Esai 61 - BII BILA

Kiilanɔ hin a yoongu cindaa-o

¹ «Kɔl Maalii Hala-o co ya coo, kani (Mɛlɛka) pɔla ya, o vem ya le kɔlan vanaa co o sangaa nin-nda yoongu kɛndɔɔ tɛɛngullo, le vanaa nɔ mɔnɛi o lakɔl-la cɛwvo, le vanaa co o biyɔɔ nin-nda yoongu baŋan ndaa dimullo, le vanaa kaasoa yoongu sɔlaa ihɔɔyaa dimullo.

² O vem ya le yondaa a vɔsi kɛndɛi Mɛlɛka-e fulanin ceen-ndo o kɔɔ, a á paale Hala naa minginin màá len o kɔɔ, le vanaa co o dɛnɛ palaa nin-nda kpow ɲɔɔloo.

³ Le vanaa co o mɔnɛi nin Siɔn-nda (malaa), le nda lɔngɔlianndo o loolio nin faŋaa kuee, mì yɔngu nda mɔsil isalamayaa, le dɛnɛ palaa faŋaa nda coo, mì yɔngu nda cuɛima suunanma kɔlkɛndɛan, mì faŋa nda kɔl imɔnɔɔ coo, mì yɔngu nda ɲɛ cuɛinan sɔvɛɔ, yɔŋii nda va o kɔl tambɛiyo nin. O kon a veelunin nda aa vanaa tɔlnun pi o dɛnɛ sandaa nin-nda, tɔlɔɔ Mɛlɛka-o, o ó tɔl le biilu ndɔɔ cɔmndo-o.»

⁴ A minginin tangullo o ɲɛla koombiaa paandu lan coo, mà mingi bémbéla paandulan cɔvɔɔ, a kobila vannun fondo lan, la va nin pɔmndan sindɛ pa lan pɛɛn.

⁵ Mialla vanin icali lenin, a vanin cɔlua niaa mandaa le nda yɔɔ diólan, poaa mialla vanin vanaa vàà niaa, a vanaa tɔalaa n'rɛsɛŋaa niaa ni.

⁶ Kɛ niaa niaa, a veelunin niaa aa vanaa-solia-lasálàá Mɛlɛka-a. Vannda diminin aa la co o vali Hala niaa nin. La dianin ɲɛ-sɔlaa vanaa-mangalaa-isɔɔa, mì la cal o bolofaa ndaa coo.

⁷ O fonda siɛmbulan láà tol niaa-o, la sɔlanin salaa bɛmbɛ lediin. O fonda niáà tambu bɛ̀ɛ̀lan-ndo, la dɔawnunnin ɲaale taw-taw. Lende nda sɔlanin salaa bɛmbɛ lediin o lɛŋnde ndalen nin ni. Kɔlkɛndɛ niaa vanin le fɛɛn a fɛɛn.

⁸ Kani ya Mɛlɛka, dɛnɛ sandaa ya yeema ni, delɔɔ coo a kafalan nɛinun ya taw. I salanin nda kpafii mɛɛ dɛnnda ndalan la co yɛ. I yiinin kpema fɛɛn-fɛɛndo a nda.

⁹ Cuavaa ndaa imamaa sinannin vanaa-mangalaa-isɔɔa tɛɛn, polale ndalen le sinannin vanaa súúla celennda tɛɛn. Vanaa canin nda-a kpow a sinanin maa polale Mɛlɛka dɔw duaa len nda co ni.»

¹⁰ I dɔawnunnin ɲaale taw o Mɛlɛka nin, yoomu nuu vanin o piaa a kɔlkɛndɔɔ o Hala nuu nin, kani o vow ya volɔɔla cuɛinannda cindaalan mó kuumbuu ya a doma lecoo dɛnɛ sandaa, mɛɛ vana co lanɔɔ cuaa-o vownun mɔsil kɛndɔɔ o lebol nuaa yɛ, mɛɛ vanalanɔ co calle o nɔu-vo vownun kelan kɛndɛ-kɛndɔn nuaa yɛ.

¹¹ Kani mɛɛ lɛŋnden le soli ɲɛ vul lecoo-o yɛ, mɛɛ nakɔɔ soli ɲɛ tɔlnun lecoo-o mò vil nuaa yɛ, lende koni Maalii Hala tosanin ni, mì dɛnɛ sandaa a lisaa vil vanaa-mangalaa-isɔɔa kpow o hɔl.