Esai 60 - BII BILA

Naŋɔɔ sɛnɛi Yerusalɛm sɔlanin-ndo

¹ Cɔn ma tenga Yerusalɛm, kani ɲɛ-tengaa nɔmndo cɔmnun, biilu Mɛlɛka-o tol nɔm coo.

² Tofa vɔ, ɲumndan ma kunbu lɛŋnden mɔku-mɔku, ɲumma n'kpungban ma mel vanaa súúla celennda. Kɛ nɔm nɔm, Mɛlɛka co nɔm tengaa coo maa lepala, biilu ndɔɔ cɔmnun nɔm coo.

³ Vanaa-mangalaa-isɔɔa kɔanin ɲɛ-tengaa nɔmndo kɔɔli, mì masaa kɔɛ pangele ɲɛ-tengaa paale siaa nɔmndo kɔɔli.

⁴ Keeliaa vɔ hɔlla nɔm balɔɔ pindo, mà mɛɛndian: cuavaa nɔmnda kpow a co mɔɔsianndo, a co hunɔɔ o nɔm ndo. Poaa nɔmnda co fulaa nɛɛ levil, cuavaa nɔmaa laandua co hunɔɔ o balan coo.

⁵ A canin ɲɛ ma naŋ kɔl taw, kɔl nɔmndo ɲiiyanin mì ɲɔɔ hɛnan nɔm taw-taw. Kani bolofaa mɛmma ihɛllo hunnin sumialii nɔm, ɲɛ-sɔlaa vanaa-mangalaa-isɔɔa hunnin nɔm o ba,

⁶ ɲɔɔmɛɛa sɛ́lɛ́ bɛndoo kumbunin lɛŋnden kpow, ɲɔɔmɛaa téndéa Madian a ɲɔɔmɛɛa Efa a pianin o lɛŋnde nɔmnden coo ca. Kan kpow a cannin Saba mà hin (o nɔm ndo), a hunnin a sianion a ansan, a kelanin a Mɛlɛka lisaa nɛɛ-nɛɛ ka.

⁷ Cɔlua Kedar kpow cuungiannin o nɔm ndo, saa kóndóa Nebayɔt a vanin nɔm o ba bɛngu, a yɔngunnin le sálà loamaa solio o fonda-loamaa-lasálà nuu coo, a hɛnannin ya, i yɔngunin cɛi ni ivanabɛnduyaa naŋɔɔ taw.

⁸ Nɛ̀ɛ̀aa co yɛ kelaa coocoo maa yumbuyumbu? Nɛ̀ɛ̀aa co yɛ hiŋnɔnndo coocoo maa poonpooŋaa co kɔlan o fonda nda lɔlaa-a?

⁹ Kani lɛŋii co o mɛnndan kɔngɔ-e i tiindan ya. Dɛ̀ndɛ̀la mamɛnndan Tarsis la sim laci le hunɔɔ a poaa nɔmnda cɔnɔnndo nɛɛ levil a volin a á sianin ndan. Kon kpow le diola Mɛlɛka Hala nɔmndo lan, O-Diandaa Israɛlla pɛɛn, o co nɔm salamayɛi yɔngoo-o.

¹⁰ Poaa miallo minginin kpakila nɔmndan cɔvɔɔ, masaa ndaa vanin nɔm o ba bɛngu. Mí yáà soaŋ nɔm telen yáà va o kɔl tambɛiyo nin-ndo, kɛ sisa, a kɛndɛi nii mí tuinun nɔm iɲíí.

¹¹ Diola nɔmnda luɛyaalan la vanin lakumbia lɔ́ɔ́-lɔ́ɔ̀, la venin lakindaa ipala le, la venin lakindaa icɔl te, haliko mi bolofaa vanaa-mangalaa-isɔɔa luɛi o nɔm ndo, mi masaa ndaa a vanaa vanin nda kɔɔli-a a luɛi.

