Esai 27 - BII BILA

¹ Paale len, Mɛlɛka cuanin mɔɛi ndɔɛi cɔvii luɛyɛi, mɔɛi ndɔɛi bɛnduei, mɔɛi ndɔɛi mayoomui ken, mo lɔva N'Yalɛ́iyo, kɛw ɲaanan kon, ɲina-kɛw hiŋnun kon taw-taw-vo. O diinin ɲɛ yoomaa vɔɔn kɔndɔfili co kon o mɛmma ihɛllan nin-ndo.

Condei o nakɔ n'rɛsɛn Mɛlɛka-o coo

² Paale len le tiiya pɛ, la soli condii nakɔ n'rɛsɛn kɔmnde kɛndɛ kon aa:

³ «Ya Mɛlɛka, ya co vana mandaa nakɔ kon ni, telen oo telen, i co ndu pɔɔliaa. Paalen a ɲumndan, i co cumullo le ndu mandaa, yɔŋii vannda hun luɛi lenin a kalan.

⁴ I co lɛ a kɔltuw le, kɛ te yɔɔn a siɛmbullon va pɛ lenin, i kuelnin yɔɔn mun a cɔwvo mì kɔ lom mun kpede.

⁵ Fɔ mì vannda kɛɛ dɔ́ɔ́ le ya sinaa maa nɛɛ ndaa viannan, mà kɛɛ dɔ́ɔ́ le kɔlɲuloo lueiyo naa ndaa tɛɛn dɛ! Mbɔ̀ fɔ mà kɛɛ dɔ́ɔ́ le kɔlɲuloo lueiyo naa ndaa tɛɛn.»

Dɛnɛ Israɛlla o siɔdii lacio nin

⁶ O siɔdii lacio nin, polale Yakɔb len le vulnin puundon, cuavaa Israɛlla solinin yandɔɔlan mì pei lendei fula lon, o kon, a peinin ceendo a yɛyii ndɛi.

⁷ Bàà mɛɛ Mɛlɛka soŋ vanaa va Israɛlla soŋɔ̀ɔ́-a yɛ o soŋ vɛlɛ Israɛlaa kan ni? Bàà mo diw nda mɛɛ o diw vanaa va nda diwvo-a yɛ?

⁸ Ɛ-ɛ, o yɔŋnun lende le, kɛ tùúlen n bandìla nda ni, má toaw nda ma fula o lɛŋnde ndalen nin, má kɔandu nda o hoeyii fùkù-fùkùi fula a ba paalen le can-ndo-e nin.

⁹ Nuaa cuavaa Yakɔb-a sɔlanin baŋaa a tɛɛmbuu ndaa ni, tofa vɔ kɔmnde fulanin o haki nda malnin nda-o nin-nden, Mɛlɛka siinguunin powta nda cɔw máánnda soolaalan-ndan, maa powta humbula cuinun mì la cacun maa cundu lan, yɔmii soolɛi a piɔmaa nɔ tuulaa maa lepala-a la muungu lɛnin isisi lɔ́ɔ́-lɔ́ɔ̀ le.

¹⁰ Kani kobi mayoomoo lonin fondo fúú, o siŋnunnin fonda vannda piow-vo, o siŋnunnin fonda malnun-ndo maa lɛŋnde veselɛilen. Navaa téndéa vanin billo dioo lon, a vanin hinilan pɛngio lon ma va lɛwvon sɔmndo.

¹¹ Lɛɛndun mun vesa pɛ, vannda yimi ɲaandan mun, vanlaandua hin le mun lomɔɔ. Kani vanaa nɔ kɔlkalu le-a nda co ni, lelan, vana toosiaa nda-o nɔnin iɲíí a nda le, vana cɔw nda-o tosal-lɛnin nda ikɛndɛ le.

Le muungu Israɛlla o nda lo

¹² O palɛi ken nin, Mɛlɛka lɔaanin kullon mì n cɛɛlun, kandɔɔ o pee bɛndoo, kɔlan tiiya háá o pee pɔmbɔɔ Esipte, o kon niaa cuavaa Israɛlla, a cɔwviaanin niaa a pilɛn-pilɛnnda!

¹³ Paale len a hɔŋnin bulu bɛndoo, o kon, vanaa va ɲawvo o lɛŋnde Asiri len nin-nda a vanaa va o ɲaanɔnndo nin o lɛŋnde Esipte len nin-nda hunnin, mà hun baŋ vulan Mɛlɛka o labɛngunin o pembii diandɛi coo, Yerusalɛm ciee.