Esai 3 - BII BILA

Yamɛi Yerusalɛmnda a Yudaa

¹ «Éé, la tofa vɔ, Maalii, Mɛlɛka-Nɔ-Kpaayaa-Kpow-vo co Yerusalɛmnda a Yudaa ɲɛ nda tiindan-ndo a ɲɛ nda kɔngan-ndo hiɔlɔɔ o ba, o co nda ɲɛdiaa nda co mandaa-o a mɛmma nda co mandaa-an poonda o ba,

² o co nda kuubaa a vanaa cɔwva soli tɛɛn, o co nda vanaa kialaa n'yamaa, vanaa-tɛɛngaa-diom Hala-a, vanaa sina siɔdiiyo-a a vanaa kɔlkalua soli tɛɛn,

³ o co nda simlacia vanaa cɔvaa beleŋuɛɛnu-beleŋuɛɛnua, vanaa bɛndua, vanaa silaa, vanaa caa baala labaa-a a vana bala kalaa hiɔlɔɔ o ba.

⁴ O dimi aa: ‹I yɔngunin nda cuaambɔa pɔmbɔa mà tosa masalen nda coo, mà kindi nda masalen tosaa coo a hɔlaa heelaa.

⁵ A saangiannin nda pila vellaa-velle, vanndo saangiaanin caan ndɔ, mì caan ndɔ kon bɛɛ saangiaa vana kon. Poambɔa pɔmbɔa delnin kaasoŋaa yuuvɛiya coo mì vanaa fondoa del vanaa tɔ̀a coo.

⁶ Vanndo kɔanin bɛɛ mò kɔ bii puapilɛ ndɔɔ háá o cɛi fuɲa ndɔ-o nin di›, mò dimul ndu aa: ‹Nɔm a nɔ ɲɛ cuɛinanndo o pilɛ, lelan nɔm va simlacinɔ naa, mà cua sɔɛi dɛnɛ tambɛiyo ho balan tan tiɔn!›

⁷ Vana kon mulinin paale len aa: ‹I co dɔtɔlɔnɔ le, i nɔ ɲɛdiaa a ɲɛ cuɛinan o ya lo cɛinin te. Lelan la siinguu ya simlacinɔ vannda le!›

⁸ Yerusalɛm siɛla, Yuda komba mó pimbulu, kani sɔɔn ndan sondon a dɛnnda ndalan la co Mɛlɛka cɔlɔbaa. A co biilu ndɔɔ simullo.

⁹ Hɔlaa ndaa co nda seilen tɛndallo kpendekele. A co hakila ndalan solio ceen vakpa. Mɛ̀ɛ́-mɛ̀ɛ́ sodɔmnda va tosaa yɛ, a co lan tɔ́ɔ́ keeliaa o co bɛɛ o vionnɔn nin te! Lelan, dɛnɛ palaa co nda cum! Kani a cii dɛnɛ palaa toosiaa le nda pila.

¹⁰ La yonda mì la dimul vana sandaa maa o sɔlanin dɛnɛ kɛndɔɔ, bau o dianin kɔmnde dɛnnda ndɔlan tɔnɔ.

¹¹ Dɛnɛ palaa co le vana kɔlvesɛiyo! Sangaa co ndu cum! Kani o sɔlanin tɔnɔ vali bala ndɔlan la co tosaa-o.

¹² Cuaambɔa pɔmbɔ-pɔmbɔa co vanaa niaa bɛpɛlaa ni. Vanlaandua nɔ nda kpaayaa coo ni. Éé niaa vanaa niaa, laasiaa daama vanaa co niaa simndan laci-a co niaa lende nuaa ni. A co nɛi niaa co kɔlan coo-o tuunduuvo tuŋ.

¹³ Mɛlɛka cɛn mò sim le yamɛi kiolɔɔ, o co isisi le yamɛi vannda kiolɔɔ.

¹⁴ Mɛlɛka co yamɛi kaasoŋaa kɔlkalua a simlacia yungu ndɔɔ kiolɔɔ aa: ‹La cii tumnda n'rɛsɛnndan tɛɛmbuu, ɲɛm niaa puu vanaa bala fondoa o ba-on co niaa o laba o cɛila niaalan nin!

¹⁵ Le kɔlɔ yɛɛ niaa co yɛ yungu nuu ciimiaa ho, mì la va vanacieeyɛi vanaa bala fondoa nɛwvo a labɛngu? Maalii, Mɛlɛka-Nɔ-Kpaayaa-Kpow-vo ɲuna nuaa ni.›»

Yamɛi Hala kilul vanlaandua Yerusalɛm-nde

¹⁶ Mɛlɛka dimi aa: «Le co cuavaa laandua Siɔn co vanaa heelannda-o, le kɔla nda kɔa a kɛson kindio a á tofa heelanndo lan, le kɔla nda kɔa a nɛiyo ɲɛɛngi-ɲɛɛngi a bamban co nda o labɛngu-on biiŋoo vɔkɔlɔ-vɔkɔlɔ-o,

¹⁷ Ya Mɛlɛka, i co nda tembeltan sendi, mì soli nda tumnda fondo fúú!

¹⁸ Paale len, Maalii yunganin nda, mò puu bamban nda vownun mun o n'pelu le pelon kɛɛmiaa-on o ba, mò puu nda yoei yiyaa iyiinde, yɔlɔn labolon,

¹⁹ kelan lanion, kelan laban, kolala vaan-vaannda nda kuumbun o hɔl-tan,

²⁰ boofiaalan, yɔlɔn pɔmbɔn n'pelon, kolacooe, sianila malasikɔlɔlan, yaayaan pɔmbɔ-pɔmbɔn,

²¹ kelan n'suon, yɔlɔn lamilinndon,

²² volɔɔla cuɛinannda sɔvɛlan, domala bɛndula vungbanndan, domala lecoolan, bɔlɔla yáwlan,

²³ tofanndan, domala fɛtufɛtulan, kookoola leboltan a yoei vaanvaaŋii nda yiinun o lebol-le o laba.

²⁴ O kon, cun kɛndɛ malasikɔlɔ ve lɛnin fula le, fɔ cun vɔɔn ɲɛ siovɛiyo. A yiinun ndɛnin ikolacoo le, fɔ yoei fondoei. A nɔ lɛnin lavɔɔ kɛndɛ o lebol te, fɔ tembeltan. A nɔ lɛnin volɔɔla cuɛinannda sɔvɛ le, fɔ yalala yuululan. A niŋ ndɛnin tofa le, a vanin a vɔɔn koloɲan!»

Vanlaandua piaandaa ndaa vunin Yerusalɛm-nda

²⁵ «Vanpiaandua niaa cuunin cɛɛlɔn o mɔɛi cɔwve bɛngu, mì kuubaa niaa vi o cɔwvo.

²⁶ Diola luɛyaala kpakio Siɔn la dɔawnunnin ɲinkon yɛɛvɛ, mì dɛnɛ palaa tol tan coo. Kobi kon tambunin mì vanaa co lenin-nda cal lɛŋ vɔyɔn!»