Esai 49 - BII BILA

Vana baalaa Mɛlɛka-o

¹ Niaa lɛŋii co o mɛnndan tɛɛn-nde, la yaŋ nilan! Niaa co kɔɔli-kɔɔli-a, la tuei-yɔ! Kabi o violɔn nuu Mɛlɛka veelu ya ni, mɛɛ ya fula dɔ́ɔ́ kala nuu o dembe, mó ke ya diolan.

² Mó siinguu sondo nuu maa mɔɛi luɛyaa, mó siinguu ya maa kɔɛi siɛɛmbiɛi, mó kumbu ya a vunduma ba ndɔɔ, mó vian ya o bɔlɔ n'kɔɔ ndɔɔ nin.

³ Mó dimul-la aa: «Vana ni baalaa n co ni, nɔm Israɛl, o nɔm nin ya lisannin ni.»

⁴ Ya ya, mí dimi aa: «Fondo fúú ya saangian ni, le ɲɛ fondoo a ɲɛ co loo ya cii yoomuma nian ni. Kɛ dí nuu co Mɛlɛka o ba, vɔ̀ngɔ̀ nuu co o mandaa Hala nuu o ba.»

⁵ Sunsun, Mɛlɛka co sɔɛi, o toosiaa ya kabi o violɔn nuu le siŋnɔnndo vana ndɔ baalaa-o, le cuavaa Yakɔb-a mingio ndu o ibuŋ a le cuavaa Israɛlaa co vɔ a sɛŋiannda-a mingio o ndu lo-o, kani ya Mɛlɛka ke bɛɛle len ni, nduyɛ Hala nuu co yoomuma niaan ni.

⁶ O dimul-la aa: «O co dɛnɛ pɔmbɔ, le nɔm siŋnɔnndo vana ni baalaa daama, le polama cuavaa Yakɔb-a mingio toosiaa a le Israɛlaa lo vɔ yoomu-a mingio o nda lo. Kɛ handɔɔ o kon coo, i kɛsi nɔm le vaa ɲɛ-tengaa le vanaa-mangalaa-isɔɔa, haliko mi nda bɛɛ sɔla cinda nuu háá nɛɛ lɛŋnden le mɛɛlu-a.»

⁷ Mɛlɛka, vana baŋaa a O-Diandaa Israɛlla soo o vanaa nda pɛɛsa má ca nda ɲɛ fondoo-a lo, vanaa co cɛa vanaa kpaayaa-a pɛɛn, mó dimul nda aa: «Masaa canin niaa ma cɛn isisi, cuavaa lemasaa canin niaa ma baŋ vulan, le Mɛlɛka biiloo, o lo o lediom coo-o, le O-Diandaa Israɛlla, o hɛli niaa-o biiloo.

⁸ Nuaa Mɛlɛka dimi ni aa: «I mululnin niaa o telen kɛndɔɔ, o paale cindaalen coo. I malanin niaa, I mandanin niaa mì kɛsi niaa le kpemaa yiiyo a vannda, le lɛŋnden mingio simio a le kɛ́la laasian-ndan mingio piɔwvo.

⁹ Le vanaa co o biyɔɔ nin-nda dimullo aa: «La fula le vanaa co o ɲumma kaasoan nin-nda dimullo aa: «La fula nɛɛ vavonnda!» A dɔawnunnin balo o nɛilan demullo, a saalunnin bil puiyaa o dúkúdúkùla puleelan kpow coo.

¹⁰ Yima venin nda coo le, bolola vesanin nda le, yelenyelenndo a paalen le saangiaanin nda le, kani vana nɔ ɲíí ndɛi-yo simnin nda laci, o kɔanin a nda o peela leboltan.

¹¹ I siinguunin pembun nun kpow nɛila bɛndulan, nduyɛ nɛila nilan la vanin lapeelaa tɛlɛlɛ.

¹² La tofa vɔ nda, a cɛn nɛɛ levil ma va hunɔɔ, a pum co hunɔɔ fulaa a ba luaŋ-ndo, a ba paalen le del-lo, a pum co hunɔɔ fulaa o lɛŋnde Sinim-nden nin.

¹³ Niaa co o halataala-a, la dɔwnun ɲaale! Niaa co o lɛŋnden coo-a, la va o kɔlkɛndɔɔ nin! Niaa pembon, la deŋi kpélén a kɔlkɛndɔɔ! Kani Mɛlɛka co vanaa ndɔa ɲɔɔloo, ɲííye bii ndu le vanaa ndɔa co o kuɛi nin-nda.

