Esai 41 - BII BILA

Vana ciindiaa co o nɛi

¹ Niaa vanaa co o lɛŋii co o mɛnndan kɔngɔ-e nin-nda sei! La mei-yɔ kpili, mì la yaŋ ya nilan! Vannda bɛnda mà sɔla yoomuma sɛnɛi, mà sɔɔnguu, o kon mà soo! N sɔɔngun latulu le kɔɔsɔɔ.

² Nɛ̀ɛ́-nɛ̀ soli yɛ vana cindaa co kɔlan kɔɔli a ba paalen le can-ndo-o? Nɛ̀ɛ́-nɛ̀ mal lɛ vanaa-mangalaa-isɔɔa ndu o ba mó kɛsi ndu masaa o labɛngunin? Mɔɛi ndɔɛi cɔwve co vannda cuiyo ndu laci maa cundu, kpaasiaa ndɔɔ co nda saŋɔɔ mɛɛ hoeiye saŋ foeende nuaa yɛ.

³ O co nda kiltan kɔɔli mò va nda keiyo tɛɛn, kɛ ɲɛ-ɲɛ vɔɔn co ndu yɔŋnɔn te, pelun ndɔn n co bɛɛ tiiyaa lɛŋ te!

⁴ Nɛ̀ɛ́-nɛ̀ tosa yɛ dɛnndan ndan? Nɛ̀ɛ́-nɛ̀ tosa yɛ lende? Ndu veelu lambilan kabi o kandɔɔ-o ni. Ya Mɛlɛka ni, ya va o tasoo a lambila taselan ni. Ya koni vanin vɛlɛ a la mɛɛlaalan ni.

⁵ Lɛŋii co o mɛnndan kɔngɔ-e ce ndu mí i va ɲiiyaa a siòònde. Vanaa co lɛŋnde mɛɛlu-a co ɲiiyaa, a co sɔɔnguuo macɛlu, a co hunɔɔ.

⁶ A co maalianndo vellaa-velle, vana-vana co caan ndɔ dimullo aa: «Kindikindin dɛ!»

⁷ Vana sialaa n'piɔmndo co vana teengiaa n'sianio yoomuan lueiyo. Vana co ɲɔɔn kpɔlɔkaa a káángoo-o co vana co cilinnde lɔɔ o pow lesumndo coo-o yoomuan lueiyo. O co dimio a ciliŋun nda teengiaa ma hol nɛɛ pilɛ-on o kɔɔ aa: «Vali kɛndɔɔ co hoo ni.» O co piɔmndo baŋɔɔ a pɔɔndɔn yɔŋii o hiilun.

Mɛlɛka baŋa cuavaa Israɛlla

⁸ «Le nɔm Israɛl-lɛ, nɔm Yakɔb ya hɛli-o, nɔm polale Abraham ya kaola len.

⁹ Nɔm ya cua o lɛŋnden mɛɛlulan-ndo, nɔm ya veelu fulaa nɛɛ levil-lo, nɔm ya dimul ni aa vana baala nuu n co ni. I hɛli nɔm, i melnin nɔm te!

¹⁰ Yɔŋ isiòòn te, kani i co nɔm ikɛi, mɛɛndian ɲalaku-ɲalaku a buulanndo le, kani ya co Hala nɔmndo ni. I lueinin nɔm yoomuan, i co nɔm mala, i malanin nɔm a ba ni kɛndɛ kpaaya bɛndoo.

¹¹ Tofa vɔ, vanaa co nɔm simullo-a kpow, siɛmbulan la biinin nda mà tambu labɛɛ. Vanaa co sɔngɔlan a nɔmnda kpow siŋnunnin ɲɛ fondoo, mà cuu itambu faw.

¹² A nuwviaanin nda, kɛ a seelun ndɛnin nda le, vanaa va sɔngɔɔ nuwviaa nɔm o n'dial-la pɛɛn. Vanaa va nɔm delɔɔ coo a cɔwvo-a siŋnunnin ɲɛ fondoo, a venin ɲɛ-ɲɛ le nɔm te.

¹³ Kani ya co Mɛlɛka ni, Hala nɔmndo pɛɛn, ya co ba nɔm kɛndɔɔ yoomuan lueiyo ni, ya co nɔm dimullo ni aa siòòŋii bii nɔm te! I co nɔm sɔɔnguuo ikɛi le nɔm malaa.

I co hunɔɔ nɔm mala

¹⁴ Lelan, la yɔŋ isiòòn te, niaa londopoloa pɔmbɔa Yakɔb-a ha. I co niaa Israɛlla sɔɔnguu ikɛi mì mala niaa.» Mɛlɛka dimi lende ni, O-Diandaa Israɛlla, vana niaa baŋaa pɛɛn.

