Esai 66 - BII BILA

Yungu sɛnɛi Hala-o a kaannde toɲalen

¹ Nuaa Mɛlɛka dimi ni aa: «Halataalaa co kpɛŋɛ ni lemasaa ni, lɛŋnden le co ɲɛ ni kɛsiaa n'peloo ni. Cɛi súú yɛɛ nɛ niaa nɔla yɛnin ya tengullo? Fonda nɛ va yɛnin fonda ni pɛngiaa kpeekpei?

² Ɲɛm mun kpow, ba nuu cɔw mun ni, o kon n mun kpow n va mɛɛ n co yɛ, ya Mɛlɛka co sɔɛi nuaa ni. Tofa vɔ, vana ya landunin hɔlla coo-o, ndu co vana ikɔɔ co o mɔnɛi nin-ndo ni, o co ɲiiyaa a siòònde a sɔɛi nii-o.

³ Vana kelu pɛ nawvo bololan le ndu sálàá solio, mɛɛ o dii vɛlɛ vanacieo. Vana soli pɛ saa téndóó sálà, mɛɛ o yem vɛlɛ tunndo kɛsɛi. Vana heelu pɛ sálà ɲɛm vàá le ndu cɔmndo, mɛɛ o fasaŋiaa kooma pewvan. Vana lom pɛ ɲɛ loonan lasikɔlɔ ansan, mɛɛ o tosa dɛnɛ nɔɔlɛiyo le piɔmndo sooloo. Vanaa kan kpede a co kɔllo naŋɔɔ o kela ndaa nin, ɲɔɔ co nda hɛnanndo o dɛnnda nɔɔlɛila lan nin.

⁴ Lelan ya bɛɛ, ɲɔɔ hɛnannin ya taw le dɛnɛ palaa ndaa. I tuisinin ɲɛ lueinin nda siòònde-o nda pila coo, kani i veelu kɛ vana pilɛ bɛɛ cɛl te. I soo, kɛ vana-vana yeŋ lani le. Nduyɛ má tosa ɲɛ co dɛnɛ vɔɔndo ya o hɔl-lo, mí ɲɔɔ hɛnan nda o dɛnɛ ya yeema loo tosaa nin.

⁵ Niaa co sɔɛi Mɛlɛka-e biyɔɔ a bɛɛlen-nda, la yaŋ nilan o diom Mɛlɛka-o. La tuei-yɔ mɛɛ puapilɛa niaa nɔ nɛyɔn niaa, mà va niaa kɛɔ le diola nilan-nda dimi yɛ aa: ‹Mbɔ̀ Mɛlɛka cɔm-ndɔ biilu ndɔɔ mì naa n ce vɔ kɔl niaa kɛndɔɔ!› Kɛ nda siɛmbulan la biinin ni mɔ́ɔ̀yɔ̀ɔ̀.

⁶ Diom bɛndu-bɛndoo co fulaa o kobio nin, diomndo co fulaa o Cɛi-Hala-o nin. Diom Mɛlɛka-o co sɔɛi ken ni, o co yaamɔaa ndɔa salaa le dɛnnda ndalan-ndo.»

Naŋɔɔ Yerusalɛm sɛnɛiyo

⁷ «Dembe vialaa ndóò cen-ndɔ Siɔn nɛiyo le, mó vialu, pulei ndíì biŋin ndɔ ndu le, mó vialu hɔ́ɔ́ piaandoo.

⁸ Nɛ̀ɛ́-nɛ̀ tuei yɛ nin dɛnɛ vaa lende? Nɛ̀ɛ́ ce yɛ nin dɛnɛ kaamaa vaa lende? Vɛ̀ɛ̀ lɛŋnden le nɔla mì le siŋnun lɛŋnden o paalen ten pilɛ kpé bɛngu? Vanaa-mangalaa-isɔɔa nɔla pá mà velun o lepilɔɔ? Pulii vialɛi kandɔɔ dɔ́ɔ́ Siɔn biŋinndo, mó vialu poaa ndɔa kpede!

⁹ Vɛ̀ɛ̀ mì timbi (vanalanɔɔ) demboo le violɔɔ, mì kuuna ndu vɛlɛ le hɔ́ɔ́ kon violɔɔ? Mɛlɛka ɲuna nuaa ni. Ya tosa ni mì (vanalanɔɔ) velu, vɛ̀ɛ̀ mì yii vɛlɛ ndu pulei mò bumba le violɔɔ? Hala nɔmndo ɲuna nuaa ni.

¹⁰ La viow kponyoo a Yerusalɛm latulu, la siinguu Yerusalɛm dɛnɛ kɔlkɛndɛ niaa, niaa vanaa kaola ndu-a kpow, niaa co mɔnɛi biyɔɔ le tambii o tambu-e a kpow, la yɛkɛlan a ɲaaloo a ndu Yerusalɛm latulu,

¹¹ haliko mi la vɔɛi mɛɛle ndɔle ɲɔɔlu vana len, mì la pim ca, haliko mi la sɔɔsiaa biilu ndɔ peelan bɛndu-bɛndoo, mì la tuei ndu yeela tɛfulu.

