Esai 29 - BII BILA

Le Tambii Yerusalɛm-nde

¹ Dɛnɛ palaa co le Ariɛl! A toɲa, dɛnɛ palaa co Ariɛl cum, kobi David ndóò kila dɔ́ɔ́ngɔ́ɔ̀ o hɔl-ndɔ le ndu biyɔɔ-o pɛɛn. La yeema pɛ la cɔɔlu vɔsio handɔɔ o vɔsio coo, kafolan tuŋ niaa tosa ni, la kandu pɛ, la balu lan tosaa pindo.

² O kon, i tiilanin kobio Ariɛl, vanaa co lenin-nda cɛɛŋunnin ma somisomin taw. Kobi kon siŋnunnin maa yinndaceele le ya.

³ I tiilanin niaa ba-ba fee. I lueinin niaa o píŋndo nin a kundala cɔwla nilan, i baŋnin kungala saasalan le niaa biyɔɔ.

⁴ La delnin mì la luɛi lɛŋ dí, o lɛŋnden bɛngu dí sɔɛi niɛi vanin fulaa ni, mì kei bɔndɔla o cundoo nin. Diom niaa vanin fulaa lɛŋ maa diom kalankafo, sɔɛi niɛi fulanin o puuloo bɛngu ɲiimu-ɲiimu.

⁵ Yaamɔaa niaa vanin sɛ́lɛ́ taw-taw maa cundu yukuyukoo, sɛ́lɛ́ bɛndu kuubaa cɔvaa kan vanin maa foeeŋii kɔannun o hoeiye nin-nde. Kon tosannin a kiltan kúlù-kùlù o telen bingi bɛngu.

⁶ Mɛlɛka-Nɔ-Kpaayaa-Kpow-vo toalnin niaa tɛɛn a diom mataŋndo, a lɛŋnde ɲiiyaalen, a vóólun-vóólunn bɛndoo, a felenfelen bɛndoo, a hoeyii fùkù-fùkùei a á yinnde yelenyelennde bɛndulen.

⁷ Mɛɛ lɔma sɔlaan ma co nuaa yɛ, mɛɛ vundule yilɛnnden le tosan icɔl nuaa yɛ, lende koni ɲɔɔ tosalannin sɛ́lɛ́ bɛndu vanaa-mangalaa-isɔaa vanin cɔwvo tosaa a kobio Ariɛl-la ni, lende koni ɲɔɔ tosalannin vanaa cɔvaa co lenin-nda ni, lende kungala-saasaala nda baŋ le ndu delɔɔ coo a cɔwvo lan la vanin ni, lende vanaa tiila ndu-a vanin ni.

⁸ Ɲɔɔ tosannin maa mɛɛ vana yiaan ma co nɛiyo-o sɔl lɔan mo va ɲɛdiaa dioo o lɔma sɔlaama man nin yɛ. Kɛ te o tendu pɛ, o sinan maa dembe ndɔɔ connun fondo, te kon te maa mɛɛ vana kolɔɔ bii-o sɔl lɔan mo va kolɔɔ nuaa yɛ, kɛ o tendu pɛ, o yɔŋnun fando-fando, o sinan bolole vesɛilen. Lende ɲɔɔ tosalannin sɛ́lɛ́ bɛndu vanaa-mangalaa-isɔɔa del pembei Siɔn coo a cɔwvo-a ni.

⁹ La voolu mì la dɔwnun kɔndɔfili! La kinda hɔltan mì la suma, la lo a sumɛiya lende! La yɔŋnun yingo-yingo, kɛ o va a mamɔi o hɔl te, la va boŋiboŋio kɛ, o va mɛɛ vana kol man taw yɛ le!

¹⁰ Kani Mɛlɛka cucu kɔl dialun vílɛ́i bɛndoo niaa coo, o kinda hɔlta niaalan (niaa vanaa-tɛɛngaa-diom Hala-a), o kumbu bolii niɛi (niaa vanaa sina siɔdii lacio-a).

¹¹ Dɛnnda cɔɔmuanndan kpow la siŋnun le niaa maa mɛɛ diomnda sɛvan o sɛbɛ simbulaa coo, ma simbul sɛbɛ kon ma kinda kpáŋ-ndan la co nuaa yɛ, o kon, a yɔngu vanndo pum sɛbɛ simbulaa kon, a dimul ndu aa: «Dimi sɛbɔɔ ho», mì vana kon muli aa: «I tiwba le, kani o co o kindaa kpáŋ.»

