Esai 52 - BII BILA

A minginin Yerusalɛm toosiaa

¹ «Tiondu! Tiondu! Cɔn a mayoomu, nɔm Siɔn! Vownun volɔɔla nɔmnda sɔvɛ-sɔvɛlan, nɔm kobi diandaa Yerusalɛm! Kani kɔ̀ndénɔ piaandu luei lɛnin o nɔm ndo le, vana nɔɔlɛi luei lɛnin o nɔm ndo le.

² Òó Yerusalɛm! Koŋ cundu nɔmndo, mà cɛn, mà cal. Òó niaa vanaa co o biyɔɔ nin-nda, vannda Siɔn la timbi yoei niaa o labolo!

³ Kani nuaa Mɛlɛka dimi ni aa: «Fondo fúú nda pisi niaa ni, o co a vɔngu le, o venin vɛlɛ a n'voli le niaa sɔlanin baŋaa le.

⁴ Nuaa Maalii Hala dimi ni aa: «Mí vanaa niaa tuusu fɔlɔn o lɛŋnde Esipte len nin sindɛ le calle lon. O kon kɔɔli mí Asirinɔɔ saangiaa nda.

⁵ Sisa yɛ vɛlɛ niko, yɛɛ nɛ ya bɛnda yɛ mi tosa? Kani (vannda) cua yungu nuu fondo fúú a paa-kala?» Mɛlɛka ɲuna nuaa ni. «Vanaa kɔlvesɛyaa ndaa co yoondiaa.» Mɛlɛka soo nuaa ni. Diola nilan la co niinoo tɛɛmbɔnndo kpɛŋ.

⁶ Lelan, vanaa niaa sinanin diola nilan paale len, le hee, a sinanin paale len maa ya co sɔɛi ni, mi va dimio aa: Má cè ya!

⁷ Mbɔ̀ pelun kiilanɔ kon naŋ bɔɔ o pembon coo, kiilanɔ co yoongu kɔlɲuloo yondaa-o, kiilanɔ co yoongula kɛndɛlan dimio-o, kiilanɔ co yondaa a cindaa o kɔɔ-o, o co Siɔn dimullo aa: «Hala nɔmndo co masalen tosaa-o»

⁸ Diom kpalilaa nɔmnda co tueinɔnndo! A co diomndo heeloo kpélén, a co yondaa vóólun-vóólunn vellaa-velle, kani a co Mɛlɛka cɔu muungoo Siɔn a lahɔl vakpa.

⁹ Lelan, niaa bémbélan Yerusalɛm, la vɔnga latulu mì la viow kponyoo a kɔlkɛndɔɔ! Kani Mɛlɛka co vanaa ndɔa ɲɔɔloo, o co Yerusalɛm baŋaa.

¹⁰ Mɛlɛka soli ba cɔm dindin ndɔɔ-o ceen vanaa-mangalaa-isɔɔa kpow o hɔl. Vanaa co o lɛŋnden mɛɛlulan kpede-a canin cinda Hala naa.

¹¹ Niaa co ɲɛm-laandun diandan Mɛlɛka-on vilio-a, la muungu! La muungu! La faŋan nanu! La pilan ɲɛ-ɲɛ nɔɔlɛi le dɛ! La fula o kobio Babilɔn nin, la dindin fó-fó!

¹² La fula a lakil lukuluku le, la kɔa a ɲaanɔn te, kani Mɛlɛka co kɔlan niaa laci, Hala Israɛlla vanin niaa kɔɔli le niaa kandaa.

Sangala vana baala Mɛlɛka-o

¹³ Tofa vɔ vana ni baalaa, o diinin dɛnɛ mò pɛ, o sɔlanin heeloo a kuundiaa, o kɛsinnin o fonda bɛndoo.

¹⁴ Mɛɛ o yɔŋnun vana vannda taw a yɔŋ siòònde-o yɛ, hɔlaa ndɔa ve lɛ maa hɔlaa vanaciee le, ndóò ve lɛ maa vanndacieaa tɔ̀a le.

¹⁵ Lende koni o dindinin vanaa-mangalaa-isɔɔa taw o nda vesullo ni. Masaa nɔnin mɛɛ dimia ndu o hɔl te, kani a canin ɲɛ ndóò dimul nda loo, a biinin ɲɛ ndáà tui-yɔ loo bila.