Esai 30 - BII BILA

Kpema nda yii a Esipte-o tambunin

¹ Mɛlɛka dimi aa: «Dɛnɛ palaa co le cuavaa nila kalua! A co sɔɔn kiolɔɔ o kɔlta ndalan nin, a co ya ɲuna le, a co kpemalan yiiyo, o co o hɛnan ni nin te, kon kpow le hakilan cɔɔloo diŋaa o hakilan coo!

² A co tuusoo Esipte a co ya ɲuna le, a co tuusoo lon le kɔlan vionnɔnndo masaa Esipte o ba bɛngu, le kɔlan yifanndo o vunduma Esipte-an bɛngu!

³ Kanda niaa co nuwviaa masaa Esipte o ba bɛngu-o siŋnunnin siɛmbulan le niaa. Yifan niaa co kɔlan o vunduma Esipte-an bɛngu-o siŋnunnin dɛnɛ bɛɛtambɛiyo le niaa.

⁴ Kani simlacia ndɔa co nihau Soan, kiilaa ndɔa tiiya nihau Hanɛs.

⁵ Siɛmbulan la biinin nda kpede le vanaa-mangalaa-isɔɔa nda nɔnin haa tɔnɔ oo tɔnɔ o n'dial te-a. A sɔlanin mala kɛ́-kɛ̀ nda o ba le, a sɔlanin mala nda o ba le, kɛ a siŋnunnin dɛnɛ lasiɛmboo a bɛɛtambɛiyo le nda.

⁶ Sɔɛi vueinaŋii dimin a visia co a ba too-a o kɔɔ-e co hee ni: a co keiyo o tàndá imɔnɔɔ a o tàndá sangaa co nin-ndo nin. O tàndá yàlà laandoo a yàlà piaandoo nin, o tàndá hɔ̀ɔ̀lɔ́ɔ̀ a tambálakáà nin. A handu sofɛlɛa ɲɛm sɔlan ndan o lakɔɔ, a dovi bolofaa ndaa o buun ɲɔɔmɛɛa coo, a co vanaa-mangalaa-isɔɔa solulnin nda kpeku oo kpeku le-a ɲɛm mun yoo,

⁷ kani ɲɛ fondoo fúú kon nɔ diolan ni aa: «Puluku-laasi sim-ndɔ kpɛ́-o.»

Vanaa lanila kalua yeema ma ce le

⁸ Lelan Esai, kɔ sɛva sɔɔn o pɛngɛi coo nda Israɛlla o hɔl, sɛva mun o sɛbɔɔ nin haliko mi n va seilen le siɔdii lacio háá le fɛɛn a fɛɛn.

⁹ Kani vanaa nila kalua nda co ni, cuavaa lacòòvaa nda co ni, cuavaa yeema le nilan yaŋɔɔ o tɔŋ Mɛlɛka-o le-a.

¹⁰ A co vanaa ca siɔdii lacio-a dimullo aa: «La tofa ɲɛ-ɲɛ le dɛ!» A co vanaa-tɛɛngaa-diom Hala-a dimullo aa: «La dimul naa toɲaa o diom Hala-o tɛɛnguuo nin te, la dimul naa sɔɔn lisa naa-on, la tɛɛngul naa vunduma lacòòvan!

¹¹ La faŋan o nɛi kpeekpeiyo coo, la mal nɛi sandaa mí la sei. La faŋa O-Diandaa Israɛlla naa o hɔlla!»

¹² Lelan, nuaa O-Diandaa Israɛlla soo ni aa: «Le tùú niaa kɛɛ sɔɛi nii he mí la pɛɛsa ndi-o, le tùú niaa yɔngun kɔlvesɛiyo a kafalan o ba bɛngu mí la tiindan lan-ndo,

¹³ haki kon siŋnunnin le niaa maa mɛɛ tɛɛngei buli o kpaki vilɛiyo nuaa yɛ. Te tɛɛngei buli dɔ́ɔ́ pɛ, i cɔɔlu townɔn taw, o kon kpaki kon hiilun dɔ́ɔ́ vooku-vooku, o komba vuluvulu.

