Esai 37 - BII BILA

Esekia vem vannda o Esai vana-tɛɛngaa-diom Hala-o lo

¹ Mɛɛ masaa Esekia tuei sɔɔn mun, mó sɛɛsiaa volɔɔla va ndu lekɔɔ lan, mó vownun volɔɔla yuululan, mó kɔa o Cɛi-Mɛlɛka-o nin.

² Mó viam Eliakim, ó va bolle cɛi masaa-o, Sɛbna va vana sɛvaa-o a kaasoŋaa kɔlkalua o vanaa-solia-lasálàá tɛɛn a volɔɔla yuululan lekɔɔ o vana-tɛɛngaa-diom Hala-o, Esai, po Amɔt-o lo.

³ Mɛɛ nda tiiya, má dimul Esai aa: «Nuaa Esekia soo ni aa paalen nden, paale imɔnɔlen, paale sangaalen a paale lasiɛmbulen le co ni, kani cɛlɛkpɛa lendea co o folilan nin-nda tiiya o cóltan le volɔnndo, kɛ kalaa ndaa nɔ yoomuma vialaa le.

⁴ Bɔɔle Mɛlɛka Hala nɔmndo tuei sɔɔn fula bolle vanaa yɔngù masaa mɔiyan-nda-o o sondo-on, o vana ndɔ bɛndoo, o co masaa Asiri-o vem le hunɔɔ Hala yoomaa yeowlan-ndo pɛɛn, bɔɔle Mɛlɛka Hala nɔmndo soaŋnin ndu le sɔɔn o tuei mun-ndon. Lelan, piɛi Hala le vanaa tɔ̀a lo vɔ haa yoomu-a, yandi!

⁵ O kon, mí vanaa baalaa masaa Esekia-a kan a kɔa o Esai lo.

⁶ Mí Esai dimul nda aa: «La tuei-yɔ sɔɔn niaa tɛɛngulnin vana niaa bɛndoo-on! Nuaa Mɛlɛka dimi ni aa: ‹Siòòŋii bii nɔm le sɔɔn n tuei mun-ndon te, yeowla vanaa baalaa masaa Asiri yeow ya lan pɛɛn.

⁷ I co ndu yiyanndo pum luei o kɔl, o tuɛinin yoongoo pum, mò cɛn mò muungu o lɛŋnde ndɔlen nin. O lɛŋnde ndɔle len nin ya tosanin ni, mò vi o mɔɛi cɔwve bɛngu.›»

Masaa Sanekerib kɔngɔlan vɛlɛ masaa Esekia

⁸ Mɛɛ bolle vanaa yɔngù masaa Asiri mɔiyan-nda tuei maa masaa Asiri faŋan Lakis mó kɔ del kobio Libna coo a cɔwvo, mó diam ndu, mó kɔ komal ndu Libna lon.

⁹ Kani nuaa masaa Asiri ndóò tuei yoongoo ni aa Tirhaka masaa Etiopii co ndu Sennakerib hinullo a cɔwvo. O kon, mí Sennakerib vim Esekia kiilaa, má kɔ dimul ndu aa:

¹⁰ «La tiiya pɛ la dimul Esekia, o co masaa o tàndá Yuda-o coo-o aa: ‹Cɛl mì Hala nɔm n tiindan kon-ndo heelu nɔm hɔlla le dɛ! Cɛl mò dimul nɔm aa Yerusalɛm delnin masaa Asiri o ba le le.

¹¹ Nɔm pila sinà ɲɛ masaa yɛ́-yɛ́a Asiri a tosal lɛŋnde kpow-vo, a tuei mɛɛ nda tɛɛmbuu ndi yɛ. Bàà nuaa nɔm co yiyanndo ni maa nɔm hialunnin?

¹² Mí fuɲaa niaa mamaa tɛɛmbuu sindɛ vanaa-mangalaa-isɔɔa va o kobio Kosan nin-nda, a va o kobio Haran a o kobio Rɛsɛf nin-nda, má diw vɛlɛ cuavaa-imamaa Edɛŋaa va Telasar-a, mò va maa halaa vanaa-mangalaa-isɔaa kan va piɛiyo-a a baŋa nda le?

