Esai 45 - BII BILA

Vana baŋaa hunnin

¹ Mɛlɛka soo o vana o pɔla-o lo, Siris pɛɛn, o ndu Mɛlɛka bii a ba kɛndɔɔ le vanaa-mangalaa-isɔɔa yɔlɔɔ ndu laci, le yáwve timbio masaa o caŋ, le ndu diola luɛyaalan kumbillo haliko la kindan ndɛ loo. O dimul ndu aa:

² I kɔanin nɔm laci, mì siimian nɛila kei o dúkúdúkùlan coo lan, mì pesi koŋnda n'daɲalan, mì yimi sɔkɔma n'cilinndan.

³ I yɔngunin nɔm bolofaa viannanndo a ɲɛ-sɔlaa co o kumbaa kpíŋ-ndo, haliko ma sina maa ya co Mɛlɛka co nɔm veeloo a diola nɔmndan ndo ni, Hala cuavaa Israɛlla pɛɛn.

⁴ Le kaola ya kaola nɔm Yakɔb, vana ni baalaa-o, le Israɛl vana ni ya hɛli-o, mí veelu nɔm a diola nɔmndan, mí soaa o nɔm ndo a canyɛi telen nɔm óò sina vɔ ya loo.

⁵ Ya co Mɛlɛka ni, o celen co le, o ya kɔɔli, Hala celen co le, nɔm óò sina vɔ ya le mí balu nɔm sɔ́,

⁶ haliko kandɔɔ a ba paalen le can-ndo kɔlan tiiyaa a ba le del-lo, mì vana-vana sina maa o ya kɔɔli, Hala celen co le few. Ya co Mɛlɛka ni, nduyɛ o celen co le.

⁷ I toosiaa ɲɛ-tengaa, mí cɔaw ɲumndan. I yɔngu dɛnɛ kɛndɔɔ, mí cɔaw dɛnɛ vɔɔndo. Ya Mɛlɛka, i tosa ɲɛm mun kpede.

⁸ Màá halataalaa cucu dɛnɛ sandaa cɔnɔnndo coocoo mì yumbuyumboo tuisi ndu pɔlɔpɔlɔ! Màá lɛŋnden le kumbin mì cindaa pui, mò tiw tɛ́ngɛ̀-tɛ́ngɛ̀, mì dɛnɛ sandaa vil vɛlɛ o telen pilɛ kon bɛngu! Ya Mɛlɛka, ya co ɲɛm mun toosiaa ni.»

Vana cɔw ɲɔɔ-o nda ɲɛ o cɔw-vo

⁹ Dɛnɛ palaa co le vana-vana sɛɛngiaa vana cɔw ndu-o! Nɔm, a co macoaa maa kpɛɛnɛi puuluei o kpɛɛnɛn puulon taw tɛɛn! Puulu cɔavaa n'kpɛnɔɔ nɔla pá mò dimul vana co ndu cɔvɔɔ-o aa: «Yɛɛ nɛ n co yɛ hoo tosaa?» Vɛ̀ɛ̀ ɲɛ o cɔw-vo nɔla mò dimul ndu aa o nɔla baala le?

¹⁰ Vana-vana ɲuna pɛ fuɲa ndɔ aa: «Yɛɛ nɛ n velu yɛ hoo?» Te kon te mò ɲuna kala ndɔ aa: «Yɛɛ nɛ n velu yɛ hoo o ceendo coo?» Mɛɛ dɛnɛ palaa co le vana kon!

¹¹ La tuei-yɔ mɛɛ Mɛlɛka, O-Diandaa Israɛlla a vana cɔw nda-o soo yɛ: «Bàà vana co, o yeema mò ɲuuniaa ya a siɔdii lacio o kɔɔ-o? Vana co lon o yeema mò yɔngu ya tɔŋndan o cuavaa niaa coo-o, a bala nilan la cɔw-va?

¹² Ya cɔw lɛŋnden ni, ya pila cɔw vɛlɛ vanacieo lecoo ni, ya ni, bala nilan la tondu halataalaa ni, ya pila toosiaa kpaayala co lenin-ndan kpow ni.

¹³ Ya pila cua Siris o sandii nii nin ni. I peelunin nɛila ndɔlan kpede. O minginin kobi nuu tangul, mò ke vanaa niaa co o cɛlen nin-nda hɔ́ɔ́yɛi. O venin a bɔnɔ le, o venin vɛlɛ a ɲɛ-sɔlaa le.» Mɛlɛka-Nɔ-Kpaayaa-Kpow-vo soo lende ni.