¹² Kani te vanaa-mangalaa-isɔɔa a masalen a hun kɛɛ pɛ le nɔm baalaa tosallo, a tɛɛmbunnin nda mà ɲum mundu.

¹³ Naŋɔɔ Liban-ndo hunnin o nɔm ndo, yɔmii siprɛs, ɔrme a buis hunnin kpow, le nɛɛ cɛi-kola-toandaa diandaa nuu co-a nɛŋio. Nduyɛ, i siinguunin fonda pelun nun co coo-o fonda biilaa.

¹⁴ Poaa vanaa co nɔm saangiaa-a a hunnin mà tundun nɔm o labɛngunin. Vanaa va nɔm tɛɛndanndo-a kpow a hun baŋnin vulan nɔm o labɛngunin. A veelunin nɔm aa kobi Mɛlɛka-o Siɔn co le O-Diandaa Israɛlla-o.

¹⁵ Va bɛɛ o malnanndo lende, mì vannda ndáà nɔ nɛyɔn nɔmndo, mì ndáà kɛɛ le keiyo o nɔm ndo, i siinguunin nɔm kobi vana lisan a ndu-o le lɔ́ɔ́-lɔ́ɔ̀, kobi vana dɔawnun ɲaale le fɛɛn a fɛɛn-ndo.

¹⁶ A vɔɛinin mɛɛma vanaa-mangalaa-isɔɔa, a vɔɛinin vɛlɛ mɛɛma masaa, a sinanin o kon maa ya co Mɛlɛka ni, vana ciindiaa nɔmndo a vana baŋaa nɔmndo, vana kpaayaa Yakɔb-o pɛɛn:

¹⁷ Yɔŋii ya hun a daɲan, i hunnin a sianion, yɔŋii ya hun a cilinndon, i hunnin a volion, yɔŋii ya hun a yɔmnde, i hunnin a daɲan, yɔŋii ya hun a powtan, i hunnin a cilinndon. I handunin kɔlɲuloo le nɔm hɔlla landɔɔ coo, mì handu dɛnɛ sandaa le nɔm masalen tosaa coo.

¹⁸ Vana tui lɛnin dɛnɛ kɔlvesɛiyo tɔ́ɔ́ o lɛŋnde nɔmnde nin te, vana tui lɛnin dɛnɛ tambɛiyo a ɲɛ puusiɛiyo tɔ́ɔ́ o pɛɛngula lɛŋnde nɔmnden te, a kenin kpakila nɔmndan diolan aa «Cindaa» mà ke diola luɛyaala nɔmndan diolan aa: «Lisaa.»

¹⁹ O ve lɛnin paalen te le ke lɛnin nɔm ɲɛ-tengaa ipala le, o ve lɛnin vɛlɛ paangei le i ke lɛnin nɔm pangeloo icɔl te, kɛ Mɛlɛka pila vanin ɲɛ-tengaa fɛɛn-fɛɛndo le nɔm ni, Hala nɔmndo vanin ɲɛ vavon nɔmndo ni.

²⁰ Paale nɔmnden le delnin te, paangii nɔmnde bɛɛ ɲumnin te. Kani Mɛlɛka vanin ɲɛ-tengaa nɔmndo le lɔ́ɔ́-lɔ́ɔ̀ ni. Palɛi dɛnɛ palɛi nɔmnde cuunin hiovɔɔ kpede.

²¹ Vanaa sandaa kposon vanin o vanaa nɔmnda tɛɛn ni, lɛŋnden le vanin sumialii nda le lɔ́ɔ́-lɔ́ɔ̀. Tɛiyun yɔmun ya pila tɔl-lon nda co ni, vali ya tosa a bala nilan le salamayɛi nii cɔmndo-o nda co ni.

²² O pɔmbɔ-pɔmbɔɔ kuinin háá mo tiiya vaa-pilɛ, o hiow dɔɔnanndo-o siŋnunnin vanaa-mangalaa-isɔaa kpaayaa. Ya Mɛlɛka, i tosanin dɛnnda lan cɔ́-cɔ́ a telennda ndalan.