¹³ Kuɛɛ nɛ masa kobio Hamat, masa kobio Arpad, masa kobio Sefarvaim, masa kobio Hena a masa kobio Iva a co yɛ taanin!»

Piɛile Esekia len

¹⁴ Mí Esekia bii sɛbɛ Sanekerib sɛva-o kilaa o vim ndu-a o ba, mó tofa sɔɔn va n'sɛvaa lenin-ndon. Mɛɛ o cii tofa, mó hel o Cɛi-Mɛlɛka-o nin, mó timbi sɛbɛ kalaa Mɛlɛka o hɔl,

¹⁵ mó piɛi Mɛlɛka nuaa aa:

¹⁶ «Mɛlɛka-Nɔ-Kpaayaa-Kpow-vo, Hala Israɛlla, nɔm co icali o mɛlɛkaa kanda ɲɛm Hala-on-nda coo-o, nɔm pilɛ kpé co Hala le masɛi co o lɛŋnden coo-e kpow ni! Nɔm cɔw halataalaa a lɛŋnden ni.

¹⁷ Yandi Mɛlɛka yaŋ nilan mà tuei! Mɛlɛka kumbi hɔlta nɔmndan mà tofa! Tuei-yɔ sɔɔn Sennakerib sɔɔ vannda o sondo le hunɔɔ nɔm Hala yoomaa yeowlan a mun-ndon!

¹⁸ Éé Mɛlɛka! I co toɲa maa masaa yɛ́-yɛ́a Asiri a siɔŋi lɛŋnde kpow, má mulin má siɔŋi vɛlɛ lɛŋnde ndale nda pila len.

¹⁹ Handɔɔ o kon coo, má viaw halaa ndaa o yinnden nin, má loam nda. Kɛ halaa kan nda nda, vanndacieea ndáà toosiaa nda a laba ni, yɔmnde a powta ndáà sɛl-tan halaa kan va ni, mí masaa kan tɛɛmbuu nda few-few.

²⁰ Lelan, yandi Mɛlɛka Hala naa, baŋa naa sunsun mà soli naa Sennakerib o ba, haliko mi masɛi co o lɛŋnden coo-e kpow i sina maa nɔm pilɛ kpé co Mɛlɛka ni.»

Esai tɛɛnguu diom Mɛlɛka-o Esekia o lani

²¹ O kon mí Esai po Amɔt-o viam kiilaa, má kɔ dimul Esekia aa: «Nuaa Mɛlɛka, o co Hala Israɛlla-o soo ni aa: I tuei piɛile n piɛi ya a dɛnɛ Sennakerib masaa Asiri o kɔɔ len.

²² Tuei-yɔ diomnda Mɛlɛka dimul ndu lan: «Kobio Siɔn co nɔm tɛɛndanndo mo va nɔm mamɔɔ. Vannda Yerusalɛm a co nɔm mamɔɔ a bollen hiiloo!

²³ Nɛ̀ɛ́-nɛ̀ n yeow yɛ, nɛ̀ɛ́ n dimul-lɛ sɔɔn tanaan? A Nɛ̀ɛ́-nɛ̀ n tosal-lɛ paa-kala má soaa a ndu coocoo? A Nɛ̀ɛ́-nɛ̀ n heelu yɛ hɔlla coo? Ya Hala Diandaa Israɛlla n hol sondoo nuaa ni dɛ!

²⁴ A yei Maalii a sondo vanaa nɔmaa baalaa, a dimi aa: Ya Sanekerib, i hel o pembon tullo a ɲɛla ɲaanannda nila soa nan-ndan kunda bɛndoo. I hel o pembei Liban mɛɛlulan, mí kialu yɔmii Sɛɛdrei ndɔɛi hiow bandei-ye a yɔmii Siprɛsii ndɔɛi hiow naŋɔɔ-e. I tiiyanin o tul ndɔ hiow bandei-yo bollen a o bundɛ ndɔ kàlà-kálàá mɛɛlulan.

²⁵ Ya, i tow soonnda kólaalan mí kol mɛnndan. I veeliaa peelan Esipte kpow a bɛngula kɔlta nilan.»

