Esai 20 - BII BILA

Masa Asiriia biinin Esiptea a Etiopiia o cɛlen nin

¹ Vɔsi Sarkɔn, masaa Asiri vem Taatan, mí Taatan hun tiila vannda Asdɔd, mó bii kobio-o,

² mí Mɛlɛka soaa o telen pilɛ kon bɛngu, o Esai po Amɔt-o lo, mó dimul ndu aa: «Kɔ ma kɔ soli volɔɔla nɔɔlɛila n yiinun o caŋ-ndan, mà solin samtalan o n'pelu!» Mi Esai vana-tɛɛngaa-diom Hala-o tosa mɛɛ Mɛlɛka dimul ndu yɛ, mó kela kɔɔle fondo a pelun fondo.

³ O kon mí Mɛlɛka dimi aa: «Mɛɛ vana ni baalaa Esai co kelaa kɔɔle fondo a pelun fondo o vɔsilan tan yáá bɛngu nuaa yɛ, tɔɔmaseloo a kɔlɔ siɔdii lacio co kon le Esiptea a le Etiopiia ni,

⁴ lende koni masaa Asiri cuanin felengia piaandua a vanaa yuuvɛiya o lɛŋnde Esipte len a o lɛŋnde Etiopii len nin ni, mó kɔɛ a nda o biyɔɔ nin kɔɔle fondo a pelun fondo. O kɔanin a nda tumnda fondo le Esiptea siɛmbulan tuisio.

⁵ O kon, siòòŋii bɛnduei a siɛmbulan la biinin vannda le lɛŋnde Etiopii le ndáà tiindan-nden a le lɛŋnde Esipte le nda va kuundianndo len.»

⁶ O palɛi ken nin, vanaa vanin kan icali o lɛŋii co ken o mɛnndan kɔngɔ-e nin-nda a diminin aa: «La tofa vɔ mɛɛ ɲɛ naa n va kɔnganndo-o siŋnun yɛ! N va tiindanndo maa n sɔlanin malaa lon mi n vennun ndon, haliko mi n sɔla baŋaa masaa Asiri o ba! Vɛ̀ɛ̀ naa n nɔla yɛ lɛnin hiɔlɔnndo kpeekpei?»