Esai 65 - BII BILA

Tɛɛlɔnnda vannda a kpemala Mɛlɛka lan

¹ I yɔngun mí vanaa ve ya ɲɛ-ɲɛ ɲuna le-a a sɔɔnguu ya ikɛi. I cɔmnun mí vanaa ve ya nuwviaa le-a saalun ya, mí dimul vanaa-mangalaa-isɔɔa ve diola nilan veelu lepilɛ bɛɛ le-a aa: «I co nanu! La nuaa vɔ ya!»

² Mí niinu vanaa iseesiaa ha bala nilan tɛilullo kpɛŋ, a co haa kelaa o nɛi vɔɔndo coo o yiyannda ndalan nin-nda pɛɛn.

³ Vannda ha co ya tiŋɔɔ a ya kɔllo tuuloo tuŋ-tuŋ, a co sálàlan solio o nakɔlan nin, a co lasikɔlɔ ansan lomɔɔ o kpilikion coo.

⁴ Vannda ha co icali o sɛilan nin, mà va lɔan o buululan nin, a co visin pewvon dioo, a nɔ ɲɛm dian nɔɔlɛiyon o ɲɛm-laandun ndan nin,

⁵ a co dimio aa: «Nannun ndon polon, sɔɔnguu ya ikɛi le, kani (taa pilan pɛ ya), a siŋnun o diandaa siŋnun teengen-ndo». Kon kpede kumnde o co ya o milin ni, yinnde co niinoo sandei kpɛŋ nden o co ni.

⁶ Tofa vɔ ɲɛ co o sɛvaa ya o hɔl-lo: I lo lɛnin o meiyo nin te, I co tofa lenin, lekɛ́ndɛi i co nda maa kon mingul,

⁷ dɛnɛ biondɔnnda ndalan pɛɛn. Lende Mɛlɛka dimi ni. I tofanin vɛlɛ dɛnɛ biondɔnnda fuɲaa niaa lenin, fuɲa niaa lom lasikɔlɔ ansan o pembei coo-a, a tɛɛmbuu ya bɛ̀ɛ̀lan o pembun pɔmbɔn coo-a. I tuunin sala ndaa kpafii mɛɛ dɛnnda ndalan la yɔŋnun paandu yɛ.

⁸ Nuaa Mɛlɛka dimi ni aa: «Te vana komal pɛ kpɔ̀nyɔ̀ n'rɛsɛn nɔ mɛnndan lenin taw-vo, mò dimi aa la tɛɛmbuu ndu le, kani tɔnɔɔ co lenin, lende koni ya bɛɛ tosanin le vanaa baalaa niaa ni, yɔŋii nda tɛɛmbuu nda kpede.

⁹ I kenin vanaa Yakɔb-a cuavaa-imamaa fulaa o polale Yuda len nin, nda loonin pembun nun ni, nduyɛ lon vanaa niaa baalaa calnin ni.

¹⁰ Dɛɛlaa Saron vanin nɛɛ cɔlua pɔmbɔa vanin kɔlan billo dioo-a ni. Bóllo Akɔr vanin bɛ̀mɛ́lta cɔlua bɛndua ni, le vanaa niaa nuwviaanin ya-a.

¹¹ Kɛ niaa kɛɛ (ya) Mɛlɛka-a, niaa co pembii nii diandɛi pɔɛɛnɔnndo-a, niaa co (piɔmndo) Kad bàndóó tengullo-a, niaa co taala kólaa peiyo le piɔmndo Meni-a,

¹² I co niaa yɔɔ o mɔɛi cɔwve bɛngu, Niaa kpede, la baŋnin vulan mà kili niaa bololan. Kani i veelu, la cɛl te. Mí soaa, kɛ la yeŋ lani le, mí la tosa ɲɛ co dɛnɛ vɔɔndo ya o hɔl-lo, mí la hɛli le ɲɛ hɛnan ya loo tosaa.

¹³ Lelan, nuaa Maalii Hala soo ni aa: La tuei-yɔ, vanaa niaa baalaa vanin ɲɛdiaa dioo, niaa niaa, yiaan ma vanin niaa nɛiyo, vanaa niaa baalaa vanin kolɔɔ. Kɛ niaa, la vanin a bolola vesɛilan, vanaa niaa baalaa nda vanin ɲaaloo dɔwnɔnndo, kɛ niaa niaa, siɛmbulan la vanin niaa coo.

