Esai 32 - BII BILA

Masale kpeekpeile toɲalen

¹ Masaa pum tosanin masalen mɛɛ dɛnɛ sandaa co yɛ, simlacia vanin ndu o ba bɛngu-a tosanin simlacilen o sakpoyɛi nin.

² O nda tɛɛn, vana-vana vanin maa nɛɛ yifannda le hoeyii hɔŋɛi a nɛɛ viannannda le hoeyii fùkù-fùkùei, a vanin maa pee mɛmma volo-voloo o fonda vesɛiyo coo, maa vunduma pow kpovaa bɛndoo o lɛŋnde veselɛilen nin.

³ Hɔlta vanaa co cɔu-va la kindan ndɛnin te, nila vanaa co tueyɔɔ-a la beŋul-lɛnin te, la vanin layaŋaa yékén.

⁴ Kɔlta vanaa bii ɲɛ-ɲɛ bila le-a la yiyannin haliko mi la bii dɛnndan bila. Diɛɛmui vanaa kuvɛiya soaanin félen-félen, mì vanaa kan a siɛndi vɛlɛ sɔɛi ɲɛkɛndɛi.

⁵ Vana veelu lɛnin diɔmndo aa vana tɔ́ɔ́ le, vana veelu lɛnin vana huiya n'vanndo aa vana bɛndoo le.

⁶ Kani diɔmndo diɔmnde o dimi ni, dɛnɛ vɔɔndo kposon o tuunun o kɔl ndɔɔ nin le dɛnnda siòòŋii Hala co nin te lan tosaa ni, le sɔɔn vɔɔnndon dimio a diola Mɛlɛka lan, le vana co a yiaan ndo malɔɔ dembe fondo, le vana kolɔɔ bii-o mɛnndan tuŋɔɔ.

⁷ Vana huiya n'vanndo ndu, dɛnnda ndɔlan yɔŋ vɔɔndo tuŋ. Tuula vɔɔnndan kínɛí o tuu o kɔl ndɔɔ nin ni, le vanaa ikɔɔa mɔnɛi lueiyo a sɔɔn lacòòvan, hali vana bala fondo kon nɔ bɛɛ dio o sɔɛi ken nin.

⁸ Kɛ vana tɔ́ɔ́ kɛndɔɔ ndu, sɔɔn latɔ́ɔ́-tɔ́ɔ́n o tuu ni, o tuu vɛlɛ pɛ sɔɔn bɛndun vaa lende, o sim yili, le lou lecoo.

Yamɛi kilulun vanlaandua buulan te-a-e

⁹ Niaa vanlaandua buulan te-a sei, la cɔn mì la yaŋ nilan o diom nuu! Niaa cuaambɔa laandua saalan isɔɔ le-a, la yaŋ-ndɔ nilan mì la tuei sɔɛi nii!

¹⁰ Nanu a vɔsio pilɛ a palɛi pum, niaa cuaambɔa laandua saalan haa isɔɔ le-a, la ɲiiyanin. Kani rɛsɛŋun venin le kiɔndɔɔ le, kɔmnde tɔlɔɔ oo tɔlɔɔ le venin le kiɔndɔɔ le.

¹¹ Lelan, la ɲiiya a siòònde, niaa vanlaandua buulan te-a! La yɔŋnun yoloma-yoloma, niaa vanlaandua saalan haa isɔɔ le-a! Niaa pila yungan, la solin volɔɔlan lekɔɔ, la lo tumnda fondo mì la kandan caŋnda!

¹² La yiyan-ndɔ mɛɛ ciɛɔn mun naŋ yɛ a mɛɛ rɛsɛnndon mun kom yɛ, mì mɔnɛi bii niaa, mì la lɔɔ lɔlulan.

¹³ Kani yɔɔn a siɛmbullon vulnin mì n tiw o yondola vanaa niaa coo a co cɛila kɔlkɛndɛla kobi connun hoo o ɲaaloo nin-ndo nin kpow.

¹⁴ Cɛi bɛndu lemasaa lonin fondo, vannda piawnin kobi vɔkɔ-vɔkɔɔ co hoo nin-ndo, pembei a cɛi coocoo siŋnunnin buululan le fɛɛn a fɛɛn, sofɛlɛa yondoa vanin pisultan ndon. Cɔlua vanin billo dioo lon.

Kɔlɲuloo a dɛnɛ sandaa

¹⁵ Ɲɔɔ lonin lende háá mì yiyan pum fula coocoo mò hun saŋnun naa coo. Mì lɛŋnde veselɛilen le siŋnun yondo kalaa, mì yondo kalaa cennun maa bundɛ.

¹⁶ O kon, sakpoyɛi tosannin o lɛŋnde veselɛilen nin, dɛnɛ sandaa kɛsinin caltan o yondo kalaa nin.

¹⁷ Vali dɛnɛ sandaa tosanin-ndo vanin kɔlɲuloo ni, kɔmnde dɛnɛ sandaa le vanin vaa o ba coo yili a vannɔnndo nila ɲulu le fɛɛn a fɛɛn ni.

¹⁸ Vanaa niaa calnin o fonda kɔlɲuloo, a nɔnin nɛɛ calaa yilia o fondala nila ɲululan nin.

¹⁹ O va bɛɛ aa mì bundɔɔ siɔŋ o piɔɔ loeon deliaa bɛngu, mì kobio piɔl mò dɔɔnan taw.

²⁰ Dɛnɛ kɛndɔɔ vanin le vanaa saŋnin kullon ba-ba fee o mɛnndan dangalaa-a, a malnin nawva a sofɛlɛa kelaa o ba ndaa coo-a pɛɛn.