Esai 40 - BII BILA

BUNGƐI DIINNDƆƐI: ISRAƐLLA SƆLA ƝƆƆLOO (40—45) Mɛlɛka yii kpemaa le cuavaa ndɔa baŋaa

¹ Hala niaa dimi aa: La ɲɔɔlu vanaa niaa! La tamala le dɛ!

² La soo Yerusalɛmnda o kɔl, mì la yonda nda o lani, mì la dimul nda aa cɛle ndalen le cuu, a sɔla baŋaa a haki ndaa, o sɔla sala hakila ndɔlan kpede Mɛlɛka o ba!

³ Diomndo pum co yondaa aa: «La tɛɛnuu nɛi Mɛlɛka-o o lɛŋnde veselɛilen nin, la siimian nɛiyo peeloo le Hala niaa o fondala vesɛilan.

⁴ Bóltan kpow la bɛnda mì la peelun tɛlɛlɛ, pembun bɛndon a pembun pɔmbɔn kpow n bɛnda mì muungu dɛngbɛlan, mì dúkúdúkùlan la siŋnun dɛɛlalan, kpolonnda sɔɔkɛɲɛɛlan la bɛnda mi la siŋnun bólta toangaalan!

⁵ O kon, biilu Mɛlɛka-o fulanin ceen, o telen pilɛ kon, vanndacieea kpow canin ndu. Kani Mɛlɛka o sondo sɔɛi he fula ni.

⁶ Diomndo pum co dimio aa: «Tɛɛnguu yoongoo!» Mí ɲuna aa: «Yoongu yɛɛ nɛ ya tɛɛnguu yɛ?» Vanndacieea kpede maa bil nda co ni, naŋɔɔ ndaa kpow, maa yandɔɔ bil co yondoo nin-ndo o co ni.

⁷ Te hoeyii Mɛlɛka-e hɔŋ pɛ o bil kon coo, o vesa, yandɔɔ ndɔɔ cɛɛlun. Lekɛ́ndɛi, maa billo vanndacieea co ni.

⁸ Billo nɔla mò vesa, mì yandɔɔ ndɔɔ cɛɛlun, kɛ sɔɛi Hala naa ndi vanin o fonda ndɔɔ le fɛɛn a fɛɛn.

⁹ Niaa vannda Siɔn, la hel o pembii vilɛi-vilɛiye coo le yoongu kɛndɔɔ yondaa. Niaa co Yerusalɛm-nda, la deŋi a yoomuma niaan kpow le yoongu kɛndɔɔ yondaa. La heelu diomndan, la yɔŋ isiòòn te. La dimul kobilan o tàndá Yuda-o nin aa: «La tofa vɔ Hala niaa!»

¹⁰ La tofa vɔ, Maalii Hala co hunɔɔ a kpaayaa, ba ndɔɔ co vanabɛnduyɛi ndɔɛi cɔmndo, la tofa vɔ ndu hunɔɔ a sala ndɔɔ o ba, vɔ̀ngɔ̀la ndɔlan la co ndu laci.

¹¹ O yaanin cɔlua ndɔa diólan maa vana mandaa n'cɔlu. O cuanin saa téndéa o balan coo mò handun nda o ibuŋ, o simnin saa komsaa co vɔɛsio-a laci.

Bɔɔbɔɔyɛi Mɛlɛka-e

¹² Nɛ̀ɛ́-nɛ̀ tuunun yɛ mɛmma ihɛllan o ba kɔllo nin? Nɛ̀ɛ́-nɛ̀ tuu yɛ bandei a tongii halataalaa a baa piasaa? Nɛ̀ɛ́-nɛ̀ tuu yɛ cundoo o lɛŋnden coo o bonyii puuluei nin? Nɛ̀ɛ́-nɛ̀ landu yɛ pembon o bawvo le lusu ndɔɔ tuuvo? Nɛ̀ɛ́-nɛ̀ heelu yɛ pembun pɔmbɔn o ɲɛ tuvaa coo le lusu ndɔɔ tuuvo?

¹³ Nɛ̀ɛ́-nɛ̀ tuu yɛ yiyan Mɛlɛka-o le ndu silaa yɔngoo?

¹⁴ Nda nɛ̀ɛ́-nɛ̀ kelu yɛ isɔɔ le pɛɛkoo sɔlaa vana kon o ba? Nɛ̀ɛ́-nɛ̀ cɔm yɛ ndu nɛi dɛnɛ sandaa? Nɛ̀ɛ́-nɛ̀ ke yɛ ndu kɔlkaloo? Nɛ̀ɛ́-nɛ̀ nɔla yɛ mò cɔm ndu nɛi dɛnɛ sinaa?

