Esai 47 - BII BILA

Babilɔn tambu labɛɛ

¹ Niaa vannda Babilɔn sei, la cɔn mì la tol, mì la cal o cundoo nin lɛŋ! La cal lɛŋ vɔyɔn, niaa Kaldea, kani masalen le hɛlun niaa. A veelu lɛnin niaa aa: «Vanaa kɔlkɛndɛa a vanaa vannda yeema yeemaa bɛndoo-a le.»

² La cua cieon a sunndan mì la cu kpeyanndo, mì la faŋan kolala vaan-vaanndan o hɔl, la heelu bɔɔla domala niaala bɛndulan, la kpeeŋa kolalan o lɔlula niaalan coo le peelan taŋɔɔ!

³ La fulanin tumnda fondo kpendekele, mì la tambu labɛɛ kpede. I minginin màá nuu, i kpakpalanin vana-vana le.

⁴ Vana naa baŋaa diolan aa Mɛlɛka-Nɔ-Kpaayaa-Kpow-vo, O-Diandaa Israɛlla.

⁵ Lelan niaa Kaldea, la cal mì la mei kpili, la kɔ o ɲumndan nin! Kani a veelu lɛnin niaa aa: «Vanaa bɛndua co masɛi bollen nda» le.

⁶ Yáà tuulu kɔl a yungu nuu, mí yáà laasiaa kɛ́ nuu, mí yáà mal yungu ni kalaa niaa o ba. La tosa iɲíí a nda le, mí la saangiaa vanaa yuuvɛiya taw a kpaayaa niaa.

⁷ La va dimio aa: «Le fɛɛn a fɛɛn vanaa bɛndua naa n co ni!» La yiyan o sɔɛi ken coo le, la yiyan a mɛɛ dɛnɛ kon ndóò mɛɛlunin yɛ o kɔɔ le.

⁸ Lelan, la yaŋ niko nilan, niaa vanaa vannda yeema haa yeema bɛndoo-a, niaa co icali a tiindanndo-a. La co dimio o kɔlta niaalan nin aa: «Naa koni mɛnnde sɔɔ toal o hɔl ni, vana celen co ɲɛ le fɔ naa! N viinin n'laandu, te kon te n'piaandu le, N viinin vɛlɛ n'cuaw le fɛɛn a fɛɛn te!»

⁹ Kɛ kpundɛla sala tiɔnnda lan la toalnin niaa coo o lepilɔɔ o paale pilɛlen nin, mì la vii cuawva, mì la vii vɛlɛ vanaa niaa co o nɔ̀lan-nda. Hali la nɔ bɛɛ kueilen, mì la caa mangalaa taw, kpundɛla lan la toalnin niaa coo cili.

¹⁰ Kɔlvesɛi niaa niáà laalan ni, la va dimio aa: «Vana-vana co naa cɔ le!» Kɔlkalu niaa a dɛnɛ sinaa niaa hiŋ niaa hɔlla. La va dimio o kɔlta niaalan nin aa: «Naa koni mɛnnde sɔɔ toal o hɔl ni, vana celen co ɲɛ le fɔ naa!»

¹¹ Kɛ dɛnɛ palaa toalnin niaa coo, la nɔlanin ndu kpakpalaa le, kpundɔɔ toalnin niaa coo la sinanin mɛ̀ɛ́-mɛ̀ɛ́ niaa tosanin te. Sanga bɛndu niaa ve kɔl too komalnin niaa fúkù-fùkù o lepilɔɔ.

¹² La lo o mangalala niaalan coo a o kueile niaale bɛndu-bɛndulen nin. Le kueile len a mangalala lan niaa co baalaa tosaa kabi o felengiyɛi niɛi nin ni, bɔɔle la sɔlanin tɔnɔɔ lenin, bɔɔle la siŋnunnin kpúlúnkùmaa lenin.

¹³ La saangian o yavalan vimio nin, vanaa sina kan lavàà o halataala-a, a cɔn niko mà ciindiaa niaa! A co kan hɔlla keeliaa o halataala ma va loeon mɛɛndianndo, ma va ɲɛ hun yɔŋnunnin-ndo dimio a paangun sɛnɛiyon o kɔɔ-a a baŋa niaa niko!

¹⁴ La tofa vɔ, maa ifoeen nda co ni, yinnden le co nda hunɔɔ lomɔɔ kpúlúká, a nɔlanin yoomu ndaa tuiŋio o yinnden nin te. O venin yinnde ladɛngul le ɲɛ tuɛyɔɔ le, o venin vɛlɛ yinnde vana cal ikɛi le hangɔɔ le.

¹⁵ Lende dɛnɛ vanaa niaa va haa sangaa le nda sɔɔnguuo ikɛi, le nda isɔɔ ɲuna-a vanin ni. Vanaa niaa va kan yulalen tosaa latulu, kabi o felengiyɛi niɛi nin-nda, a sɛŋinnin mì vana-vana kɔɛ kpengii ndɔ. Vana-vana venin le niaa mala le.