Esai 51 - BII BILA

Baŋan cuavaa Abraham-nda

¹ Niaa co kiltan dɛnɛ sandaa kɔɔli-a, niaa co Mɛlɛka nuwviaa-a, la yaŋ ya nilan! La heelu hɔlla o pow kpova niaa sɛlnun nin-ndo coo, la tofa o soon yingilaa nda soli niaa nin-ndo coo.

² La yiyan-ndɔ a Abraham fuɲa niaa o kɔɔ, la loonun-ndɔ a Sara velu niaa-o o kɔɔ, kani telen Abraham va ndu pilɛ-o ya veelu ndu ni. O kon kɔɔli, mí dɔaw ndu duaa, mí tosa mó kui.

³ Nuaa Mɛlɛka co Siɔn ɲɔɔloo ni, o co ndu ɲɔɔloo le tambii ndɔɛi kpow, o siinguunin lɛŋnde veselɛile ndɔlen maa Edɛn, o minginin dɛɛla vesɛi ndɔɔ maa nakɔ ndu Mɛlɛka-o. Ɲaaloo a kɔlkɛndɔɔ vanin lenin, lisaa a diom ɲɛ-caa vanin tueinɔnndo lon.

⁴ Vanaa niaa sei, la yaŋ-ndɔ ya nilan! Vanaa-mangalaa-isɔɔa niaa sei, la tuei sɔɛi ya co dimi-e! Kani tɔŋndo fulanin o ya nin, i solinin yamɛi nii mi i va ɲɛ-tengaa le vanaa-mangalaa-isɔɔa.

⁵ Dɛnɛ sandaa nuu co nin kpɛɛlun, cinda nuu co fula ceen, bala nilan la kialunin yamɛi vannda súúlan kpow, lɛŋii co o mɛnndan tɛɛn-nde kɛsinin kɔllo ya coo, i luɛinin ya o ba bɛngu.

⁶ La heelu vɔ hɔlla o halataala, o kon kɔɔli mì la tofa lebɛngu o lɛŋnden coo! Kani halataalaa mɔɲamɔɔɲanin maa ikum, lɛŋnden le siɔŋnin maa volɔɔla cuɛinan, vanaa co icali o lɛŋnden coo-a vunin maa n'penge, kɛ cinda nuu viawnin le fɛɛn a fɛɛn, nduyɛ dɛnɛ ni sandaa fulanin mayoomu le.

⁷ Niaa sina dɛnɛ sandaa-a, niaa vanaa nɔ tɔŋ nuu o lakɔl-la, la yaŋ ya nilan! La buulan le vannda niaa bɛ̀ɛ̀lan tɛɛmbuuo le, la ɲííyà a isiòòn le vanaa kan niaa yeowlan te.

⁸ Kani a kɔwnin maa kola, mà tambu, fɛlɛkpɛkpɛa dianin nda maa kola toosian a yiiŋii saa-o, kɛ dɛnɛ ni sandaa viawnin le fɛɛn a fɛɛn, cinda nuu pɛngɛlannin le lambilan o lambilan nin.

⁹ Ba Mɛlɛka-o sei! Tiondu! Tiondu! Cuɛinun a yoomuan! Tiondu maa o palɛi sindɛ nin, maa o palɛi lambila hiow sindɛ lan nin! Vɛ̀ɛ̀ o co nɔm te tɛɛmbuu Ɲɛ yoomaa kɔndɔfili co o mɛmma ihɛllan nin-ndo le? O co nɔm te buli tambálakáà le?

¹⁰ Mò va maa o co nɔm te veeliaa mɛmma ihɛllan a mɛmma soon bɛndu co o lɛŋnden bɛngu-an te? O co nɔm te busa nɛiyo o mɛmma ihɛlma yingilan bɛngu, le vanaa sɔla baŋaa-a keiyo le?

¹¹ A toɲa, vanaa sɔla malɔɔ-a muungunin, a muungunin Siɔn a kponyoo a kɔlkɛndɔɔ. Kɔlkɛndɛ fɛɛn-fɛɛndo vanin nda coo, ɲaaloo a ɲɛ hɛnanndo hunnin sumialii nda. Kɔl tambɛiyo a somisominndan la kɔanin nda polon.

