Esai 46 - BII BILA

Piɔmnda Babilɔn a Mɛlɛka kpeekpeiyo

¹ Piɔmndo Baal del mó pimbul, piɔmndo Nebo komba vúlù-vùlù! Piɔmaa kan siŋnun le visia a le cɔlua bɛndua. Piɔmaa niaa pila va kan siilɔnndo-a, la tofa vɔ mɛɛ nda co cɔlua sanga-a kindilaa a lusul ndaa yɛ!

² A del ma pimbul latulu, a nɔla volɔɔla lusula ndalan cɛwcɛw le, nda pila co kɔlan o biyɔɔ nin.

³ Niaa polale Yakɔb len, la yaŋ ya nilan, niaa lo yoomu o cɛi Israɛl-lo nin-nda kpow, niaa ya cua kabi o kandɔɔ tasoo, mí la va ya o bɛngu coo-a, niaa ya bɛsi kabi o violɔn niaa-a, la yaŋ nilan!

⁴ Ya Mɛlɛka, i lonin mɛɛ ya co yɛ háá a yuuvɛi niɛi, mì lo niaa malaa háá mì yulunnde vil niaa. Kabi paandu lende ya tosa ni, i yeema vɛlɛ mi cua niaa, mì manda niaa, mì soli niaa lenin.

⁵ A Nɛ̀ɛ́-nɛ̀ kpeekpei niaa tuu yɛnin ya, mì la siiman ndu a ya? Nɛ̀ɛ́-nɛ̀ niaa ce yɛ velan nuu o n'dial, haliko mi la tuu ya a ndu?

⁶ Vannda pum co sianion solio o bɔlɔla ndala pɔmbɔlan nin, a co volion tuuvo o ɲɛ tuvaa coo, a co vana teengiaa n'volio salaa, le nda piɔmnda cowvo a ɲɛm mun. O cɔw pɛ, a baŋ vulan piɔm kon o labɛngunin, a sooluu ndu.

⁷ O kon kɔɔli, a cua hala nda kon, a handun ndu o lacongú, a kɔ kɛsi ndu o fondaa pum o lo lon. Kpeŋanndo bɛɛ o nɔla o fonda ndɔ nda kɛsi ndu-o coo le taanin! Yondaa ko nda yonda ndu o lani ni, kɛ o kuŋ te o soli le, o nɔla vana baŋa mò soli ndu o dɛnɛ palaa nin te!

⁸ La loonun a sɔɔn mun, mì la sim yili. La muungu o niaa pila nin, niaa vanaa lahakia ha!

⁹ La loonun-ndɔ a sɔɔn tosan sindɛ pɔ́-pɔ́-on. Kani ya co Hala ni, o celen co le. Ya co Hala ni, vana-vana siiman a ya le.

¹⁰ O kandɔɔ tasoo pɔ́ ya dimi ɲɛ co hunɔɔ yɔŋnɔn-ndo ni, o tasendɔ pɔ́-pɔ́ ya dimi ɲɛ peelun-ndɔ loo ni. Ya dimi ni aa tuu nuu peelunnin lekɛ́ndɛi. I tosanin hɛnan nuu kpow.

¹¹ Ya veelu yow biyaa ni, fulaa a ba paalen le can-ndo. Ya veelu langbanɔ kɛsii kálàá pum fulaa nɛɛ levil le hunɔɔ tuula nilan peeloo ni. I dimi sɔɛi ken a sondo, nduyɛ i peelunnin ndi vɛlɛ. I cii tuu, lelan fɔ mi tosa lende.

¹² Niaa vanaa nila kalua ha, niaa co yaamɔaa dɛnɛ saandaa-a, la yaŋ nilan.

¹³ I co dɛnɛ sandaa nuu nanɔɔ macɛlu, o co lɛ levil te, cinda nuu tamalanin le tiiyaa le. I kɛsinin cindaa Siɔn mì tuisi biilu nuu Israɛl coo.