Esai 54 - BII BILA

Kpema sɛnɛiyo le kɔlɲulu Israɛlla

¹ «Viow kponyoo, nɔm vanalanɔ bɔlɔkɛɔ, nɔm vilu cua loo! Viow kponyoo a yoondiaalan mà dɔwnun ɲaale, nɔm dembe vialaa nɛi hoo loo! Kani cuavaa vanalanɔ malnanndo vanin sɛ́lɛ́ mà hiow cuavaa vanalanɔ co o nɔu-vo.» Lende Mɛlɛka dimi ni.

² «Cɔɔlu fonda cɛi-kola-toandaa nɔmndo kuundiaa, mà tondu kolala n'vìì fondala nɔmnda calaalan-ndan. Toandu lan a siòòŋii bɔnɔ le! Bɛndi yoei nɔmnde mà baŋ pikin nɔmndon kpáŋ!

³ Kani a pɛngɛlannin o ba kɛndɔɔ a o ba mɛllo coo, cuavaa nɔmnda biinin vanaa-mangalaa-isɔɔa, a pianin o kobila connun fondolan nin ca.

⁴ Lelan siòòŋii bii nɔm te, kani siɛmbula biinin nɔm te, yɔŋnun yoloma-yoloma le, kani a tembunin labɛɛ le. Kɛ a pɔɛɛnunnin siɛmbula bii nɔm o felengiyɛi nin-ndan, a yiyan ndɛnin a bɛ̀ɛ̀la n tambu lɔ́ɔ́ n va o vii pɔnɔɔ nin-nde lan te.

⁵ Kani vana cɔw nɔmndo ndu co pɔnɔ nɔm ni, diola ndɔlan aa Mɛlɛka-Nɔ-Kpaayaa-Kpow-vo. Vana nɔm baŋaa ndu co O-Diandaa Israɛlla ni. A veelu ndu aa Hala co lɛŋnden kpow bollen-ndo.

⁶ Kani Mɛlɛka veelu nɔm vɛlɛ mɛɛ vanapɔnɔɔ veelu lanɔ ndóò kɛɛ mí lanɔ kon ndóò va o mɔnɛi nin-ndo yɛ. Vɛ̀ɛ̀ vanndo nɔla mò kɛɛ laa ndɔ ifelegiyaa? Hala ɲuna nuaa ni.

⁷ Yáà kɛɛ nɔm le telen bingi, kɛ i minginnin nɔm o ba a ɲíí bɛnduei.

⁸ Yáà dɔwnun tumbé taw-taw mí yáà feŋal nɔm hɔlaa niaa, kɛ i tuinunnin nɔm iɲíí a kaola ni nɔ lamɛɛlu loo. Mɛlɛka vana baŋaa nɔmndo dimi lende ni.

⁹ Ɲɔɔ vanin le ya paale len maa o palɛi Noe-e nin: bau telen kon mí yáà tiaŋnun maa mɛmma Noe-an ma hin ndɛnin mì ma tiw o lɛŋnden coo le. Lende koni ya co vɛlɛ tioŋnɔn ni maa i dɔwnun ndɛnin tumbé a nɔm te, I kɔngɔlan ndɛnin nɔm te.

¹⁰ Hali o va bɛɛ mì pembun bɛndon hiilun, hali pembun pɔmbɔn biiŋun bɛɛ, kaola ya nɔ le nɔmndo bɔndɔlanin te, kpema kɔlɲulu ya yii a nɔmndo bɛɛ kpeŋannin te.» Mɛlɛka nɔ ɲííye a nɔmndo dimi lende ni.

¹¹ Kpòkóó kobio Yerusalɛm! Nɔm óò va o mɔnɛi nin, hoeiye ndíì koŋ nɔm kofokofo. Vana-vana ve le nɔm ɲɔɔloo le! Kɛ tofa vɔ, i co powta nɔmndan mingi cɔvɔɔ, mì ciiŋiaa lan a puulu lindaa yinɔɔ kɛndɔɔ. I kilanin cɔvaa nɔmnda o powta safirlan coo,

¹² I toosiaanin fondala cumulaala nɔmndan a powta kɛndɛla siaŋalan, I cɔawnin diola luɛyaala nɔmndan a powta humbulan. I balunin nɔm cɔvɔɔ pindo a powta kɛndɛ-kɛndɛlan.

¹³ Poaa nɔmnda kpow delnin ya Mɛlɛka kɔɔli, nduyɛ kɔlɲulu cuavaa nɔmnda vanin o bɔɔ!

¹⁴ Dɛnɛ sandaa siminin nɔm yili. Mandan ma kpakpala dɛnɛ kɔlvesɛiyo. Siòòŋii bii nɔm le ɲɛ-ɲɛ le, buulan le kɔl yoloma-yolomaa le, o lueinin nɔm nin te.

¹⁵ Te vannda del pɛ nɔm coo, o co ya (Mɛlɛka) o ba le yiyan kon fulanin te. Nduyɛ vanaa-vanaa yiinan pɛ ma del nɔm coo, a delinin nɔm o ba.

¹⁶ Tofa vɔ, ya (Mɛlɛka) i cɔw sumnɔɔ, o co yinnden fuulaa le suɛɛnde biyɔɔ, o co ɲɛm vallon cɔvɔɔ mó toosiaa ɲɛ cɔwvo mɛɛ o caa yɛ, kɛ ya i cɔw vɛlɛ vana tɛɛmbua ɲɔɔ le ɲɛ o cɔw kon-ndo tɛɛmbuuo.

¹⁷ Lelan, ɲɛ cɔw oo ɲɛ cɔw cɔwnun pɛ le nɔm delɔɔ coo, le nɔm dɛnɛ vɔɔndo tosallo, ɲɛ cɔw kon nɔnin mayoomu le kpeku oo kpeku soli le, vana-vana kɔɔsa pɛ a nɔm o fonda kialaa n'yamaa, a mulinin ndu kɔllo mò sina maa vana kɔlvesɛiyo o co ni. Lende kɛ́ vanaa baalaa Mɛlɛka-a co ni, lende dɛnɛ sandaa fula ya o ba le nda-o co ni, Mɛlɛka soo lende ni.»