Esai 6 - BII BILA

Veelu Hala veelu Esai-yo

¹ Vɔsi masaa Osias vi-o, mí ca Maalii icali o kpɛŋɛ lemasa vilɛi-vilɛiyo coo. Mí bɔɔla doma ndɔ bɛndoo la pia o Cɛi-Hala-o nin ca.

² Mí mɛlɛkaa leyinnda va isisi ndu coo, mɛlɛkaa kan, o kɛ́-kɛ̀ ndóò nɔ kumbanndan tan ŋɔmpum, kumbanndan latiɔn la va le hɔlaa ndaa kumbɔɔ, latiɔn le pelun ndan kumbɔɔ, latiɔnnda pilɛlan le hiŋnɔnndo coocoo.

³ Má va yondaa vellaa-velle a dimio aa: «O diandaa, O diandaa, O diandaa Mɛlɛka-Nɔ-Kpaayaa-Kpow-vo co ni, lɛŋnden kpow le pɛ cá a biilu ndɔɔ.»

⁴ Mí koŋnda Cɛi-Hala-o la va hiilɔnndo háá o kèédei coo dí a diomnda mɛlɛkaa kan va solio lan, mí cɛiyo pia cá a kumnde.

⁵ O kon, mí dimi aa: «Kpòkóó, i kɔndu dɛnɛ fɔ́! Mbɔ̀ ya i laasian! Kani vanaciee cɔcɔn co n nɔɔlɛiyon-ndo ya co ni, vanaa ya co icali tɛɛn-nda bɛɛ cɔcɔn ndan co n nɔɔlɛiyon. Nduyɛ i ce Masaa a lehɔl cikin, Mɛlɛka-Nɔ-Kpaayaa-Kpow-vo pɛɛn!»

⁶ Kɛ mí mɛlɛkaa Seerafɛŋaa kan o pilɛ hun o ya lo, dɛngulten le va ndu o ba, o fonda-loamaa-lasálàá coo ndóò cua dɛngulte len a kpaɲala pɔmbɔlan ni.

⁷ Mó pilan ya sondoo a ndu, mó dimul-la aa: «Hoo pilanndo ho sondo nɔmndo, yɔŋ vɔɔn nɔmndo faŋan, hakila nɔmndan la malnun haki!»

⁸ O kon, mí tuɛi diom Maalii-o, mó ɲuna aa: «Nɛ̀ɛ́-nɛ̀ ya viam yɛnin nɛ? Nɛ̀ɛ́-nɛ̀ kɔa yɛnin le naa?» Mí muli aa: «Má cè ya! Viom ya.»

⁹ Mó dimul-la aa: «Mɛɛ kɔ mà kɔ dimul vannda ha aa: ‹La tuɛinin taw, kɛ la biinin bila le, la canin, kɛ la sinanin pɛɛngu le.›

¹⁰ Siinguu kɔlta vannda ha kɔlta bii isɔɔ le lan, baŋul nda nilan mà kumbu nda hɔltan kpáŋ, yɔŋii nda cɔ a hɔlta ndalan, yɔŋii nda tuei a nila ndalan, ma bii bila a kɔlta ndalan, haliko a mangalan mà sɔla siongɔɔ le.»

¹¹ O kon mí ɲuna aa: «Háá telen kuɛɛ nɛ, Maalii?» Mó muli aa: «Háá telen kobilan la tambunin, mì vanaciee ve lɛ icali lenin too, háá telen cɛilan la lonnunnin fondo mì lɛŋnden le lo yolɛ, mi le siɔŋ-ndo,

¹² háá telen Mɛlɛka toawnin vannda polon, mì lɛŋnden le koma lo fondo, mì vannda piew-vo.

¹³ O vanaa va icali lenin-nda nin, te vana pilɛ lo vɔ pɛ o n'van tɔ́ coo, lɛŋnden le ŋɔanin o yinnden nin! Kɛ mɛɛ cii tumnde co ikiyɛi o terebɛnteo, te kon te yálán nda keŋ-ndo yɛ, lende koni vanaa diandaa fulanin o vanaa lonin yoomu o vannda ha tɛɛn-nda nin ni.»