Esai 7 - BII BILA

Sɔɔn dimin le Israɛl a le Aram-ndon

¹ O telen Ahas, po Yotam-ndo, po imama Osias-o va masalen tosaa o tàndá Yuda-o coo-o, mí Resin va masaa Aram-ndo hel Yerusalɛm nda Peka po Remalia va masalen tosaa Israɛl-lo, le kɔlan kobio delɔɔ coo a cɔwvo. Kɛ a tiwba le Yerusalɛm tiilaa le.

² Mí vannda kɔ dimul yungu David-o aa: «Aramiia kila dɔ́ɔ́ngɔ́ɔ̀ o tàndá cuavaa-imamaa Efraim-nda nin.» O kon, mí masaa Ahas nda vanaa ndɔa hiilun kɔltan mɛ̀ɛ́-mɛ̀ɛ́ hoeyii fùkù-fùkùei hiiluu yɔmnde o bundɔɔ nin nuaa yɛ.

³ Le hee, mí Mɛlɛka dimul Esai aa: «Nɔm niaa Sɛar-Yasub po nɔm, la kɔ masaa Ahas diomɔɔ o tɛyii dala co a lecoo-e mɛɛlulan, o nɛi kɔɛ a ciɛi vana siɛɛnduaa lavolɔɔ-e-o coo.

⁴ A tiiya pɛ, a dimul ndu aa: ‹Kɛsi kɔllo, siòòŋii bii nɔm te. Kɔl nɔmndo fula mayoomu le kilin biyan miunndon mun te. Vu n'dial le kɔltuw Resin-ndo, kɔltuw Aramiia a le kɔltuw po Remalia-o le.

⁵ A toɲa, Aramiia tuu le nɔm dɛnɛ vɔɔndo tosallo, cuavaa-imamaa Efraim-nda a po Remalia-o co dimio aa:

⁶ N helnun mì n kɔ delnun vannda Yuda coo, n kɔ tiilan kobio Yerusalɛm le ndu delɔɔ coo, n luɛinun lenin mì n vosoŋan ndu, mì n siinguu po Tabeɛl-lo masaa nda coo.

⁷ Kɛ Maalii, o co Mɛlɛka-o dimi aa: «Kon tosannin te, ken nɔlanin tosan te few!»

⁸ Kani Damas co kobi lebollo le lɛŋnde Aram-nden ni, Resin yɛ, ndu co masa lebollo le kobio Damas ni. Nanu a vɔsilan belaŋɔmpum a laŋuɛɛnu, polale Efraim-nden le co cuvɔɔ kpede, le ve lɛnin yungu le few-few.

⁹ Samari co kobi lebollo le tàndá Efraim-ndo ni, po Remalia-o yɛ, ndu co masa lebollo le kobio Samari ni. Lelan te la sim yili o laalanndo nin te, la nɔlanin simullo yili le.›»

Volɔn vana nɔ diolan aa Emmanuɛl-lo dimin

¹⁰ Mí Mɛlɛka soaa vɛlɛ o Ahas lo, mó dimul ndu aa:

¹¹ «Ɲuna Mɛlɛka Hala nɔmndo mo cɔm nɔm dɛnɛ tɔɔmaseloo pum le nɔm pila, ɲuna ndu mò cɔm nɔm ndu, o va o lɛŋnden bɛngu di-di ni, o va o halataala coocoo pɔ́-pɔ́ ni.»

¹² Mí Ahas muli aa: «I co ɲɛ-ɲɛ ɲuna le, i co Mɛlɛka tɔɔndan te.»

¹³ O kon mí Esai dimi aa: «La yaŋ nilan, niaa yungu David-o! Vɛ̀ɛ̀ dɛnɛ pɔmbɔɔ kon co le niaa mì la va vanndacieea saangiaa ni? Vɛ̀ɛ̀ la yeema vɛlɛ le Hala nuu saangiaa?

¹⁴ Lelan, Maalii pila co niaa tɔɔmaseloo yɔngu: la tuei-yɔ, cuaambɔ laandoo cuanin folio, mò velu hɔ́ɔ́ piaandoo, ma ke ndu diolan aa Emmanuɛl.

¹⁵ Cuɛima nɔnɔan a lɛan o lonin dioo ni háá mo sina le dɛnɛ vɔɔndo kɛɔ a le dɛnɛ kɛndɔɔ cɛlɔɔ.

¹⁶ Kɛ telen pá mi poombɔ kon sina le dɛnɛ vɔɔndo kɛɔ a le dɛnɛ kɛndɔɔ cɛlɔɔ, lɛŋii ŋiiŋii n co hee siòònde yɔŋndo a masaa ŋiɔnda-e, vannda piawnin ndi má faŋan lenin.»

Mɛlɛka kɔngɔlan tàndá Yuda-o

¹⁷ «Mɛlɛka tuisinin niaa, vanaa niaa a yungu fuɲa niaa-o palɛi sangɛi coo, kabi polale Efraim-nden le sɛiyan a polale Yuda len, palɛi vaa lende kei-yɔ niaa coo le. Masaa Asiri cuunin niaa kpundɛ kon ni.

¹⁸ O palɛi ken nin, Mɛlɛka hulnin pengia co o peelan Esipte mɛɛlulan-nda a lɛa co o lɛŋnde Asiri len nin-nda,

¹⁹ a hunnin fili-fili mà hun cal o kpolonndan nin, o tɛɛngun powta kpovala tɛɛndiɛilan nin, o bɔɔla yɔmii pɔmbɔɛi kpow coo a o bil puiyaa kpede coo.

²⁰ O palɛi ken nin, Maalii sendinin a kuisii o yownin a peo Efrate leeloo-e, masaa Asiri pɛɛn. O sendinin niaa bolle a yiiŋii n'peluei, o sendinin niaa vɛlɛ siaiyon.

²¹ O palɛi ken nin, vana-vana mandanin naw laandu téndóó o pilɛ a saa a ŋiɔn.

²² Nɔnɔan ma kuinin taw-taw mì vannda va cuɛima-nɔnɔan dioo. Kani cuɛima-nɔnɔan a lɛan ma vanin ɲɛdiaa vanaa lonin o lɛŋnden nden nin-nda ni.

²³ O palɛi ken nin, fonda oo fonda rɛsɛnndon va pɛ n tɔalaa coo tumndan vàá pilɛ, mì vɔngu fonda kon bɛnda volin latámán vàá pilɛ, fonda kon malnunnin mì hɛɛnndon a siɛmbulle vil lon.

²⁴ Vannda vanin luɛyɔɔ o fondala lan a kpaasiaalan a kɔɔn o laba, kani lɛŋnden kpow le co siŋnɔn hɛɛnndon a siɛmbulle.

²⁵ Kɔngɔla ndaa váà paandu a dɛndɛlan-ndan bɛɛ, vana ve lɛnin lakɔ lon te, kani siòònde vanin vannda le yɔɔn mun, hɛɛnndon a siɛmbullon. Lon nawva vanin kɔlan diólan ni, lon koni saa vanin kɔlan kelaa ni.»