¹² Kani nuaa Mɛlɛka soo ni aa: «I yaanin kɔlɲuloo o ndu (Yerusalɛm) lo, mì kɔlɲulu kon va kɔlan ndon volo-volo maa pee bɛndu. I yaanin tɔnɔ vanaa-mangalaa-isɔɔa o ndu lo maa pee pɔmbɔ mɛmma hunaa. O kon, la sɔlanin vɔɛsio, la cuannunnin o balan coo mì la sɔla yiiliaa o vulan coo.

¹³ Ya, i ɲɔɔlunin niaa maa cɛlɛkpɛ kala ndɔ co ɲɔɔloo-o. La sɔlanin ɲɔɔloo Yerusalɛm.

¹⁴ La canin dɛnɔɔ ho, mì la naŋ kɔl taw. Yoomuan ma muungunin o paala niaalan nin, mì la yɔŋnun maa bil pɔmbɔ puiyaa. Ba kpaaya Mɛlɛka-o cɔmnunnin vanaa ndɔa baalaa, mì kɔltuw ndɔɔ tol yaamɔaa ndɔa coo.

¹⁵ Kpókò, kpókò, kpókò! La tofa vɔ Mɛlɛka hunɔɔ sei! La tofa vɔ ndu hunɔɔ o yinnden tɛɛn, ɲɛla ɲaanannda ndɔla soa nan-ndan la co maa hoeyii felenfelen, o co hunɔɔ le kɔl ndɔ tuwvo tuisio a le kɔngɔliannda ndɔlan peeloo a yelenyelen leyinndo.

¹⁶ A yinnden Mɛlɛka kialu yaman ndɔn ni. A mɔɛi ndɔɛi cɔwve o soaŋ vanaciee oo vanaciee le yamɛi ndɔɛi kiolɔɔ ni. Vanaa delnin Mɛlɛka o ba-a vanin bɔɔ sɛ́lɛ́.

¹⁷ Vanaa co dindinndo a toosianndo le kɔlan o nakɔlan nin-nda, la nda co kɔlan nin a pilɛn-pilɛnnda lan pɛɛn. Vanaa co visin pewvon dioo-a, vanaa co ɲɛm nɔɔlɛiyon dioo-a, vanaa co bɛlla dioo-a, nda kpow a tambunin, mà cuu o lepilɔɔ! Mɛlɛka soo lende ni.

¹⁸ Kani ya, i sina dɛnnda ndalan a yiyannda ndalan. Telenndo tiiya le vanaa-mangalaa-isɔɔa a vannda súúlan kpede cuungiaa. A hunnin nanu mà ce biilu nuu.

¹⁹ I handunin tɔɔmaseloo nda tɛɛn, mì vem vanaa ndaa lonin yoomu-a o vanaa-mangalaa-isɔɔa lo, mì vem nda Tarsis, Pul, Lud (o vanaa vuaa lakpaasiaa kan ndo). I viamnin vɛlɛ nda Tubal a Yavan, o lɛŋii co o mɛnndan tɛɛn a o mɛnndan kɔngɔ-e nin, i co ken levil lándan-nde. Vanaa co lon-nda a tui-yɔ isɔɔ a ya (Mɛlɛka) o kɔɔ le, a ci vɔ vɛlɛ biilu nuu le. A cɔmnin vanaa-mangalaa-isɔɔa biilu nuu.

²⁰ O kon kɔɔli, a muungunin a puapilɛa niaa co o lɛŋnden nin vanaa-mangalaa-isɔɔa tɛɛn-nda nanu o soa coo, o ɲɛla ɲaanannda soa nan-ndan coo, o kutukutula nɔ kuulen lecoo lan coo, o milɛɛa coo a o ɲɔɔmɛɛa coo, mà heelu nda o pembii nii diandɛi coo Yerusalɛm. Mɛlɛka soo lende ni. A hunnin a nda maa mɛɛ cuavaa Israɛlla a hun a kpeyan sálà ndaa, o bonyii diandɛi nin o Cɛi-Mɛlɛka-o nin yɛ.

²¹ I cuanin vɛlɛ bɛɛ vanaa-solia-lasálàá a leviia nda tɛɛn. Mɛlɛka dimi lende ni.

²² Kani maa mɛɛ halataala sɛnɛiyo a lɛŋnde sɛnɛile ya co toosiaa len le viawnin ya o hɔl-lɛ, lende koni cuavaa niaa a diola niaalan bɛɛ la viawnin ya o hɔl ni. Mɛlɛka soo nuaa ni.

²³ O kafo paangii sɛnɛi oo kafo paangii sɛnɛi coo, o paale pɛngiaa oo paale pɛngiaa coo, vana-vana vanin hunɔɔ vulan baŋɔɔ ya o labɛngunin. Ya Mɛlɛka dimi lende ni.

²⁴ Tuma vannda fulanin-ndo, a canin vanaa tosa nila kalulan a sɔɛi nii-a ihini a vílɛ́iya lɛ́ɛ́siɛn, càá vanin nda dioo-a vinin te, yinnde vanin nda lomɔɔ len le ɲumnin te. Siòònde taw i biinin ɲaa yoomaa kpow le dɛnɛ nda kon.