¹² Te kon te mà yɔngu vana sina sɛbɛ loo sɛbɔɔ le tofaa lenin, mà dimul ndu aa: «Dimi sɛbɔɔ ho», kɛ mì vana kon dimi aa: «I sina sɛbɛ le.»

¹³ Maalii dimi aa: «A sɔɛi sondoei daama vannda ha co sɔɔnguuo ya o ibuŋ ni, a n'cɔcɔ daama nda co ya biiloo ni, kɛ kɔlta ndalan la co bɔɔ levil a ya, siòòŋii nda nɔ a ya-e, tɔŋ dɛnɛ ivanacieeyaa daama i co ni.

¹⁴ Lelan, i soaŋnin vɛlɛ nda a kaamaalan, a dɛnnda kɔndɔfiltan. Kɔlkalu vanaa kɔlkalua ndaa tambunin mì dɛnɛ sinaa vanaa dɛnɛ sinaa ndaa ɲum.

¹⁵ Dɛnɛ palaa co le vanaa co tulaa ndalan vionɔɔ-a, vanaa co lan Mɛlɛka vinndo-a pɛɛn. A co dɛnnda ndalan tosaa o ɲumndan nin, a co dimio aa: «Nɛ̀ɛ́-nɛ̀ co yɛ naa cɔu? Nɛ̀ɛ́-nɛ̀ sina yɛ naa nɛ?»

¹⁶ Mbɔ̀ niaa la laasian bɔɔ! Bàà mì vana ce vanaciee cɔavaa n'kpɛɛnɔɔ ɲɛ pilɔɔ nda puulu cɔavaa n'kpɛɛnɔɔ? Vɛ̀ɛ̀ baala tosan-ndo nɔla pá mo dimul vana tosa ndu-o aa: «O co nɔm te tosa ya le?» Vɛ̀ɛ̀ kpɛɛnɛi nɔla pá mì i dimul vana cɔw ndi-o aa: «O sina dɛnɛ le?»

Ɲɛ-ɲɛ mangalan kpow

¹⁷ O lo ɲɛ-pɔmbɔ mì lɛŋnde Liban-nden le siŋnun yondo yɔmii koamɛi tɔlnun coo-o, mì yɔmii koamɛi ken siŋnun maa bundɛ.

¹⁸ O palɛi ken nin, vanaa nila baŋulɛiya tuɛinin sɔɔn co o sɛbɔɔ nin-ndon, hɔlta vanaa sumɛiya la fulanin o ɲumndan nin a o ɲumma n'kpungban nin, mì la ce válán.

¹⁹ Vanaa ikɔɔa dɔawnunnin ɲaale taw o Mɛlɛka nin, vanaa bala fondoa siinguunin O-Diandaa Israɛlla kɔlkɛndɛ ndaa.

²⁰ Kani masaa kɔlvesɛiya a cuunin kpow, vanaa mam vannda-a ve lɛnin te, vanaa va lɔan lahɔl le dɛnɛ vɔɔndo tosaa-a kpede a diwnunnin.

²¹ Vanaa va caanda yaalaa o nɛɛ kialaa n'yamaa-a, a va vanaa va dɛnɛ sandaa solio ceen o dio luɛyaa-a yaŋɔɔlan miingullo-a, a va vanaa sandaa faŋaa o fondala ndalan fondo fúú-a kpow a ve lɛnin te.

²² Lelan, nuaa Mɛlɛka, o co Hala cuavaa-imamaa Yakɔb-a-o, o baŋa Abraham-ndo dimi ni aa: «Sunsun nin, siɛmbula bii lɛnin cuavaa-imamaa Yakɔb-a le, hɔlaa ndaa muungu lɛnin yifidii le.

²³ Kani telen cuavaa nda canin baala bala nilan la tosa-o nda tɛɛn-ndo, a dindinin diola nilan, a kenin ya bɛɛlen, ya co O-Diandaa polale Yakɔb len-ndo, a nɔnin siòòŋii nii, ya Hala cuavaa Israɛlla.

²⁴ Vanaa yiyanda ndalan la va laasianndo-a siŋnunnin vanaa sinaa dɛnɛ, vanaa va sɔɔn pɔmbɔm ɲiimu-ɲiimon sɔɛi-ya sɔlanin pɛɛkoo.»