¹⁴ Vannda Siɔn va dimio aa: «Mɛlɛka mal naa, Maalii pɔɛɛnun naa pɔ́lì!»

¹⁵ Vɛ̀ɛ̀ vanalanɔ komsaa nɔla pá mò pɔɛɛnun cɛlɛkpɛ o co vɔɛsio-o? Vɛ̀ɛ̀ ɲíí bii ndu a hɔ́ɔ́ o solin o ipulu-o le? Hali ndóò va bɛɛ maa komsaa nɔla mò pɔɛɛnun cɛlɛkpɛ ndɔɔ, ya ya, i pɔɛɛnunnin niaa co Siɔn-nda le few!

¹⁶ Kani la tofa vɔ, i sɛva niaa o bala nila kɔltan coo, kpakila niaalan la co ya o hɔl telen oo telen.

¹⁷ Vanaa cɔw kobio Siɔn-nda co hunɔɔ fili-fili, vanaa tɛɛmbuu kobi niaa kon ma pial ndu-a faŋannin lenin ma kɔɛ.

¹⁸ La heelu vɔ hɔlla mì la tofa fonda balu niaa-o, a co cuungianndo kpow, a co hunɔɔ o kobio ho nin. I co yoomu! Ya Mɛlɛka dimi lende ni. Nɔm kobio Siɔn, a cuɛinunnin vanaa kan maa volɔɔla cuɛinan. A bɛlibɛlinnin nda mɛɛ vana holiholin vanalanɔ n fula kɔɔli le nɔu-vo yɛ.

¹⁹ O fondala nɔmndaa tambu mí láà lonnun fondolan nin, o lɛŋnde nɔmndee tambu len-nden nin, cuavaa nɔmnda pianin ma hiow fondaa polon, vanaa va nɔm tɛɛmbuuo-a kɔannunnin polon.

²⁰ A tuɛinin vɛlɛ cuavaa hɛlun nɔm paandu-a dimio nɔm o lani tuŋ-tuŋ aa: «Fondaa dɔɔnan bɔɔ le naa, cɔɔlu naa fondaa, haliko mi n cal fɛkɛi!»

²¹ O kon, nɔm pila ɲunannin o kɔl nin aa: «Nɛ̀ɛ́ vilul lɛ ya cuawva ha nɛ? Kani i vannun ya pilɛ kpé, yáà nɔ n'cuaw le, bɔlɔkɛɔ daama ya vannun ni. O lekáá ya vannun ni, i va o kɛyaa few-few, mì nɛ̀ɛ́ manda yɛ niko cuawva ha? Yaa lonnun ya pilɛ doolɛ, kuɛɛ nɛ haa va yɛ?»

²² Nuaa Maalii Hala dimi ni aa: «Tofa vɔ, i siɛndinin ba nuu o vanaa-mangalaa-isɔɔa lo, mì baŋ lɛfɛ landaa nuu o vanaa súúla celennda lo, o kon a hunnin a poaa nɔmnda o bala ndalan coo, a hunnin a cuavaa niaa laandua o lacongú.

²³ Masaa vanin vanaa dɔavaa baloa nɔmnda ni, cuavaa ndaa laandua vanin vanaa mandaa n'cuavaa nɔmnda ni, a baŋnin vulan nɔm o labɛngunin mà deli a kuumbuan o kɔl coo nɔm o labɛngunin. A deembuunin cundu vanin nɔm o n'pelu-o. O kon nɔm pila sinanin maa ya co Mɛlɛka ni, maa siɛmbula biinin vanaa tiindan ya-a le.

²⁴ Ɲɛ kuubanɔɔ bii-o nɔla pá mò puunun ndu o ba? Vana masa kɔlvesɛiyo bii-o nɔla pá mò hɛlun?

²⁵ Mɛlɛka dimi aa: «Oi! Ɲɛ kuubanɔɔ bii-o puununnin ndu o ba. Vana masa kɔlvesɛiyo bii-o hialunnin ndu. I cɔlɔbanin yaamɔaa nɔmnda mì ciindiaa poaa nɔmnda.

²⁶ I miaanin vanaa dɔw nɔm yɛɛvɛ-a visin ndan nda pilan ma de mun, a kolnin kooma ndan mi ma bii nda, mɛɛ mɔima yɛngian ma bii vana yɛ. O kon, vanndacieea yoomaa kpow sinanin maa ya co Mɛlɛka ni, vana nɔm ciindiaa, vana nɔm baŋaa, Vana Kpaaya Yakɔb-o pɛɛn.