛndua, nda co bollen ni. Vana-tɛɛngaa-diom Hala co vannda còòlan pɛɛkoo-o, ndu co puilen ni.

¹⁵ Vanaa co vanaa Hala-a simndan laci-a co nda lueiyo o pɔwlan nin, vanaa co yɛ cɛlɔɔ mi vannda va nda simndan laci-a co nda pila laasianndo.

¹⁶ Lelan, Maalii hininin kɔl a felengia piaandua ndaa le, o nɔnin iɲíí a víyaa ndaa a vanlaandua piaandaa ndaa vi-a le, kani nda kpow vanaa sendu le-a, a vanaa kɔlvesɛiya nda co ni. Nda kpow a co sɔɔn vɔɔnndon solinndo o lasondo. Kɛ a kon kpede, kɔltuw Mɛlɛka-o ɲulul-lɔ le, ba ndɔɔ co vɔ o heelaa tuŋ.

¹⁷ Kani kɔlvesɛiyo, lomɔɔ o loam ni maa leyin, lomɔɔ o loam ni maa yinnde loam siɛmbulle a hɛɛnndon-nden, maa yinnde loam bundɛla bɛndulan, mí kumii tiŋitiŋiei hel coocoo maa masungbu len.

¹⁸ Lɛŋnden le co ŋɔu a kɔltuw Mɛlɛka-Nɔ-Kpaayaa-Kpow-vo, vannda siŋnun ɲɛ yinnden le va mɛngɛlaa-o. Vana-vana co puapilɛ ndɔɔ haki malɔɔ le.

¹⁹ Vannda co ɲɛm dian tɔ̀un co vannda o ba kɛndɔɔ coo-on dioo, kɛ yiaan ma co nda nɛiyo, a co ɲɔɔn dioo o ba nda miallo coo kɛ a pim te. Vana-vana co visin ba ndɔɔ sɔmndo.

²⁰ Cuavaa-imamaa Manase-a co a Efraim-nda tɛɛmbuuo, a Efraim-nda co a Manase-a tɛɛmbuuo. Nda kpede a liiman vɛlɛ le kɔlan Yudaa delɔɔ coo. Kɛ a kon kpede, kɔltuw Mɛlɛka-o ɲulul-lɔ le, ba ndɔɔ co vɔ o heelaa tuŋ.