¹⁴ Àá mbɔ̀! Vanaa niaa baalaa viawnin kponyoo a yoondiaalan, kani dɛnɛ kɛndɔɔ a ɲaaloo vanin nda o kɔl. Kɛ niaa la vanin koŋullo le sanga vanin niaa o kɔl-lo, kɔlta niaalan la sanganin háá mì la ŋɔɔcian.

¹⁵ Diola niaalan la lonin vanaa niaa ya hɛli-a o lasondo o mɛɛniaalan nin, mà va dimio aa: «Màá Maalii, o co Mɛlɛka-o cua nɔm mà sɔla piɔ́mndo lende fɔ́!» Kɛ o kenin vanaa ndɔa baalaa diola celen.

¹⁶ Vana yeema pɛ le duaa dɔwnɔnndo o lɛŋnden nin, o bɛnda mò sɔla duaa kon Hala toɲaa o ba. Vana yeema pɛ le mɛnanndo o lɛŋnden nin, ndu bɛnda mò mɛnan o diola Hala lo o lediom coo-o. Kani sangala imɔnɔla paandulan la hiawnin, sangala lan la faŋannin ya o hɔl.

Lɛŋnde sɛnɛilen

¹⁷ Tofa vɔ, i co halataala sɛnɛiyo a lɛŋnde sɛnɛilen cɔvɔɔ, vana loonun ndɛnin a dɛnndan paandu le, yiyan kon del-lɛnin vana o kɔl te.

¹⁸ Lelan, la va lɔ́ɔ́-lɔ́ɔ̀ o kɔlkɛndɔɔ nin, mì la dɔwnun ɲaale, le ɲɛm (sɛnɛin) ya co mun cɔvɔɔ-on, kani i cɔw Yerusalɛm le ɲaaloo, mí cɔaw vanaa co lenin-nda le kɔlkɛndɔɔ.

¹⁹ I siinguunin Yerusalɛm kɔlkɛndɛ nuu, i siinguunin vanaa niaa ɲaale nuu, vana tui lɛnin vɔkɔ-vɔkɔ lacaŋndo a vɔkɔ-vɔkɔ somisomianndo lon te.

²⁰ Cɛlɛkpɛ vilun ndɛnin mò tosa ɲɛ-pɔmbɔ daama mò vi le. Kaasunɔ yuuvɛi ve lɛnin ndon, mò kɛɛ palɛi ndɔɛi kpow cii le. Kani vana-vana nɔ pɛ vɔsilan kɛmɛ mò vi, mɛɛ ndu vi felengi pɔmbɔ-pɔmbɔ. Vana tiiya vɔsilan kɛmɛ le mò vi, mɛɛ vana dangaa ndu yɔŋnun ni.

²¹ A tangulnin cɛilan mà luɛi lenin, a tɔalnin rɛsɛnndon mà de kɔmnde ndɔlen.

²² A tengul-lɛnin cɛilan mì vana celen koma luɛi lenin te, a tol-lɛnin le vana celen baloo dɔvɔɔ le, kani vanaa niaa viawnin yoomu mɛɛ yɔmii tɔalɛi viaw yoomu yɛ. Nduyɛ vanaa niaa hɛlinnda a dianin baala nda tosa a bala ndalan-ndo tɔnɔ.

²³ A bɛpɛla lɛnin fondo fúú le, a vilu lɛnin cuawva a buulanndo le nda cɔu vuo a lende le. Kani a siŋnunnin vanaa Mɛlɛka dɔw duaa-a, mì cuavaa ndaa va nda ikɛi.

²⁴ O kon, telen pá mì nda piɛi ya, mì ya sina pɔɔ piɛile len.

²⁵ Tun yondoo a saa téndóó a dianin o fonda pilɔɔ, yàlàá dianin billo maa naw. Kɛwvo ndu ndu, cundoo vanin ɲɛdiaa ndɔɔ ni. Dɛnɛ vɔɔndo a dɛnɛ kɔlvesɛi tosan ndɛnin o pembii diandɛi coo le». Mɛlɛka soo lende ni.