Esai 5 - BII BILA

Tum n'rɛsɛn Mɛlɛka-o

¹ «I co condei soli le caan ni ya kaola taw-vo, i co condei soli le can ni kon a rɛsɛn-tum ndɔɔ o kɔɔ. Caan ni ya kaola taw-vo ndóò nɔ nakɔ n'rɛsɛnndo o pembii pɔmbɔɛi tɔlɔɔ naŋ coo-e coo.

² Mó vayia ɲɔɔ, mó faaŋiaa powtan, mó tɔal tɔlɔɔ kɛndɛ-kɛndɔɔ pum lon. Mó tangul bàndóó o nakɔ n'rɛsɛn kon tɛɛn, o kon kɔɔli, mó toaw doolaa. O va tiindanndo maa nakɔ kon koamnin rɛsɛŋun kɛndɔn, kɛ mó koam rɛsɛŋun vɔɔnndon.

³ Lelan sisa, niaa Yerusalɛmnda a niaa vanpiaandua co icali o tàndá Yuda-o nin-nda, la va vanaa kialaa n'yamaa ya a nakɔ n'rɛsɛn nuu tɛɛn!

⁴ Yɛɛ nɛ ndóò lo yɛ vɛlɛ le tosaa o nakɔ nuu nin o ya tosa lenin too? Le yɛɛ nɛ ya va yɛ tiindanndo maa o co rɛsɛŋun kɛndɔn komɔɔ, kɛ mó koam rɛsɛŋun vɔɔnndon?

⁵ I co niaa niko dimul mɛɛ ya co hunɔɔ tosa a nakɔ ni n'rɛsɛn kalaa yɛ. I co kpalion suingi mì visia luɛi, mà de ndu. I co kunga ndɔɔ puusiaa, mò nɛwnun a labɛngu!

⁶ I co ndu siinguu fonda tambɛiyo, o ve lɛnin bɛɛsian te, o ve lɛnin vali tosan te, Cimbullon a hɛɛnndon co vulɔɔ lon taw. I kuunanin yumbuyumboo le piɔɔ tuisio o nakɔ n'rɛsɛn ni kon coo.

⁷ Nduyɛ, nakɔɔ n'rɛsɛn Mɛlɛka-Nɔ-Kpaayaa-Kpow-vo, ndu co cuavaa Israɛlla ni. Vanpiaandua Yuda, nda co tɔlɔɔ kɛndɛ ndóò kaola taw-vo ni. Mɛlɛka va tiindanndo maa ndáà vanin sakpo, kɛ tofa vɔ, sandii lepɛŋnde i tiw ba-ba fee. O va yiyanndo maa a tosanin dɛnɛ sandaa, kɛ a cua kafalan ma bii o lebol!»

Dɛnɛ palaa co le vanaa kɔlvesɛiya

⁸ «Dɛnɛ palaa co le vanaa co cɛilan kpɔɔndiaa-a, le vanaa co ciɛɔn handɔɔ o ciɛɔn coo háá ma cii fondaa hiɔlɔɔ kpow, le calle nda pilɛ o lɛŋnden nden nin-nda!

⁹ Diom Mɛlɛka-Nɔ-Kpaayaa-Kpow-vo, ó soo ya o lani-o co hoo ni aa: ‹A toɲa, cɛila kunda bɛndulan-ndan la piɔsinin mì la siŋnun bémbélan, vana ve lɛnin icali o cɛila kɛndɛla bɛndulan ndan nin te!

¹⁰ Vanndo vaanin bɛɛ nakɔ n'rɛsɛnndo hòólan tɔ́, mɔiyan ɲɛ-pɔmbɔ daama o sɔlanin ni. Vanndo saŋnin bɛɛ malun yɛiyon bɔlɔ sankiloo o pilɛ, kambɛiyo ca kínɛí o koawnin ni!›

¹¹ Dɛnɛ palaa co le vanaa can idii púŋ mà ɲaanun mɔima nɛyaan kɔɔli-a, le vanaa lo man kan kolɔɔ háá mì ma bii nda telen paalen le del-lo-a!

¹² O kafola ndala diaalan coo, bangalan, bondomalan, dundulan, sɛ̀ŋndan a mɔiyan tuŋ vana ca ni. Kɛ a nɔ kpeku a dɛnɛ Mɛlɛka-o le, a co dɛnɛ Mɛlɛka tosa a bala ndɔlan-ndo cɔ le.

¹³ Lelan, vannda kɔanin a vanaa niaa o cɛlen nin le tùú nda kɛɛ le ɲɛ-ɲɛ bila biyɔɔ-o. Vanaa ndaa bɛndua cuunin vu a yiaan, vanaa niaa kalaa cuunin vu kpow a bolola vesɛilan.

¹⁴ Le hee, ciee-piɔ́m cɔɔlunin bololan pɛngɛla, o kumbinin sondoo mò kɔɛnnun a pɛngɛlanndo tɛngɛ̀-tɛngɛ̀. O kon, vanaa bɛndua o kobio Siɔn nin, a sɛ́lɛ́ bɛndu vɔkɔ-vɔkɔ co lenin-ndo toalnin latulu ciee-piɔ́m telen nda vanin vɔngaa a kɔlkɛndɔɔ-o.

