Esai 31 - BII BILA

Dɛnɛ palaa co le vanaa tiindan Esipte-a

¹ Dɛnɛ palaa co le vanaa co tuusoo Esipte le kɔlan malaa sɔlaa lon-nda. Vanaa tiindan soa, má kɔngan ɲɛla ɲaanannda soa nan-ndan kunda bɛndoo-a. A nɔ laalanndo o yoomuma vanaa ɲaanun o soa coo-a nin-ndan-a pɛɛn. Kɛ vanaa kan co O-Diandaa Israɛlla tofa le, a co sɔɔnguu Mɛlɛka o ibuŋ te!

² Ndu bɛɛ vana kɔlkaloo o co ni, o tuisinin dɛnɛ palaa, ndu pila faŋanin sɔɔn o dimi-on lecoo le, o cannin isisi a cɛi vanaa kɔlvesɛiya le nda cɔlɔbaa, o cɔlɔbanin tiindan vanaa co yɔŋ vɔɔndo tosaa-a.

³ Esiptenɔɔ vanacieo o co ni, o co Hala le o co le, soa ndɔa visia nda co ni, a co n'ɲina le. Lɔ́ɔ́ Mɛlɛka heelunin baa-o, vana co vannda kandaa-o siɛlanin, mì vanaa o co kandaa-a deli, o kon, mì nda kpede tambu latulu.

Mɛlɛka ndu pilɛ kpé nɔla mò baŋa Yerusalɛm ni

⁴ Kani nuaa Mɛlɛka dimul-la ni aa: «Te yàlà piaandoo te kon te yàlà téndóó bii pɛ ɲɔɔ, hali vanaa mandaa n'cɔlua kpow cuungian bɛɛ le ndu ɲɛ kon hiɔlɔɔ o ba, siòòŋii bii ndu a vɔkɔ-vɔkɔ ndaa le, kɔl hiilun ndu a sɛ́lɛ́ nda bɛndoo le, kɛ pɛɛliaa o pɛɛliaa ni le kungulanndo o ɲɛ kon coo. Lende koni Mɛlɛka-Nɔ-Kpaayaa-Kpow-vo toalnin le cɔwvo tosaa o pembei Siɔn coo ni, pembii ndɔɛi pɛɛn.

⁵ Mɛɛ yowva pɛɛnga kumbanndan o pelta nda kuumbun coo lan coo yɛ, lende Mɛlɛka-Nɔ-Kpaayaa-Kpow-vo pɛngɛlannin Yerusalɛm coo le ndu kandaa ni. O kandanin Yerusalɛmnda mò baŋa nda, o kpakpalanin nda a dɛnɛ vɔɔndo mò ciindiaa nda.

⁶ Lelan niaa cuavaa Israɛlla, la muungu vana niaa mulul paandu kɔɔ mi niáà kɛɛ ndu few-few-vo o ibuŋ!

⁷ O palɛi ken nin, vana-vana viawnin piɔmaa ndɔa o cɔw a volin latámán-nda a piɔmaa o cɔw a sianion-nda, piɔmaa niaa cownun a bala niaala yɔŋ vɔɔnndan-nda pɛɛn.

⁸ Asirinɔɔ delnin o mɔɛi cɔwve bɛngu, kɛ o venin mɔɛi cɔvii vanaciee le. Mɔɛi cɔwve sɛɛsiaanin ndu, kɛ o venin mɔɛi cɔvii vanaciee le. Asiriia ɲaanunnin mɔɛi cɔwve, kɛ kuubaa cɔvaa ndɔa felengia biinunnin o cɛlen nin.

⁹ Pow kpova nda kɔngan-ndo sɔndannin a siòònde, simlacia ndaa ɲiiyanin lɔ́ɔ́ nda canin lɛfɛ landaa hunɔɔ le cɔwvo-o. Lende Mɛlɛka nɔ yinnde ndɔlen Siɔn a tóndó bɛndu leyin ndɔɔ Yerusalɛm-ndo dimi ni.