Esai 36 - BII BILA

Sennakerib va masaa Asiri-o hinul Yerusalɛm

¹ O vɔsi tɔ́ a o hiɔɔlundɔɔ nin o masale Esekia len bɛngu, mí Sennakerib va masaa Asiri-o heelu, mó kuel kobila mayoomulan kpow o tàndá Yuda-o nin, mó biw lan kpede.

² Masaa Asiri lo Lakis mó viam bolle vanaa yɔngù ndu masaa mɔiyan-nda Yerusalɛm o masaa Esekia lo a vanaa cɔwva taw-taw. Mí bolle vanaa yɔngù ndu masaa mɔiyan-nda kɔ sim o tɛyii dala co a maluaŋ-ndo, o nɛi kɔɛ o ciɛi vana siɛɛndua lavolɔɔ-e-o coo.

³ O kon, mí Eliakim po Hilkiya-o, ó va bolle cɛi masaa-o, Sɛbna va vana sɛvaa-o, a Yoah va vana mandaa lasɛbɔɔ-o, po Asaf-o, a sɔɔnguu kuubanɔ vanaa cɔwva ikɛi.

⁴ Mí bolle vanaa yɔngù masaa mɔiyan-nda dimul nda aa: «La kɔ dimul Esekia aa nuaa masa bɛndoo soo ni, masaa Asiri pɛɛn aa: «Yɛɛ nɛ nɔm Esekia tiindan yɛ kpeekpei?

⁵ A co yiyanndo maa sɔɛi sondoei tosa ni mì vana sɔla silaa a yoomuan o cɔwvo nin. Nɛ̀ɛ́-nɛ̀ n tiindan yɛ ma simul-la simullo ho?»

⁶ I sina maa lɛŋnde Esipte len n tiindan ni, kpɛ̀ndɛ̀le yomɛilen n tiindan ni, vana-vana tiinda pɛ baa lecoo, le boli ndu baa le sɔɔŋa lenin. Lende Faraɔnnɔɔ, o co masaa Esipte-o co le vanaa kɔngan ndu-a kpow ni.

⁷ Bɔɔle a co ya dimul aa: «Mɛlɛka, o co Hala naa-o naa n tiindan ni.» Kɛ vɛ̀ɛ̀ o co sooluula ndɔlan a fondala-loamaa-lasálàla ndɔlan te Esekia puusiaa, mó tɛɛmbuu, o kon kɔɔli mó dimul vannda Yuda a haa Yerusalɛm aa la baŋ vulan o fonda-loamaa-lasálàá ho hɔl-ndɔ le?

⁸ Lelan sunsun, la mɛi o lediom coo niaa vana ni bɛndoo, masaa Asiri pɛɛn, o kon i yɔngunin nɔm soa vàálan latiɔn, nɔm nuwviaa vanaa caa ɲaanɔnndo o soa coo-a kínɛí.

⁹ Vɛɛ nɛ n nɔla yɛnin ma tow bolle vanaa cɔwva o pilɛ, hali o vana kon va o pɔmbɔ vanaa baalaa vana ni bɛndoo tɛɛn? Lɛŋnde Esipte len n tiindan ni le ɲɛla ɲaanannda soa nan-ndan a le vanaa ɲaanun o soa coo-a.

¹⁰ A nɔ o kɔl maa o co Mɛlɛka le cɛl fɔlɔn malan ya heelu nanu le lɛŋnden nden tɛɛmbuuo le? Mɛlɛka pila dimul-la ni aa: Heelu mà kɔ del lɛŋnde len coo ma tɛɛmbuu len!

¹¹ Mí Eliakim, Sɛbna a Yoahse a dimul bolle vanaa yɔngù ndu masaa Asiri mɔiyan-nda aa: «Soo o buɛyaa nɔmnda lo o aramei nin, kani n tuɛi ndi válán, kɛ soaa o naa lo o hebrei nin te, yɔŋii vanaa co haa o kpakio coo-a tuei ɲɛ n co dimio-o.»

¹² Mí bolle vanaa yɔngù masaa mɔiyan-nda muli aa: «O co ko o vana niaa bɛndoo lo a o niaa pila lo daama le vana ni bɛndoo vem ya le sɔɔn mun dimio le, kɛ o vem ya le sɔɔn mun dimio vanaa co haa icali o kpakio coo-a o lani, kani o lo cɔɔlu cobe mà de poola ndalan, mà kol tuilima ndan niaa ndaa latulu.»

¹³ O kon kɔɔli, mí bolle vanaa yɔngù masaa mɔiyan-nda sɔɔnguu, mó deŋi coocoo a yoomuma ndɔan kpede o hebrei nin aa: «La yaŋ-ndɔ nilan o sɔɛi masa bɛndoo dimi-e, masaa Asiri pɛɛn!

¹⁴ Nuaa masaa bɛndu kon dimi ni aa: La cɛl mi Esekia luei niaa bollen o pɔwlan nin a kpaavɛi ndɔɛi le, kani o nɔlanin niaa baŋa le.

¹⁵ La cɛl mi Esekia hiŋ niaa hɔlla mi la yɔngu Mɛlɛka laalan niaa le, o diminin aa: «Mɛlɛka ciindiaanin naa, kobio ho melnunnin masaa Asiri o ba le!»

¹⁶ La yaŋ Esekia nilan te, kani nuaa masaa Asiri dimi ni aa: «La nuwviaa duaa a kɔlɲuloo ya o ba, la yɔngun ya, o kon o niaa tɛɛn, vana-vana dianin rɛsɛŋun ndɔn a voosun ndɔn tɔnɔ, vana-vana lonin mɛmma soon kólaa ndɔɔ kolɔɔ

¹⁷ háá mì hin, mì hun kɔ a niaa o lɛŋnde co maa lɛŋnde niaalen nden nin, lɛŋnde maalon a mɔiyan ma co nin-nden, lɛŋnde ɲɛdiaa a rɛsɛnndon co nin-nden.

¹⁸ Lelan, la cɛl mi Esekia luei niaa o pɔwlan nin mo dimul niaa aa Mɛlɛka baŋanin niaa le dɛ! Vɛ̀ɛ̀ mì halaa vanaa-mangalaa-isɔɔa ndáà nɔla lɛŋii ndɛi baŋa masaa Asiri o ba?

¹⁹ Kuɛɛ nɛ halaa kobio Hamat a halaa kobio Arpad a co yɛ? Kuɛɛ nɛ halaa Sefarvaim a co yɛ? Vɛ̀ɛ̀ mì ndáà nɔla kobio Samari baŋa ya o ba?

²⁰ O halaa lɛŋii ken kpow nin, ɔ́ɔ̀ halaa nɔla lɛŋii ndɛi baŋaa ya o ba-a? Vɛ̀ɛ̀ Mɛlɛka ndu nɔlanin pá mò baŋa Yerusalɛm ya o ba?

²¹ Kɛ mí Eliakim, Sɛbna a Yoahe mei kpili, hali bako bɛɛ a mulul ndu le. Kani nuaa masaa Esekia ndóò dimul nda ni aa: La mulul ndu le.

²² O kon, mí Eliakim po Hilkiya-o, ó va bolle Cɛi masaa-o, Sɛbna va vana sɛvaa-o a Yoah po Asaf-o, ó va vana mandaa lasɛbɔɔ-o a kɔa o masaa Esekia lo a volɔɔla sɛɛsiɛilan lekɔɔ, má downun ndu kona, má tɛɛngul ndu sɔɔn bolle vanaa yɔngù masaa Asiri mɔiyan-nda-o soo-on.