Esai 24 - BII BILA

Lɛŋnden le dɔwnun yɛɛvɛ

¹ La tofa vɔ, Mɛlɛka co lɛŋnden yɛɛvɛ dɔvɔɔ mò salu ɲɛ-ɲɛ co lecoo mì le lo fondo. O puusiaanin nden mò sɛŋi vanndacieea co icali lecoo-a.

² Sanga pilɔɔ kpé toalnin vannda kpede coo ni, vanaa-solia-lasálàá nda vanaa co vanaa-solia-lasálà le-a, vana bɛndoo nda cɛ ndɔɔ, vana bɛndu laandoo nda cɛ ndɔ laandoo, yulanɔɔ nda vana piandaa, vana dɔnda vanndo ɲɔɔ-o nda vana o dɔnda-o, vana yɔngu kueo-vo nda vana cua kueo-vo.

³ Lɛŋnden kpow le tambunin, ɲɛ-ɲɛ co lecoo o yungannin kpow. Kani Mɛlɛka o sondo sɔɛi he fula ni.

⁴ «Lɛŋnden le co o dɛnɛ palaa nin, le siɔŋ. Ceendo kpede dɔwnun yɛɛvɛ, simlacia co o lɛŋnden coo-a dɔwnun yɛɛvɛ a lɛŋnden latulu.»

⁵ Vanaa va o lɛŋnden coo-a ndáà cii len nɔɔliaa, kani a va tɔŋndan tɛɛmbuuo a silalan laasiaa, a va kpema yiinun le fɛɛn a fɛɛn-ndo tɛɛmbuuo.

⁶ Lelan dangaa co lɛŋnde kalalen hulɔnndo coo ni, vanaa co o lɛŋnden coo-a co sangaa sɔlaa le hakila ndalan, lelan nda co cuuo nuaa kpede ni, a pilɛn-pilɛn daama nda co lou ni.

Mɔnɛi luɛi o kobio nin

⁷ Mɔima yɛngian ma co a mɔnɛi, kani tumnda n'rɛsɛnndan la luɛi kɔsɔ. Vanaa va a ɲaaloo-a kpow a lo a yeemɛi.

⁸ Kɔlkɛndɛ ladundoo cuu few, vóólun-vóólunn ɲaale bɛndoo ɲum pɔ́lì, kɔlkɛndɛ labondomaa mei kpili.

⁹ Vana kol-lɛnin mɔiyan a condon solio le, mɔima kálà-kálàn ma lol vanaa kolaa o lasondo kélélé.

¹⁰ Kobi lo hoo fondo fúú-o piɔl mó siŋnun pɔmndo. Cɛilan kpede la co lakiindiaalan, vana co luɛyɔɔ lenin te.

¹¹ Vannda co yoondiaalan o nɛilan coo le mɔiyan sɔlaa, kani mɔima co lɛ hali ɲɛ-pɔmbɔ le. Kponyo kɔlkɛndɔɔ kpow cuu, ɲaaloo vɔɔsun o lɛŋnden nin few-few.

¹² Mɔnɛi daama lo o kobio nin ni, dio luɛyaa kobio piɔsi, o tɛɛndiaa kpede.

¹³ Lende ɲɔɔ tosannin o lɛŋnden kpow coo vanaa-mangalaa-isɔɔa tɛɛn ni, vannda lonin doolɛ maa telen ndáà kiandu oliveon-ndo, maa telen nda hun rɛsɛŋun tɔ̀un lo o rɛsɛn tumndo coo-on fɛɛliaa lɔ́ɔ́ kiɔndɔɔ cuu-o-o.

Vanaa lonin yoomu-a lisanin Mɛlɛka

¹⁴ O kon, vanaa lonin yoomu-a heelunin diomndan, a yondanin ma lisa bɔɔbɔɔyɛi Mɛlɛka-e. A dɔawnunnin ɲaale taw-taw o mɛmma ihɛllan kɔngɔ.

¹⁵ A biilunin vɛlɛ Mɛlɛka nɛɛ ɲɛ-tengaa co biyɔɔ-a, a biilunin diola Mɛlɛka, Hala Israɛlla lan o lɛŋii co o mɛmma ihɛllan tɛɛn-nde nin.

¹⁶ N tuɛinin vannda condon solio nɛɛ lɛŋnden le mɛɛlu-a aa: «Biiloo co le vana sandaa!» Kɛ ya mí dimi aa: «Kpòkóó ya! I laasian! I dɔwnun yɛɛvɛ! Mbɔ̀ ya i kɔndu dɛnɛ fɔ́! Kani vanaa yii ya dúmbú-a co dúmbúlan yiiyo, a toɲa, vanaa yiiyaa ladúmbúa co lan yiiyo kpeekpei!

¹⁷ Niaa co icali o lɛŋnden nden nin-nda, siòònde, soon bɛndoo a yalalan la dɔawnin niaa yɛɛvɛ!

¹⁸ Vana-vana ɲaanun pɛ yoondiaala isiòònndan, ndu delnin o soondo nin. Vana-vana del pɛ o soondo nin mo fula, ndu hawnin o yalaa nin. Kani diola pɔmbɔlan o halataala la kumbin, lɛŋnden le hiilun o tumndo dí.

¹⁹ Lɛŋnden le sɛɛsiaa, le tɛɛndiaa, lɛŋnden le hiilun yongban-yongban.

²⁰ Lɛŋnden le hiilun mɛɛ vana mɔiyan ma co o hɔl-lo siɛɛliaa nuaa yɛ. Lɛŋnden le yɛmban mɛɛ kuuvo yɛmban nuaa yɛ, haki ndɔɔ co ndu coo mo va ndu kindilaa. Lɛŋnden le komba, le cen-ndɛ le.

Mɛɛlulan a kandɔn sɛnɛiyo

²¹ O palɛi ken nin, Mɛlɛka soaŋnin ɲɛm cɔvun co o halataala-on, mò kposoŋa masaa co o lɛŋnden coo-a.

²² A biinin nda kpow, mà cuungiaa nda, mà mal nda o soondo nin. A kindanin nda o cɛila kaasolan nin ndon, a viow pɛ lon taw-taw, a saangiaa nda.

²³ Siɛmbulan la biinin paangei, paalen le tambunin labɛɛ, kani Mɛlɛka-Nɔ-Kpaayaa-Kpow-vo tosanin masalen o pembei Siɔn coo a o kobio Yerusalɛm coo. O tosanin mi biilu ndɔɔ va tengaa kaasoŋaa kɔlkalua ndɔa coo.