¹⁵ Tofa vɔ, vanaa-mangalaa-isɔɔa co ndu o hɔl maa mɛmma tue-tuema deli fulaa o baava lulɛiyo nin-ndan, a co ndu o hɔl maa cundu lusul too, o hoeiye cua-o pɛɛn! Lɛŋii co o mɛnndan tɛɛn-nde ndi co macoaa ndu o hɔl maa cundu yukuyuku sɛŋin coocoo o hoeiye nin-ndo.

¹⁶ Yɔmnde Liban tiw le yinnden ciŋaa le, visia co lon-nda bɛɛ tiw le sálà loamaa solio le.

¹⁷ Vanaa-mangalaa-isɔɔa kpow co ndu o hɔl maa ɲɛ fondo, a co ɲɛ-ɲɛ le ndu le, ɲɛ fondoo fúú.

¹⁸ A Nɛ̀ɛ́-nɛ̀ niaa yeema yɛ mì la tuu Hala? A tuula yɛɛ nɛ niaa tuu yɛnin ndu?

¹⁹ Vana caa vali labaa-o, ndu cɔaw piɔmndo ni, mì vana teengiaa sianion-ndo ndu yikpia ndu a sianion, mò bɛli yɔlɔn volin latámán ndon.

²⁰ Vana ikɔɔ nɔla bolofaa vaa lende sɔla loo, yɔm kálà-kálà suuva nɔla luɛyɔɔ loo o hɛli ni, mò nuwviaa vana caa piɔmnda siɔlɔɔ taw-vo, le ndu piɔmndo sello.

²¹ Vɛ̀ɛ̀ la sina a ken o kɔɔ le? La tui-yɔ a ndi o kɔɔ le? Mò va maa a dimul niaa sɔɛi ken kabi o kandɔɔ tasoo le? La sina masinaa a mɛɛ lɛŋnden le kilan tumndo yɛ o kɔɔ le?

²² Ndu co icali o kikil lelɛŋndo bollen ni, vanaa co icali lenin-nda maa n'sóónɔ nda co ni, o pɛngɛla halataalaa maa kola toandaa, o pɛngɛla ndu maa cɛi-kola-toandaa le calta ndɔlan kilaa lenin.

²³ Ndu co vanaa bɛndua siinguuo ɲɛ fondoo ni, ndu koni co vɛlɛ vanaa kialaa n'yamaa o lɛŋnden coo siinguuo ɲɛ fondoo fúú ni.

²⁴ Hali ma tolnun bɛɛ le, hali ma seŋnun bɛɛ le, hali mi cii ndɛi luei bɛɛ puundon lɛŋ te, Mɛlɛka hul nda dɔ́ɔ́ pɛ, mì hoeyii ndɔɛi kei nda coo, a vesa kékélé, hoeyii ken kɔndu nda mɛɛ hoeyii felenfelennde kɔandu foeende nuaa yɛ.

²⁵ «A Nɛ̀ɛ́-nɛ̀ niaa tuu yɛnin ya mì va velan ndɔɔ kpeekpei?» O-Diandaa ɲuna nuaa ni.

²⁶ La heelu vɔ hɔlla mì la tofa coocoo! Nɛ̀ɛ́-nɛ̀ cɔw yɛ ɲɛm mun? Ndu co tosaa ni mì n va kɔlan o polalen, o co mun veeloo, ɲɛ kɛ́-kɛ̀ a diola ndɔlan. Le kpaaya ndɔ bɛndoo a le yoomuma ndɔan, ɲɛ-ɲɛ co lo kɔɔli le.

Mɛlɛka minginin vanaa nɔ mayoomu le-a yoomuan

²⁷ Éé niaa cuavaa-imamaa Yakɔb-a ha! Le yɛɛ niaa co yɛ sɔɔn vaa nuaa solinndo o lasondo? Éé niaa polale Israɛl-ten! Le yɛɛ niaa co yɛ dimio aa: «Mɛlɛka co dɛnɛ nuu cɔ le, dí nuu laasian Hala nuu o hɔl?»

²⁸ La sina vɔ a ndi o kɔɔ le? La tui-yɔ a ndi o kɔɔ le? Mɛlɛka, Hala fɛɛn a fɛɛn-ndo cɔw mɛɛlula lelɛŋndan ni, o sanga le, o bumbulan te, vana-vana nɔla dɛnɛ ndɔ sinaa yaasiaa le.

²⁹ O yɔngu vana sanga-o yoomuan, mó yɔngu vana vi diallon-ndo dialun fulan.

³⁰ Poambɔa kpasua sanga ma vi diallon, hali vanaa hiow dɛnndan caa-a a nɔla mà del lɔ́ɔ́ lepum,

³¹ kɛ vanaa tiindan Mɛlɛka-a vanin yoomuma sɛnɛiyan sɔlaa o n'dial. A vanin cɔnɔnndo coocoo maa n'kovɛ, a vanin ɲaanɔnndo, a vinin n'dial te, a vanin kɔlan a labɛɛla, a venin sanga le.