Esai 59 - BII BILA

Ɲɛ sɛi vanaa Hala-a a Hala-o

¹ Ɛ-ɛ, Hala bumba vana ciindiaa le, nile ndɔlen bɛɛ le co lebaŋulɛi kpíŋ le kɛɔ tueyɔɔ le.

² Kɛ yɔŋnda vɔɔnnda niaalan la sɛi niaa a Hala niaa ni, hakila niaalan la vin niaa hɔlaa ndɔa ni, mí la kuuna ndu le niaa nilan yaŋɔɔ.

³ Kani bala niaalan la co lalɔngɔlɛilan a koovan, suon niaan n co n'nɔɔlɛiyon a dɛnnda vɔɔnndan, cɔcɔn niaan co còòlan dimio, mì diɛɛmui niɛi va ɲiimu-ɲiimu fondoo.

⁴ Vana-vana co sei biyɔɔ o isandu coo le, vana-vana co kɔsa o toɲa coo le, nda kpow sɔɔn fondon nda tiindan ni, ma va sɔɔn lacòòvan nɔ kɔlɔ loon solinndo o lasondo, a co foli dɛnɛ vɔɔndo cuaa, ma va dɛnɛ sandaa lepɛŋndo violɔɔ.

^5-6 A co pelta hɔ̀ɔ̀lɔ́ɔ̀ tɛɛnduuo, vana de pɛ pelta ndalan, ndu sɔla piɔ́mndo, te vana pɛl pɛ pelte ndalen lepilɛ, hɔ̀ɔ̀lɔ́ɔ̀ fula lenin faŋ. A co yalala sontɛndɔɔ lɔu. Kolala nda co lɔu lan, o co le ɲɛ cuɛinan toosiaa le. A nɔla mà cuɛinun a vali nda co kon tosaa-o le. Dɛnnda ndalan, sandii lepɛŋnde caŋɛi la co ni, a co dɛnnda kɔlvesɛilan tosaa a bala ndalan.

⁷ Peelun ndan co kiltan le dɛnɛ vɔɔndo tosaa, a co keleŋaa le kɔlan vanaa tɛɛmbuu isɔɔ le-a diwvo. Yiyannda ndalan kpow la sendu le. Dɛnɛ tambɛiyo a ɲɛm tambɛiyon co o nɛila ndalan coo.

⁸ A sina nɛi kɔlɲuloo le, dɛnɛ sandaa co o nɛila ndalan coo le, pemama tuunduɛiyan nda co bulio ni, vana-vana kɔɛ pɛ lecoo o sɔla kɔlɲulu le.

Vanaa Hala-a sina tɛɛmbuu ndaa

⁹ Lelan yamɛi sandɛi kɔɛ naa levil ni, sakpoyɛi co naa komal te. N va tiindanndo le ɲɛ-tengaa sɔlaa, kɛ ɲɛ yifidiio kposon (naa n sɔla ni). N va pangeloo kɔnganndo, kɛ n co kelaa o ɲumndan nin.

¹⁰ N co kɔlan o cìì cɛiyo holnɔnndo a balan keeliaa maa vanaa sumɛi, n co kɔlan a balan keeliaa maa vanaa nɔ lahɔl te-a. N co boŋio ipala déŋ maa o maɲum nin. Maa n'van vílɛ́i naa n co vanaa mayoomua tɔ̀a tɛɛn ni.

¹¹ Naa kpede n co kuŋndan maa n'sofɛlɛ, caŋndo naa tuŋ-tuŋ maa n'poonpoon. N va yamɛi sandɛi kɔl, kɛ ɲɛ-ɲɛ bɛɛ! N va cindaa cumndo, kɛ o co naa bɔɔ levil polon.

¹² Kani yɔŋnda naala vɔɔnndan la co bɔɔ sɛ́lɛ́ nɔm o hɔl, nduyɛ hakila naalan la co naa seilen tɛndallo. Yɔŋnda naala vɔɔnndan la co naa lakayakayanndan. N co vɛlɛ biondɔnnda naalan sinaa válán.

¹³ N co Mɛlɛka dúmbóó yiiyo, n co ndu dɛnnda lacòòvalan tosallo, n co faŋanndo Hala naa kɔɔli, n co kɔnndan polon. N co sɔɔn kɔlvesɛiyon dimio mì n va nila kalulan tosaa, n co sɔɔn lacòòvan yiyanndo mì n va mun dimio o kɔltan nin.

¹⁴ Le ken naa n ɲindu yamɛi sandɛi kɔɔli ni, mí dɛnɛ sandaa va naa levil lándán. Kani toɲaa co boŋiboŋio o falle nin, dɛnɛ sandaa nɔla fondaa sɔlaa lon te few.

¹⁵ Toɲaa hɛlun (naa), vana-vana kɛɛ pɛ le dɛnɛ vɔɔndo tosaa, mò kɔɛnnun polon, (n) yunga ndu, (n) poondiaa ɲɛm ndɔn. Kɛ Mɛlɛka ce maa dɛnɛ sandaa co lɛ le, o ce bɔɔ dɛnɛ kon dɛnɛ vɔɔn bɛndu.

Ɲɛ Maalii tosa-o

¹⁶ O ce maa vana-vana co buulan le dɛnɛ kon te, le hee, mó tambu kɔl, le tùú vana-vana co sondo vow loo. O kon, mí ba ndɔ ndu pila-o mala ndu, mó tiindan dɛnɛ sandaa ndɔɔ.

¹⁷ O vownun dɛnɛ sandaa maa doma cɔw icilin, o handun mɔsil cindaa o lebol mulaa, o vownun volɔɔla mingiaa màá lan maa doma lebɛngu, o vownun dialun fulan mɛɛ vana simbulun o doma bɛndu lecoo nin yɛ.

¹⁸ O mingulnin vana-vana mɛɛ o tosa dɛnndan yɛ. O mingulnin vanaa simul ndu-a kɔltuwvo, mò yɔngu yaamɔaa ndɔa ɲɛ nda bɛnda le sɔlaa-o. O salanin lɛŋii co o mɛnndan kɔngɔ-e mɛɛ dɛnnda ndalan la yɔŋnun yɛ.

¹⁹ O kon, a kenin diola Mɛlɛka lan a biilu ndɔɔ bɛɛlen, kandɔɔ nɛɛ paalen le del-la háá nɛɛ le can-nda. Hali yaamɔɔ hun bɛɛ súlùlù maa mɛmma pee bɛndu, kɔl Mɛlɛka-o toawnin ndu mò ɲaanun.

²⁰ Mɛlɛka dimi aa: «Vana baŋaa co hunɔɔ le Siɔn baŋaa, le cuavaa Yakɔb-aa malnin yɔŋ vɔɔn ndaa-a baŋaa.»

²¹ Mɛlɛka dimi vɛlɛ aa: «Ya yɛ, tofa vɔ kpema ya yii a nda-o. Kɔl nuu co niaa coo-o a sɔɔn niin ya vow niaa o sondo-on faŋannin niaa o sondo le. N feŋannin niaa pila a cuavaa niaa o lasondo le, cuavaa niaa imamaa bɛɛ, n feŋannin nda o lasondo le. Kandɔɔ sisa háá le fɛɛn a fɛɛn.» Mɛlɛka dimi lende ni.