²⁶ Vɛ̀ɛ̀ nɔm Sanekerib, a sina masinaa maa kabi lɔ́ɔ́ levil te ya kɛɛsiaa sɔɔn mun te? A sina maa kabi sindɛ-sindɛ le ya tuu le mun tosaa le? Sisa yɛ niko, i cɛl mì sɔɔn mun n peelun. Ya cɛl ni mí nɔm Sanekerib pesipesi kobila mayoomulan, má siinguu lan pɔmndan.

²⁷ Vanaa co o kobila lan nin-nda a nɔ kpaaya le, siòònde bii nda má yɔŋnun kɔndɔmɔlɔɔ a siɛmbulan. Maa bil pɔmbɔ co yondoo nin-ndo nda co ni, maa yondo puiyaa nda co ni, maa bil tala o yindɔla cɛilan coo-o nda co ni, a yɔŋnun maa malun lavulun vesan telen pá mi tumndo kandu fulaa-on.

²⁸ Kɛ i sina telen nɔm Sanekerib caa calle-o I sina telen n fula-o, i sina vɛlɛ telen n luɛi-yo, I sina telen n tuulu kɔllo a ya-o.

²⁹ Le tùú n tuulu kɔl a ya-o, le tùú n soo yongaa mí yonga nɔm kon tiiya ya o lani-o, i co nɔm kelɛi nii vow o milin, mì vow nɔm kalafoo o cɔcɔn tɛɛn, o kon i minginin nɔm a nɛi n kei coo ma hun-ndo.

³⁰ Le nɔm Esekia yɛ, hee yɔŋnunnin tɔɔmaseloo le nɔm: Nanndee he, vannda dianin mííngúúon, ɲinasian, a dianin ɲɛm vulnin a ba ndɔ-on. Kɛ ɲinasian kɔɔlimandɔ niko, o bɛnda mì la saŋ, mì la kow, mì la tɔl rɛsɛnndon, mì la de rɛsɛŋun koaman.

³¹ Vanaa lonin yoomu o cɛi Yuda-o nin-nda a vanin vɛlɛ maa yɔm vil puundon lɛŋ mo va kɔmnden solio o lɛwvon coocoo-o.

³² Kani vanaa tɔ̀a lonin-nda cannin Yerusalɛm, vanaa hialunnin mà cinda-a vanin o pembei Siɔn coo. Kaola dialun fulaa Mɛlɛka-Nɔ-Kpaayaa-Kpow-vo tosanin kon ni!

³³ Le hee, tuei-yɔ diomnda Mɛlɛka dimi a masaa Asiri o kɔɔ lan: «O lueinin o kobio ho nin te. O vuunin kɔɔn lenin te. O cɔmnin ndu kɔ̀ɔ̀la cɔwlan te. O beŋnin kungala-saasalan le kobio ho biyɔɔ le.

³⁴ O muungunin a nɛi o kei coo mó hun-ndo. O lueinin o kobio ho nin te few! Mɛlɛka dimi lende ni.

³⁵ I kandanin kobio ho le ndu ciindiaa, i tosanin kon le ya pila a le vana ni baalaa David.»

Kɔnnda Asiriia a piɔ́m Sennakerib-o

³⁶ O kon mí mɛlɛkanɔ Hala-o kɔa o dɔ́ɔ́ngɔ́ɔ̀ Asiriia nin, mó kɔ dii vanpiaandua vaalan kɛmɛ belaŋɔmaa a laŋuɛɛnu. Diimandɔɔ idiiyo, telen nda tendu-o, má ca dɔ́ɔ́ngɔ́ɔ̀ o piaa a vanvílɛ́yaa kan.

³⁷ O kon, mí Sennakerib masaa Asiri puusiaa dɔ́ɔ́ngɔ́ ndɔ kon, mó muungu o ndu lo, mó kɔ lo icali o ndu lo Ninive.

³⁸ Paale pum, mɛɛ o luɛi o cɛi maan hala ndɔɔ Nisrɔk nin, mí poaa ndɔa Adramelɛk nda Sarɛsɛr lɔwviaa ndu a mɔɛi cɔwve, má dii ndu, má sɔndan, má kɔannun o lɛŋnde Ararat len nin. O kon kɔɔli, mí Esar-Hadɔn po ndɔ koma sul masaa o fonda ndɔɔ.