Esai 50 - BII BILA

Mɛlɛka soo yungu ndɔɔ le kela nda vɔɔndo

¹ Mɛlɛka soo mó ɲuna aa: «Ɔ́ɔ̀ sɛbɛ lesei ya ke kala niaa le cɔmndo maa i kɛɛ ndu o nɔ̀u nin-ndo? Te kon te, o vanaa ya nɔ kueela ndalan-nda tɛɛn, ɔ́ɔ̀ vanaa ya pisi niaa ndu o ba-o? La tuei-yɔ, le yɔŋnda vɔɔnnda niaalan niaa pisin ni. Le hakila niaalan ya kɛɛ kala niaa ni.

² Lɔ́ɔ́ ya hin-ndo, le kɔlɔ yɛɛ vana ve nanu le? Tuma ya veelu-o, le yɛɛ nɛ vana cɛl te? Mò va maa o bingi ba nuu co, mì bumba niaa baŋa ni? Vɛ̀ɛ̀ i nɔ yoomuma bɔɔ le baŋaa le? Tofa vɔ, i kɔngɔlan pɛ, i veeliaa mɛmma ihɛllan, i veeliaa peelan kokolo, suwva vi le kolɔɔ iyeemaa, a sɛ le mɛmma lepɛŋndan.

³ I kumbunin halataalaa a ɲumndan, mì cuɛi ndu a volɔɔla yuululan.

A tɛɛndan vana baala Mɛlɛka-o

⁴ Maalii Hala yɔngu ya diɛɛmule bɛnda a kaandennɔɔ len, haliko mi caa vana sanga-o yoomuan mingio o n'dial a sɔɛi nii sondoei. Idii oo idii o co nila nilan kumbio válán, haliko mi yaŋ nilan mɛɛ kaandennda yaŋ nilan o pɛɛkoo yɛ.

⁵ Mí Maalii Hala kumbi ya nilan, i simul ndu le, i poondan mì miinun a makɔɔ le.

⁶ Mí mal kɔɔ nuu vanaa va ya lɔɔ-a o ba, mí mal kuula nilan vanaa va ya siaiye suingio-a o ba. I vin vanaa va ya bɛ̀ɛ̀lan tɛɛmbuuo-a, a vanaa va ya lɔluan tufɔɔ o hɔl-la hɔlaa niaa le.

⁷ Kɛ Maalii Hala co ya malaa, lelan i tembu labɛɛ le, le kɔlɔ kon ya veesiaa hɔlaa niaa ni, kani i sina maa siɛmbula biinin ya mì cuu labɛɛ le.

⁸ Vana cɔm sandii nii-o co nin kpɛɛlun, nɛ̀ɛ́-nɛ̀ yaala yɛnin ya? N kɔnnun le kɔɔsɔɔ! Naa nɛ̀ɛ́-nɛ̀ co yɛ lakɔ kɔɔsa? Mɛɛ vana kon sɔɔnguu niko ya macɛlu!

⁹ Tofa vɔ, Maalii Hala malanin ya. Nɛ̀ɛ́-nɛ̀ nɔla yɛnin mo yaala ya kpeekpei? Nda kpow a siɔŋnin maa kola, a kɔwnin mì sɔŋndan la tɛɛmbuu nda.

¹⁰ O niaa tɛɛn, vana-vana nɔ pɛ siòòŋii Mɛlɛka-e, mɛɛ o yaŋ nilan o diom vana baala ndu Mɛlɛka-o! Vana-vana co kelaa o ɲumndan nin mì ɲɛ-tengaa va ndu pɛŋnden, mɛɛ vana kon kɔngan diola Mɛlɛka lan, mò tiindan Hala ndɔɔ!

¹¹ La tuei-yɔ! Niaa co yinnden mɛndullo-a kpow, niaa kɔɔn tuw-tuwvon co o laba-a kpow, la kɔ o yinnde niaalen a o kɔɔn niaa pila divi-on tɛɛn! Ba nuu tuisinin sangala lan niaa coo ni, la hininin o sanga niaa bɛndu-bɛndoo nin.