Esai 26 - BII BILA

Condii kobi mayoomuei, condii vanaa sɔla baŋaa-a

¹ O palɛi ken nin, a solinin condei he o tàndá Yuda-o nin aa: «N nɔ kobi mayoomoo o kungaa ɲɛkɛndɛi, Mɛlɛka yɔngu naa cindaa, mí cinda kon siŋnun kpakio a sungbule makɔɔlen le naa.

² La kumbi diolan haliko mi vanaa-mangalaa-isɔɔa sandaa lo o diomnden coo-a luɛi.

³ Ke vana kɛsi kɔl ndɔɔ nɔm coo-o kɔlɲulu kpeekpeiyo, kani nɔm o tiindan ni.

⁴ Lelan la handu laalan niaa Mɛlɛka coo le fɛɛn a fɛɛn. Kani Mɛlɛka co pow kpovaa le fɛɛn a fɛɛn ni.

⁵ O cɛɛluu vanaa co icali o fondala yesalan coo-a, o pesipesi kobi latɔ́ɔ́-tɔ́ɔ́, mó yuuliaa ndu lɛŋ dí, o lɔngɔliaa ndu o loolio nin.

⁶ Kpòkóó! Kobi bɛndoo ho nɛwnun a labɛngu fɔ, vanaa bala fondoa a nɛw ndu a labɛngu, vanaa ikɔɔa nɛw ndu a n'pelu.»

Piɛile telen mɛɛlaa len

⁷ Nɛi vana sandaa, o sandaa sakpo o co ni. Nɔm vana sandaa n co ni, nɔm peelu nɛi vana sandaa ni.

⁸ Éé Mɛlɛka! N co nɔm cumndo o nɛi tɔŋnda nɔmndan la cɔm naa-o coo, yeemɛi co naa o lakɔl taw-taw le diola nɔmndan piɔlɔɔ a le loonɔnndo a nɔm o kɔɔ.

⁹ Yeemɛi co yoomu nuu biyɔɔ taw o ɲumndan nin le nɔm, kɔl ni co ya nin-ndo co nɔm nuwviaa idii a yeemɛi taw. Kani te yaman nɔmndon kiolu pɛ o lɛŋnden coo, vanaa co o ceendo coo-a sina dɛnɛ sandaa.

¹⁰ Kɛ vana tosal bɛɛ vanaa kɔlvesɛiyo kɛndɛi, o sinanin dɛnɛ sandaa le. O tosanin dɛnɛ vɔɔndo o lɛŋnde dɛnɛ sandaalen coo, o cinin bɔɔbɔɔyɛi Mɛlɛka-e le.

¹¹ Òó Mɛlɛka, ba nɔmndo co o heelaa, kɛ nda a co ndu cɔ le. Kɛ a canin dialun fulaan nɔmndon le vanaa nɔmnda, o kon siɛmbulan la toalnin nda. Yinnde n kɛsi le yaamɔaa nɔmnda lomɔɔlen le loamnin nda ma cuulu mungén.

¹² Nɔm Mɛlɛka co naa kɔlɲuloo yɔngoo ni, kani ɲɛ-ɲɛ naa n co tosaa, nɔm co kon toosiaa le naa ni.

¹³ Òó Mɛlɛka Hala naa! Vanaa bɛndua celen co maa nɔm te-a a tosa masalen naa coo. Kɛ nɔm pilɛ kpé tosa ni mì n va diola nɔmndan piɔlɔɔ.

¹⁴ Vanaa vi-a a muungu lɛnin nanu le, vunduma ndan ma cen ndɛnin te, kani nɔm Mɛlɛka soŋ nda ni, nɔm diw nda ni. A tɛɛmbuu nda, vana loonun ndɛnin a nda o kɔɔ le.

¹⁵ Òó Mɛlɛka, a vangala vanaa-mangalaa-isɔɔa mà kui, a vangala nda mà soli biilu nɔmndo ceen o nda nin. A nan pɛɛngula lelɛŋndan kɔɔli-kɔɔli.

¹⁶ Mɛlɛka, a nuwviaa nɔm telen nda va o sangaa nin-ndo, telen n soŋ nda le nda silaa-o, má piɛi nɔm taw-taw.

¹⁷ Maa mɛɛ vanalanɔ pulei biŋin le violɔɔ-o ɲumbuɲumbun a caŋndo telen o va hɔ́ɔ́ violɔɔ-o nuaa yɛ, lende naa n va nɔm o hɔl ni, nɔm Mɛlɛka pɛɛn.

¹⁸ N cua folio, mí pulei biŋin naa le violɔɔ, kɛ mí n vialu hoeiye. N yɔngu lɛŋnden cinda le, n cuu vanndacieea sɛnɛi o ceendo coo le.

Vanaa vi-a tendulnin

¹⁹ Kɛ vanvílɛ́yaa nɔmnda muungunin yoomu, dialun vanaa nɔmaa vi-a n tendulnin! La tendul, la yɛkɛlan a kɔlkɛndɔɔ, niaa co o cundoo nin o lɛŋnden bɛngu-a! Kani mɔ́m mingi yoomoo-o mɔ́m nɔmndo co ni. Lɛŋnden le minginin vanaa vi-a yoomu ma ce paalen.

²⁰ Lelan, niaa co vanaa niaa-a, la kɔ, la luɛi o cɛila niaala lɔlaalan nin mì la kindan koŋndan niaa kɔɔli, la kɔ vionnun ndon le telen bingi háá mi kɔltuwvo ɲulul.

²¹ Kani la tofa vɔ, Mɛlɛka co fulaa o calta ndɔlan nin le vanaa co o lɛŋnden coo-a soŋɔ̀ɔ́, le dɛnnda vɔɔnnda ndalan. Lɛŋnden le solinin kooma deli lecoo-an ceen vakpa, le vin ndɛnin vanaa nda diw lecoo-a le.