Mɛlɛka dimi ɲɛ-ɲɛ o vionnɔn nin te

¹⁴ Mɛlɛka dimi aa: «Ɲɛ-sɔlaa Esipte, tɔnɔɔ Etiopii a bolofaa vannda Saba, a bandu kan taw-va o hiawnin nɔm o ba, mò siŋnun ɲɛ nɔm kɛsɛ-kɛsɛ. Vanaa kan kɔanin nɔm kɔɔli, a kɔanin a yiyaa o yɔlɔn, a baŋnin vulan nɔm o labɛngunin ma dimul nɔm a tɛɛlɔnndo aa: «Nɔm ikɛi kínɛí vana saalun Hala ni, nduyɛ, Hala celen co o ndu kɔɔli le.»

¹⁵ Éé Hala, lekɛ́ndɛi Hala vianunnun-ndo n co ni. Hala Israɛlla a vana ciindiaa n co ni!

¹⁶ Siɛmbulan la bii vanaa cɔavaa n'piɔmnda ma yɔŋnun laasi-laasi, a co kɔnndan a bɛ̀ɛ̀la nda tambu lan mɔ́ɔ̀yɔ̀ɔ̀.

¹⁷ Mɛlɛka o ba Israɛlla sɔla cindaa ni, cinda co le fɛɛn a fɛɛn-ndo. Le fɛɛn a fɛɛn, siɛmbula biinin niaa le, la tembunin labɛɛ le.

¹⁸ Kani nuaa Mɛlɛka soo ni, o cɔw halataalaa-o, o co Hala ndu pilɛ kpé-o, o toosiaa lɛŋnden mó bɛɛndiaa len, mó simi len yili-o, o cɔw len haliko le va fondo loo, o cɔw len haliko mi vanndacieea va icali lecoo-o, mó dimi aa: «Ya co Mɛlɛka ni, o celen co le.

¹⁹ I suu o vionnɔn nin te. I suu o kolokolo yifidii nin o lɛŋnden coo le. I dimul cuavaa-imamaa Yakɔb-a le ya nuwviaa o fondo fúúo coo le. Ya Mɛlɛka, ɲɛ co toɲaa-o ya dimi ni, ɲɛ co sakpo-o ya yonda ni.»

Mangalan vanaa-mangalaa-isɔɔa

²⁰ La cuungian nɛɛ pilɛ mi la hin, la sɔɔnguu diom pilɛ, niaa vanaa lo yoomu o vanaa-mangalaa-isɔɔa tɛɛn-nda! Vanaa co piɔmaa ndaa iyɔmnda vilio-a a nɔ kɔlkalu le. Kani hala nda co piɛiyo-o nɔla vana ciindiaa le.

²¹ La cɔm le sabu niaa co ken tosaa-o, la kɔɔsa mì la cɔm le kɔlɔ kon. La kɔ tundu mì la yɔngan kɔlkalulan vella-velle! Nɛ̀ɛ́-nɛ̀ dimi yɛ kabi o kandɔɔ maa sɔɔn mun co hunɔɔ tosan? Nɛ̀ɛ́-nɛ̀ yonda yɛ a mun o kɔɔ kabi lɔ́ɔ́ levil? O co ya Mɛlɛka le? Hala celen co le, mɛɛ ya, ya pilɛ kpé co Hala sandaa a Hala ciindiaa vana-o ni.

²² Lelan la mulin mì la hin ya o ibuŋ, o kon la sɔlanin cindaa, niaa co o lɛŋnden mɛɛlulan-nda kpow! Kani ya co Hala ni, Hala celen co o ya kɔɔli le.

²³ I mɛnan a ya pila, toɲaa co fulaa ya o sondo, nduyɛ sɔɛi fula ya o sondo-e i sandu, sɔɛi ken i feŋan lecoo le: vulan kpow la baŋnunnin ya o labɛngunin, diɛɛmuei kpede i mɛnannin o diola nilan.

²⁴ Vannda diminin a ya o kɔɔ aa: «O Mɛlɛka nin ndu pilɛ kpé sandei a yoomuan ma co ni.» Vanaa tuulu kɔl a ndu-a kpow a hunnin háá o ndu lo a siɛmbulan.

²⁵ Cuavaa-imamaa Israɛl-la kpow sɔlanin dɛnɛ sandaa a bɛɛlen Mɛlɛka o ba.