Esai 21 - BII BILA

Diomnda dimin le tambii Babilɔn-nde lan

¹ Sɔɛi dimin o lɛŋnde veselɛile co o mɛmma ihɛllan kɔngɔ len coo-e co hee ni: «Maa mɛɛ hoeyii bɛndui fùkù-fùkùei fula a ba too yɛ, lende yaamɔɔ co cɔnɔnndo o lɛŋnde veselɛilen nin ni. O co cɔnɔnndo o lɛŋnde kpúlúnkùmale luei vana siòònde len nin.»

² Dɛnɛ kpúlúnkùma bɛndoo cɔmnun ya, vanaa yiyaa dúmbú-a co dúmbóó yiiyo, vana tɛɛmbua co ɲɔɔn tɛɛmbuuo. «La hel mi la del nda coo, niaa Elam-nda! La kɔ tiila nda, niaa Mɛdea!» I tosanin mi vanaa co ŋɔɔcianndo-a mei.

³ Lelan, caŋnda co ya nɛiyo mì va ɲiiya nákà-nàkà, ɲɔɔ co ya nɛiyo taw mɛɛ demboo nɛi vanalanɔ o volɔɔ nuaa yɛ. Ɲɛsuan ma kindun ya ten-ten a ɲɛ ya tueyɔɔ-o. I co ɲiiyaa nákà-nàkà a ɲɛ ya cɔu-vo.

⁴ Kɔllo laasian ya nin laasi-laasi, siòòŋii bɛndu-bɛnduei bii ya. Ɲumma yáà cum paandu tolɔɔ le ɲɔɔ ya hɛnando-an ma vanin pɛ tolɔɔ, siòònde bii ya taw-taw.

⁵ Vannda kɛsi tabalio ma pɛngɛla kolaa lecoo, a co dioo a kolɔɔ. Niaa cuavaa lemasaa sei, la cɔn! La suu cuɛiyan kɔ̀ɔ̀la cɔwla niaalan.»

⁶ Nuaa Maalii dimul-la ni aa: «Kɔ ma kɔ kɛsi kpalilnɔɔ le cumullo, o bɛnda mò cɔɔmuu ɲɛ o canin-ndo.

⁷ Te o ce pɛ ɲɛ ɲaanan soa nan-ndo, a vanaa ɲaanun soa-a a ŋiɔn-ŋiɔn o soa coo, mò ce a pum o sofɛlɛa coo, a pum o ɲɔɔmɛɛa coo, o bɛnda mò tofa ɲɛkɛndɛi, mo mɛɛndan a taasi.»

⁸ O kon mí kpalilnɔɔ deŋi coo kpélén maa yàlà aa: «Maalii, i co niinoo isisi mɛngɛlaa o cɛi cumulaa. I co vɛlɛ lɔan lahɔl cumullo icɔl oo icɔl o fonda ni pilɛ kon.

⁹ Tofa vɔ, i co ɲɛ ɲaanan soa nan-ndo cɔu hunɔɔ, vanaa ɲaanun a soa-a co o soa coo a ŋiɔn-ŋiɔn! Vana co o ɲɛ ɲaanan kon coo-o cua sɔɛi mo va dimio aa: «O del fɔ, Babilɔn del! Tuuliaala ndalan a piɔmaa ndaa deli lɛŋ mà piɔsi!»

¹⁰ Éé niaa, niaa co yungu nuu-a, a lɔɔ niaa mɛɛ vana lɔaa maalon o kpele lɔaa n'mallo coo yɛ! Ɲɛ ya tuei Mɛlɛka-Nɔ-Kpaayaa-Kpow-vo o sondo-o, o co Hala Israɛlla-o, ndu ya tɛɛngul niaa nuaa ni!

Sɔɛi dimin le tambii lɛŋnde Edɔm-nden a lɛŋnde Arabii len-nde

¹¹ Sɔɛi dimin o tàndá Duma-o coo-e. A co ya yondallo coocoo Seir aa: «Vana mɛngɛlaa, yɛɛ nɛ n sina yɛ a ɲumndan o kɔɔ? Vana mɛngɛlaa sei, yɛɛ nɛ n sina yɛ a ɲumndan o kɔɔ kpeekpei?»

¹² Mí ya vana cumulaa muli aa: «Paalen le co nin le siɔu, kɛnduyɛ ɲumndan bɛɛ ma co nin le tolɔɔ, te la yeema pɛ le ɲunaa, la ɲuna! La mangalan mì la hin!»

¹³ Sɔɛi dimin o lɛŋnde Arabii len coo-e: «Niaa vanaa kelaa manɔnnaa bɛndua ha Dedan, la lɔlnin o yondolan Arabii nin!

¹⁴ La kɔ demul vanaa kolɔɔ bii-a, mì la yoo nda mɛnndan. Vanaa co icali o lɛŋnde Tema len nin-nda yoo vanaa co o ɲaanɔnndo nin-nda ɲɛdiaa,

¹⁵ kani mɔɔn cɔwvon vanaa kan co ɲaanɔnndo ni, mɔɛi cɔvii nda nan o boo nin-nde nda co ɲaanɔnndo ni, kpaasiaa kindun le nda-o nda co ɲaanɔnndo ni, cɔw vɔɔn-vɔɔndo nda co ɲaanɔnndo ni.

¹⁶ Kani nuaa Maalii soo o ya lo ni aa: «Nanu a vɔsio pilɛ, maa vɔsi vana co baalaa le salaa sɔlaa-o, biiloo a naŋɔɔ Kedar-o co cuvɔɔ few-few.

¹⁷ O vannda Kedar tɛɛn, kuubaa a vanaa vuaa lakpaasiaa ɲɛ-pɔmbɔ daama lonin ni.» Lende Mɛlɛka, o co Hala Israɛlla-o soo ni.