Esai 23 - BII BILA

Le tambii kobio Tir a kobio Sidɔn-nde

¹ Sɔɛi dimin o kobio Tir coo-e co hee ni aa: «Niaa vanaa co kelaa yulalen o mɛnndan coo Tarsis-a, la somisomin! Kani fonda niáá tiindan-ndo piɔl vɔ́-vɔ́! Hali cɛiyo ndu pilɛ, o lo lɛ lon te! Tuma nda va cɔnɔnndo o lɛŋnde Kitim-nden nin le muungoo-o nda saalun fonda niaa kon ni.

² Niaa vanaa co icali o mɛnndan kɔngɔ-a, la mei kpili-kpili a siòònde. Niaa yulaa Sidɔn, niaa kiilaa niaa co kelaa o mɛmma ihɛllan coo-a pɛɛn.

³ Malun ndáà váà o peo Nil holnɔnndo-on a ɲɛ-ɲɛ va kownɔnndo o pee kon kɔngɔ, ndu va ɲɛ-sɔlaa kobi niaa kon ni. O mɛmma bɛnduan coo ɲɛm mun va keiyo ni. Kobi niaa kon va fonda malaa lɔ́ɔ́ le vanaa-mangalaa-isɔaa tɔ̀a ni.

⁴ Kpòkóó kobio Sidɔn, ɔ́ɔ̀ siɛmbula hiow lan-ndan, nɔm co nɛɛ viannannda le mɛmma ihɛllan-ndo! Mɛmma ihɛllan ma soo, mí ma dimi aa: «Dembe vialaa nɛi ya le, i vilu cua le. I manda cuavaa piaandu le, i manda cuavaa laandu le.»

⁵ Tuma Esiptea tuɛinin sɔɛi he-o, lɔ́ɔ́ nda tuɛinin le tambii kobio Tir-e o, a ɲiiyanin ma yɔŋnun yoloma-yoloma!

⁶ Niaa co icali o mɛmma ihɛllan kɔngɔ-a, la taŋ-ndɔ mì la kɔɛ háá Tarsis. La kɔ mì la kɔ hiila hiko-hiko a caŋndo.

⁷ Vɛ̀ɛ̀ mò va maa kobi niaa kɔlkɛndɛ bɛndoo co kon ni? Vɛ̀ɛ̀ kobi niaa tangulun sindɛ-sindɛ-o co kon ni? Vɛ̀ɛ̀ kobi va kɔlan nɛɛ levil-vil-lo co kon ni?

⁸ Nɛ̀ɛ́-nɛ̀ tuu yɛ sanga bɛndoo ho, mó tuisi ndu kobio Tir va hoo mɔsilta lemasalan piɔwvo-o coo? Yulaa va o kobio ho nin-nda, cuavaa lemasaa nda va ni. Vanaa vannda ke bɛɛlen o lɛŋnden coo-a nda va ni.

⁹ … Se Mɛlɛka-Nɔ-Kpaayaa-Kpow-vo tuu sanga bɛndoo ho ni. O tuisi ndu nda coo le yonga vanaa nda co bɛɛlen yɔngoo-a tɛɛmbuuo a le vanaa bɛndua co o lɛŋnden coo-a siɛmbulan tuisio.

¹⁰ Lelan, niaa vannda Tarsis, la kɔ mi la vàá yondola niaalan mɛɛ Esiptea co la ndalan vàá o dɛɛlala holnun peo Nil tan nin yɛ, kani nɛɛ simia dɛ̀ndɛ̀la mamɛn co lɛ le!

¹¹ Bau Mɛlɛka siɛndi ba ndɔɔ o mɛmma ihɛllan coo. O hiiluu masɛi yongban-yongban, O dimul vannda le fondala mayoomulan Kanaan tɛɛmbuuo.

¹² O dimi aa: «Niaa Sidɔnnda, kɔlkɛndɔɔ cuu le niaa, la co macoaa maa cuaambɔ laandu nda kpuva-o! Lelan la cɔn, la taŋ mi la kɔɛ o lɛŋnde Kitim-nden nin! Hali lon bɛɛ, pɛngi ve lɛnin le niaa le.

¹³ La tofa vɔ lɛŋnde Kaldea, vanaa-mangalaa-isɔaa kan co lɛ le, Asiri mingi lɛŋnde len fonda ɲaiyea yondoa. A tangul cɛila coocoola cumulaa lan Tir, a co lan koombiaa, ma va lan mingio bémbélan kposon.

¹⁴ Lelan, niaa vanaa co kelaa yulalen o mɛnndan coo Tarsis-a, la ŋɔɔcian, kani fonda mayoomu niaa tambu!

¹⁵ O telen kon nin, vannda pɔɛɛnunnin a Tir o kɔɔ háá le vɔsilan belaŋɔmmɛw, vɔsila masaa cii nin yoomu lan pɛɛn. Vɔsila lan la cuu pɛ, ɲɔɔ yɔŋnunnin Tir maa mɛɛ o yɔŋnun vanalanɔ suundɛi nda solul condei-yo yɛ aa:

¹⁶ «Nɔm vanalanɔ suundɛi nda pɔɛɛnun hoo-o, cua bondomaa ma kɔ balu kobio. Lɔɔ bondomaa ɲɛkɛndɛi, soli condon, cɔɔlu sondoo mingi o condun nɔmndon coo, haliko mi vannda loonun a nɔm o kɔɔ.»

¹⁷ O vɔsila belaŋɔmmɛwla lan mɛɛlulan, Mɛlɛka yiyannin kobio Tir coo. O kon, Tir muungunin vɛlɛ o tɔnɔ suunda ndɔɔ nin, o suundanin vɛlɛ a masɛi co o lɛŋnden coo-e kpede.

¹⁸ Kɛ sala ndɔ kon a ɲɛ-sɔlaa ndɔ nɔɔlɛi kon solinnin sálàà le Mɛlɛka. Vana cuungiaanin ɲɛm mun te, vana mandanin mun te. Kɛ ɲɛm mun vanin baloo le vanaa co vallo tosaa Mɛlɛka o hɔl-la ni, haliko ma de ma pim ca. Ɲɛm mun koni vanin vɛlɛ ɲɛ cuɛinan kɛndɔɔ le nda ni.