¹⁴ O komba pɛ o piɔsi mɛɛ kpɛɛnɛi vana cɔavaa n'kpɛɛnɔɔ piɔsi nuaa yɛ. Ì piɔl pɛ, ì cuinun yukulu, hali tɛndu pɔmbɔɔ le yinnden cuaa lenin o yinndaceele, o sɔ́lan te, o co vɔ bɛɛ le tɛndoo sɔlaa le mɛnndan kɔndɔɔ o kpɛɛnɛi bɛndu-bɛndui mamɛnnde nin te.

La kɛsi kɔltan mì la tiindan ya Hala

¹⁵ Kani nuaa Maalii, O co Mɛlɛka-o, O co O-Diandaa Israɛlla-o soo ni aa: «O calle yili nin a o pɛngio nin cinda niaa vanin ni, o meiyo nin a o ya tiindanndo nin yoomuma niaan ma vanin ni, kɛ la cɛl le tosaa lende le!»

¹⁶ La dimi aa: «Ɛ-ɛ, n ɲaanunnin o soa naa coo!» Lelan kpeekpei niaa co ɲaanɔn lekɛ́ndɛi o soa coo ni. La dimi vɛlɛ aa: «N helnunnin o soa keleŋa taw-va coo!» Lelan, soa vanin niaa tovɔɔ-a bɛɛ keleŋanin taw.

¹⁷ Vanndo ndu pilɛ kpé vueinunnin niaa ni, mì vannda vàá pilɛ o niaa tɛɛn ɲaanun ndu. Vannda nda ŋuɛɛnu vueinunnin niaa, mì la ɲaanun kpow háá mi la lo ɲɛ-pɔmbɔɔ doolɛ maa yɔm landaa lɛfɛ co o pembei tullo-o, maa lɛfɛ-landaa lo o pembei coo-o.

Mɛmɛma co lɛ tuisi le, telen cindaa tiiya

¹⁸ O va bɛɛ lende, Mɛlɛka co telenndo cumndo le niaa kɛndɛi tosallo, o cannin mò tuinun niaa iɲíí, kani Mɛlɛka ndu, Hala sandaa o co ni. Dɛnɛ kɛndɔɔ co le vanaa nɔ kɔlkɛsiaa o ndu nin-nda kpede!

¹⁹ A toɲa, niaa vannda Siɔn, niaa co icali Yerusalɛm-nda, la koŋul-lɛnin te. La yonda pɛ, o tosalnin niaa kɛndɛi, o tueinin niaa diom, o mululnin niaa mulul kɛndɛ.

²⁰ Maalii yɔngunin niaa ɲɛdiaa lɔ́ɔ́ niaa vanin o sangaa nin-ndo, o yɔngunin niaa mɛnndan telen niaa vanin o mɔnɛi nin-ndo. Vana co niaa pɛɛkoo-o lo lɛnin niaa o hɔl te, kɛ la canin vana kon a lehɔl ciŋ.

²¹ Nila niaalan la tuɛinin diomndo dimio niaa kɔɔli telen niaa yeemanin le kɔlan o ba kɛndɔɔ coo te kon te o ba mɛllo coo-o aa: «La tofa vɔ nɛiyo, la kɔ lecoo!»

²² La bɛnda mì la ce volin niaa holi piɔmaa niaa-on a sianin niaa bɛli nda-on maa n nɔɔlɛiyon n co ni. La bɛnda mì la viow nda a mun ma ɲɛ co o nɔɔlɛiyo-o, mì la dimi aa: «La fula nanu!»

²³ O kon, Hala tuisinin piɔɔ o yɛyii niaa saŋnin lɛŋ-nde coo, lɛŋnden le solulnin niaa ɲɛdiaa kɛndɛ yeelɛiyo. O palɛi ken nin, cɔlua niaa vanin kɔlan diólan o hòóla bɛndu-bɛndulan nin.