¹² Ya ni, ya co niaa ɲɔɔloo ni! Nɛ̀ɛ́-nɛ̀ nɔm co yɛ? Le yɛɛ nɛ n co yɛ siòònde yɔŋndo a vanaciee co vuo nɛ? Le yɛɛ n co yɛ siòònde a pulun Adam-ndon? Maa bil daama dɛnɛ vanacieo co ni.

¹³ Bàà ma pɔɛɛnun Mɛlɛka toosian nɔmndo, o tondu halataalaa mó kila lɛŋnden-ndo? Vɛ̀ɛ̀ ma lo ɲiiyaa a siòònde lepalaa-lepala le kɔltuw vana saangiaa n'vanndo maa mɛɛ o va o bɛɛndian le tɛɛmbuuo? Ɔ́ɔ̀ niko kɔltuw vana saangiaa n'vanndo?

¹⁴ O lo cobe mi vana co o biyɔɔ nin, o kaasoo-o sɔla malɔɔ, o vi lɛnin o soondo nin te, o fola lɛnin ɲɛdiaa ndɔɔ le.

¹⁵ Ya co Mɛlɛka ni, Hala nɔmndo pɛɛn, ya hiiluu mɛmma ihɛllan ni, ya tosa ni mí mɛnndan ma kuŋ. Diola nilan aa Mɛlɛka-Nɔ-Kpaayaa-Kpow-vo.

¹⁶ I vow sɔɔn nun nɔm o sondo, mí kuumbuu nɔm a vunduma ba nuu, telen ya va halataalaa tondɔɔ-o, telen ya va lɛŋnden kilaa-o a telen ya va Siɔn dimullo aa: «Vanaa niaa niaa co ni-o.»

¹⁷ Tiondu, tiondu se! Cɔn, nɔm Yersusalɛm, kol o taala kólaa kɔltuw Mɛlɛka-o nin, o co kon Mɛlɛka kalaa o ba-o, nɔm Yerusalɛm kol, ma cii ɲɛ va o taala kólaa hɔlaa hiŋaa nin-ndo!

¹⁸ O Cuavaa o velu-a tɛɛn-kpede, o pilɛ bɛɛ sɔlan le simndan laci le kɔlan te, o cuavaa o manda-a kpow tɛɛn, o pilɛ bɛɛ co le ndu baa saa le.

¹⁹ Sɔɔn miunndon mun tol nɔm coo: «Dɛnɛ tambɛiyo a piɔllo, yima fofolan a cɔwvo, kɛ nɛ̀ɛ́-nɛ̀ tuinun yɛnin nɔm iɲíí? Nɛ̀ɛ́-nɛ̀ ya co yɛ le nɔm ɲɔɔloo.

²⁰ Poaa nɔmnda vi diallon, a co ihini lɛ́ɛ́siɛn o nɛilan kpede dangalaa, maa kial haw o yaŋɔɔlen-ndo, kɔltuw Mɛlɛka-o co nda coo, Hala co nda kɔngɔlanndo a labɛɛla.

²¹ Lelan, yaŋ nilan ɲɛkɛndɛi o sɔɛi he nɔm (Yerusalɛm) sangaa co hoo coo-o, hɔlla co nɔm hiŋndo, kɛ o co a mamɔi le!»

²² Nuaa Maalii nɔmndo, Mɛlɛka Hala nɔmndo, o co buŋnde lɔɔnɔnndo le vanaa ndɔa-o dimi ni aa: «Tofa vɔ, i cua taala kólaa hɔlaa hiŋaa nɔm o ba, ɲɛ co o taala kólaa kɔl ni tuwvo nin-ndo, a kol-lɛnin ndu le!

²³ I sɔanin vanaa va nɔm saangiaa-a taala kólaa kon o ba, a va nɔm kan dimullo aa: «Tundun mì n hiow»-va. Mí nɔm óò siinguu kɔɔ nɔmndo maa lelɛŋ, maa nɛi keiyaa coo le vanaa hiavaa.