Esai 22 - BII BILA

Le tambii Yerusalɛm-nde

¹ Sɔɛi dimin o ból vana ca siɔdii lacio nin-ndo coo-e co hee ni: «Yɛɛ nɛ yɔŋnun yɛ nɔm mi vanaa nɔmnda kpow va helɔɔ o yindɔla cɛilan coo?

² Nɔm kobi vɔkɔ-vɔkɔ bɛndoo co hoo nin-ndo, nɔm kobi bɔɔluu kɔlkɛndɛ bɛndoo co hoo nin-ndo, vanaa vunin o vanaa nɔmnda tɛɛn-nda, a vinin o mɔɛi cɔw bɛngu le, a vinin vɛlɛ o cɔw nin te.

³ Simlacia vanaa nɔmnda co ɲaanɔnndo latulu, vanaa vuaa lakpaasiaa biw nda kpede. A vuu bɛɛ nda a lakpaasiaa le, a laba nda biw nda kpow ni. Ndáà ɲaanun nin levil polon, kɛ ma siinguu nda vanaa kaasoa!

⁴ Lelan ya dimi ni aa: «La faŋa hɔlaa niaa ya kɔɔli, la mal-la mi caŋ taw-taw. La kindikindin le ya ɲɔɔloo le dɛnɛ palaa tol vanaa niaa co o kobi nuu nin-nda coo-o le.

⁵ Kani paale dɛnɛ tambɛilen, paale bɛpɛlaalen a paale lasiɛmbu len le co hau ni. Maalii, Mɛlɛka-Nɔ-Kpaayaa-Kpow-vo tuisi paalen-nden o ból vana ca siɔdii lacio nin-ndo coo ni. Vannda co kpakilan koombiaa, yoondiaalan la co sɔɛi a kpengii n'pembue.

⁶ Vannda Elam sayian bɔlɔla ndala vovaa n'kɔɔlan, ɲɛla ɲaanannda soa nan-ndan a vanaa cɔwva lenin, a vanaa ɲaanun o soa coo-a co hunɔɔ a sɔɔnguuo. Vannda Kir soli kɔ̀ɔ̀la cɔwlan.

⁷ Bólta nɔmnda hiow naŋɔɔlan la pɛ cá a ɲɛla ɲaanannda soa nan-ndan. Vanaa ɲaanun a soa-a co isisi a polan o diola luɛyaala nɔmndan le cɔwvo.

⁸ Ɲɛ tàndá Yuda-o ndóò vennun bɛngu-o kpeeŋan ndu coo. Paale len, mí la muli hɔlla o ɲɛm cɔvun co n'mandaa o cɛi bundɔɔ nin-ndon.

⁹ Niaa pila tofa mi la ca mɛɛ tɛɛngon co sɛ́lɛ́ bɛndoo o kpaki kobi masaa David-o yɛ. Mí la cuungiaa mɛnndan o dala co lebɛngu-o nin.

¹⁰ Mí la cɔm cɛilan Yerusalɛm, mí la pesi lan le kpaki kanda kobi niaa-o cɔɔloo cɔvɔɔ ɲɛkɛndɛi.

¹¹ Mɛɛ niaa cii, mí la toosiaa fonda mandaa mamɛnndo o kpakila tiɔnndan tɛɛn le mɛmma dala paanduan. Kɛ la co vana yeema mí dɛnnda lan la tosan-ndo tofa le, la co vana toosiaa dɛnnda lan lɔ́ɔ́ levil-lo cɔ le.

¹² Lelan, o paale len coo, Maalii, Mɛlɛka-Nɔ-Kpaayaa-Kpow-vo ndóò tosanin mí niáà caŋ, mí mɔnɛi ndíì luɛi niaa, mí niáà sendin tembeltan, mí niáà vownun volɔɔla nɔɔlɛilan.

¹³ Kɛ o tosa lɛnin lende le, la tofa vɔ, o yɔngunin niaa kɔlkɛndɔɔ a ɲaaloo! Vannda kialunin nawva bololan ma diw saa, a dianin vision ma kol mɔiyan. A diminin aa: «N dionnun ɲɛdiaa mì n kolnun man bɛ́lɛ́-bɛ́lɛ́, kani vuo naa n co siɔdii ni!»

¹⁴ Nduyɛ, Mɛlɛka-Nɔ-Kpaayaa-Kpow-vo dimul-la aa: «Háá mi la vi, hakio ho melnunnin niaa haki le!» Maalii Hala-Nɔ-Kpaayaa-Kpow-vo dimi lende ni.

Sáálé dimulun Siɛbna-o

¹⁵ Nuaa Maalii, Mɛlɛka-Nɔ-Kpaayaa-Kpow-vo soo ni aa: «Kɔ ma kɔ komal masa ibunga kon, Sɛbna pɛɛn, o co vana bɛndoo o cɛi lemasaa nin-ndo, mà ɲuuniaa ndu aa:

¹⁶ «Yɛɛ nɛ n nɔ yɛ nanu? Vanayɛi súú yɛɛ n nɔ yɛ nanu? Le sabu yɛɛ nɛ n co yɛ nɔm pila sɛiyo tuwnɔnndo o fonda yesaa coo? Le kɔlɔ yɛɛ nɛ n co yɛ yiyaa nuwviaa o soondo nin lɛŋ?

¹⁷ Tofa vɔ, a vanabɛnduyɛi nɔmnde kpede, Mɛlɛka co nɔm simbɔɔ ma bɔndii, mò hiiluu nɔm vokuu-vokuu, mò viow nɔm polon!

¹⁸ O co nɔm mulumulu, mò yaasiaa nɔm maa ifoeen o lɛŋnde co lepɛŋgɛlan fɛkɛi len coo. Lon n vunin ni, lon ɲɛla ɲaanannda nɔmnda kɛndɛla soa nan-ndan la lonin ni. Éé nɔm siŋnun hoo siɛmbulan le cɛi lemasa vana nɔm bɛndoo-o!

¹⁹ I co nɔm tovɔɔ mì soli nɔm o baala nɔmndo nin. Mɛlɛka sungunin nɔm o fonda nɔmndo.

²⁰ Paale len, i veelunin vana ni baalaa Eliakim, po Hilkiya-o,

²¹ mì vow ndu doma nɔm bɛndoo, mì kanda ndu yáwle nɔmnde n kandan o caŋ-nden o caŋ. I sɔanin kpaaya nɔm lemasaa ndu o ba, mò siŋnun fuɲaa le vanaa co icali Yerusalɛm-nda a le cɛi Yuda-o kpow.

²² I handunin kii cɛi masaa David-e ndu o congú. O kumbi pɛ, vana-vana kindanin ndu le. O kinda pɛ, vana-vana kumbinin ndu le.

²³ I tɔalnin ndu maa leciŋɔ o fonda kàlà-kálàá coo, o vanin maa fonda calaa lebɛɛo le cɛi fuɲa ndɔ-o.

²⁴ Ndu vanin ɲɛ tiindanndo le biilu cɛi fuɲa ndɔ-o kpow ni, kandɔɔ a lɛwvon, lɛɛndon, ɲɛm-laandun pɔm-pɔmbɔn, hɛngɛilan kɔ bii a bonyon, ɲɛ-ɲɛ vanin ndu o ba bɛngu.»

²⁵ Mɛlɛka-Nɔ-Kpaayaa-Kpow-vo dimi aa: «Paale len, ciŋɔle tɔlnun o fonda kàlà-kálàá len le sungunnin, mì le yom, mì le del. Volɔɔla lusulaala va ndu coo lan la tambunnin, kani Mɛlɛka soo ni.»