²⁴ Navaa vàá a sofɛlɛa vàá vanin lɛŋnden vaa-a, a dianin bil yeela maa ihɛl-lo, bil hɛinunnin a bawla tundanndan a á fɛlɛlan-ndo pɛɛn.

²⁵ O paale diuvaa n'vanndacieele bɛndulen coo, paale cɛila coocoola vilɛilan la koombiaanin-nden, peelan la vanin a mɛnndan taw o pembun bɛndon a o pembun pɔmbɔn coo.

²⁶ Ɲɛ-tengaa ipaangoo vanin diondɔɔ maa ɲɛ-tengaa lepala. Kɛ ɲɛ-tengaa lepalaa ndu cɔɔlunin diondɔɔ bɛmbɛ leŋɔmmɛw hiovɔɔ o paandoo coo. O diandunin mɛɛ vana cuungiaa ɲɛ-tengaa lepala diandu palɛi ndii ŋɔmmɛw-vo nɛɛ pilɛ nuaa yɛ. Kon tosannin telen Mɛlɛka holnin paw vanaa ndɔa mò singi pavii o soli nda o n'dial a lɔɔ-e o.

Delɔɔ Asiriia: yinnde Mɛlɛka len le lom nda

²⁷ La tofa vɔ, Mɛlɛka pila hunnin! O fulanin o tàndá levillo nin mo hin. O co a kɔltuwvo taw, maa yinnde sɔngɔɲɔn kɔltuw ndɔɔ co ni, cɔcɔn co ndu n'piaan ca a kɔltuwvo, diɛɛmule ndɔlen vana ca kaa yinnde co kuuliaa len ni.

²⁸ O co yoomoo vana ca kaa pee pɔmbɔ mɛnndan ma pɛ nin mi ma hel o kɔngɔlan mi ma bii vana o bololan di-o ni. O hin ma hunaa le vanaa-mangalaa-isɔɔa cacɔɔ a tɛmɛ tɛɛmbua, a le nda kalafolan vowvo o yaalelan nin, le nda laasiaa.

²⁹ La solinin condon mɛɛ vana soli condon o ɲumma paale kafoan nin yɛ, la nɔnin kɔlkɛndɔɔ nin maa vana co kɔlan o diom lesɛ̀ŋndo bɛngu-o, le kɔlan o pembii Mɛlɛka-e coo, o pow kpova Israɛlla coo.

³⁰ O kon, Mɛlɛka solinin diom ndɔ lemasaa mò deŋi o kɔl ndɔ tuw bɛndoo nin, o cɔmnin ba ndɔ co o bɛɛndianndo le lɔɔ-o, o yelenyelen yinnde bɛndoo nin, o piɔɔ pɔ̀lɔ̀-pɔ̀lɔ̀ɔ́ bɛngu, o hoeyii fùkù-fùkùei nin, o loeon delian kpungban nin.

³¹ O kon, masa Asiriia yɔŋnunnin yoloma-yoloma a siòònde telen o tuɛinin diom Mɛlɛka-o sɔɛi-yo, Mɛlɛka soaŋnin ndu a kpulun ndɔɔ.

³² Telen óò telen Mɛlɛka heelu pɛ mò lɔɔ ndu pukun le ndu saangiaa, a lɔɔ dundulan a bondomalan. Mɛlɛka pila cɔlɔbanin ndu cɔlɔbaa pila a laba.

³³ Kabi lɔ́ɔ́ levil nin, bémbé iyɔmndo cuu toosiaa le ndu lomɔɔ, bémbé iyɔm kon toosian le masaa, o fonda tiilanndo nin nda ciiŋiaa bémbé iyɔm kon ni. Yɔmnde co lon taw-taw, yinnden le co nin lebɛɛndiaa len. Hoeyii fula Mɛlɛka o milin-nde mɛndulnin yinnde len mi le bii maa pee pɔmbɔ fungoo co ŋɔu nin-ndo.