¹⁵ «Tofa vɔ, i siinguu niaa maa ɲɛ ɲaanan soa nan-ndo, o sɛnɛiyo, o nɔ ciliŋun siɛɛmbian n tivaa kpow-vo. La pesinin pembun bɛndon mi la vɔɔciaa mun, la siinguunin pembun pɔmbɔn maa ifoeen.

¹⁶ La hɛinin mun mì hoeiye kɔndu mun, mì hoeyii felenfelennde saŋ mun fásàn. Kɛ niaa, la dɔawnunnin ɲaale o Mɛlɛka nin, la biilu O-Diandaa Israɛlla.

Lɛŋnde polten le muungunin peela leboltan

¹⁷ Vanaa bala fondoa a vanaa ikɔɔa co mɛnndan nuwviaa, kɛ ma co le. Diɛɛmuei co nda vesaa o lasondo a kolɔɔ iyeemaa. Ya Mɛlɛka, i kenin nda (mɛnndan), ya Hala Israɛlla, i melnin nda le.

¹⁸ I bulinin peela bɛndulan o pembon coo, peela leboltan la fulanin o bóltan nin. I siinguunin lɛŋnde veselɛilen dalaa, mì siinguu lɛŋnde mɛmma co nin te len peelan kposon.

¹⁹ I tɔalnin yɔmii sɛɛdre, akasia, mirte a oliviee o lɛŋnde veselɛilen nin. I tosanin mì yɔmii siprɛs, ɔrme a buis vil o dɛɛlala vesɛila niŋ tɔlɔɔ le lan nin,

²⁰ haliko ma mɛɛndan, ma ce ma sina, ma bii bila maa ba Mɛlɛka-o tosa dɛnnda lan ni, maa O-Diandaa Israɛlla co vana tosa lan-ndo ni.»

Hala tuisi vanaa bilaa n'piɔmnda siɛmbulan

²¹ Mɛlɛka dimi aa: «La cɔm ɲɛ niaa niaa sina-o!» Masa Yakɔb-o dimi aa: «La kɔɔsa a taan le niaa pila cɛwnɔnndo.

²² Màá a soli sɔɔn mun ceen kpendekele, ma dimul naa ɲɛ hun yɔŋnunnin-ndo! Ɔ́ɔ̀ dɛnnda niaa dimi sindɛ maa la co hunɔɔ yɔŋnɔn-ndan? La cɔm naa lan haliko mi naa bɛɛ n va lehɔl o nɛi, te kon te mi n sina mɛɛ sɔɔn mun peelunnin yɛ. Te o co kon te, mɛɛ la dimul naa ɲɛ hun yɔŋnunnin siɔdii laci-o.

²³ La dimi ɲɛ yɔŋnunnin siɔdii laci pɔ́-pɔ́-o, haliko mi n sina te halaa niaa co lekɛ́ndɛi ni. La tosa vɔ dɛnɛ kɛndɔɔ te kon te dɛnɛ vɔɔndo, haliko mi n mɛɛndan ndu mi siòònde bii naa latulu.

²⁴ Bɔkɔtɔ! La co ɲɛ-ɲɛ le mbɔ̀! Vali niaa kpow, fondo fúú o co ni. O co dɛnɛ nɔɔlɛi bɛndu le niaa hɛlio!

²⁵ I cua vanndo pum o lɛŋnde maluaŋlen nin mó hun nanu. O co ya diolan veeloo nɛɛ paalen le can-nda dí. O co vanaa kpaayaa nɛwvo a labɛngu maa looli, maa puulu bɔ́w vana cɔavaa n'kpɛɛnɔɔ co nɛwvo-o.

²⁶ Nɛ̀ɛ́-nɛ̀ dimi yɛ kabi o kandɔn tasoo maa dɛnɛ kon hun tosanin, haliko mi n sina ndi? Nɛ̀ɛ́-nɛ̀ yonda yɛ a ndi o kɔɔ kabi paandu pá, haliko mi n dimi aa toɲaa i co ni? Vana-vana co ndi yonda le, vana-vana co ndi dimi le, n co bɛɛ niaa diom tueyɔɔ le.

²⁷ Kɛ ya yɔŋnun vana tasoo, le vannda Siɔn dimullo ni aa: «La tofa vɔ nda! La ce nda! Ya yɔngu Yerusalɛmnda kiilanɔɔ ni, kiilanɔ kon yoo nda yoongu kɛndɔɔ ni.

²⁸ I tofa, kɛ hali vanndo ndu pilɛ o co cɔ le. O nda tɛɛn, vana-vana co sɔɛi vana sila vana dimi le, hali i ɲuna nda bɛɛ a mulinin te.

Vana baala Mɛlɛka-o

²⁹ Tofa vɔ, nda kpede ɲɛ fondoo fúú nda co ni. Dɛnnda ndalan kpow la co ɲɛ-ɲɛ le. Hoeiye a ɲɛ fondoo piɔmaa ndaa co ni.