¹⁵ Vanaa pɔmbɔa sɔlanin piɔ́mndo, vanaa bɛndua toalnunnin siɛmbulan, mì siɛmbulan la bii vanaa kuundiannda taw-taw.

¹⁶ O kon, Mɛlɛka-Nɔ-Kpaayaa-Kpow-vo sɔlanin lisaa a yamɛi o kialunin-nde, Hala Diandaa cɔmnin diondɔɔ ndɔɔ a dɛnɛ sandaa.

¹⁷ Saa téndéa vanin billo dioo o ciee pɔm kon nin mɛ̀ɛ́-mɛ̀ɛ́ nda dia bil puiyaa yondoo nin yɛ. Mialla dianin ɲɛm tambɛi vanaa bolofaa mɛinin-ndon.

¹⁸ Dɛnɛ palaa co le vanaa co a yiyaa a hakio o còòlan dimio-a! A co yɔŋ vɔɔndo nanɔɔ a yoei maa yoei soa nan ɲɛla ɲaanannda ndalan-nde-a.

¹⁹ Nda co dimio ni aa: ‹Màá Hala keleŋa nin vali ndɔɔ tosa, maa o tosa ndu cɔ́-cɔ́ haliko mi n ce vɔ nin vali ndɔ kon a lehɔl! Mbɔ̀ dɛnɛ Hala Diandaa Israɛlla tuu hoo le tosaa-o tosan-ndɔ nin mì n sina vɔ!›

²⁰ Dɛnɛ palaa co le vanaa co dɛnɛ vɔɔndo veeloo aa dɛnɛ kɛndɔɔ-a, má va dɛnɛ kɛndɔɔ veeloo aa dɛnɛ vɔɔndo, má mangala ɲumndan ɲɛ-tengaa, má mangala ɲɛ-tengaa ɲumndan, má mangala mɔnɛi ɲɛ yeelaa, má mangala ɲɛ yeelaa mɔnɛi!

²¹ Dɛnɛ palaa co vɛlɛ le vanaa cennun nda pila vanaa kɔlkalua a vanaa sinaa dɛnɛ-a!

²² Dɛnɛ palaa co le vanaa fula tɔ́ɔ́ le mɔiyan kolɔɔ ma pialnun diolan le mɔima nɛyaa-nɛyaan muulianndo-a!

²³ Le vanaa bii luɛyɔɔninndo le vana vɔɔndo dio yɔngoo-a, a laasiaa di vanaa tɛɛmbuu isɔɔ le-a ma yaala nda-a!

²⁴ Lelan, maa mɛɛ yinnden le loam tɛwvo yɛ, mɛɛ yinnde biyaalen le loam bil vesɛiyo yɛ, lende koni puundun ndan vanin maa ɲɛ siovɛi ni, lende koni yandɔɔ ndaa saŋnunnin maa cundu ni. Kani a kɛɛ tɔŋ Mɛlɛka-Nɔ-Kpaayaa-Kpow-vo, a pɛɛsa sɔɛi O-Diandaa Israɛlla.»

Kɔltuw Hala-o

²⁵ «Le kɔlɔ kon Mɛlɛka tuulu kɔl a vanaa ndɔa ni, mó heelu ba ndɔɔ, mó lɔaa nda, mí pembon ɲiiya, mí vannda cɛɛlun, má vu, mɛɛ bil basaa va o nɛila bɛndulan demullo nuaa yɛ. Kɛ hali a kon kpow, kɔltuw Mɛlɛka-o ɲulul-lɔ le, ba ndɔɔ co vɔ o siɛndiaa le lɔɔ.

²⁶ O heelu lɛfɛ landaa le vanaa-mangalaa-isɔaa co nɛɛ levil-la, o hɔŋ hùíyé le nda veeloo nɛɛ nda co o lɛŋnden mɛɛlulan-nda. Tofa vɔ nda hunɔɔ cɔ́-cɔ́, a nɛiyo fééndà-fééndà.

²⁷ Vana-vana co o sangaa le, vana-vana co boŋiboŋi le, vana-vana co yinda le, vana-vana co malɔ le, yáwle timbin vana-vana o caŋ te, yoole lasamtale kiolu vana-vana o ipelu le.

²⁸ Kɔɔn ndan n co n'siɛɛmbiaa siembu-siembu, kpaasiaala ndalan la co lamiingaa kpow, vana ca ko buukula soa ndaa aa powtan ni, vana ca ko bɛngula ɲɛla ɲaanannda ndala soa nan-nda hiŋnɔnndo aa felenfelenndo ni.

²⁹ Vana tuɛi ko vanaa kan diom aa yàlà laandoo co kuuliaa ni. Vana tuei nda pɛ hiiliaa a yàlàà téndéa ni, a kula pɛ, a bii ɲɛ nda va mɛngɛlaa-o, a kɔɛnnun a ndu, vana-vana helu ndu nda o ba le.

³⁰ Lende o pɛɛliaanin a nda paale len ni mɛɛ mɛmma ihɛllan ma kuŋ nuaa yɛ. Vana tofa pɛ lɛŋnden paale len, ɲumndan a sangaa daama vana canin lecoo ni. Ɲɛ-tengaa kumbunnin mɔku-mɔku a kumii bɛnduei.»