Esai 17 - BII BILA

Le tambii kobio Damas

¹ Sɔɛi Mɛlɛka dimi le tambii Damas-e-e co hee ni: O lo ɲɛ-pɔmbɔ cobe, Damas ve lɛnin kobi le, kɛ o siŋnunnin bémbélan kposon!

² Vannda piawnin kobilan Aroɛr, mì la malnun cɔlua o ba, mì la siŋnun bɛ̀mɛ́lta ndalan. Lon nda vanin hinilan pɛngio ni, vana-vana venin le nda vueinɔnndo le.

³ Lɛŋnde Efraim-nden le ve lɛnin o kanda bɛngu le, masale ve lɛnin o kobio Damas nin te, vanaa tɔ̀a lonin yoomu o Aramiia tɛɛn-nda a vanin o kpòndò pilɔɔ bɛngu maa cuavaa Israɛlla. Mɛlɛka-Nɔ-Kpaayaa-Kpow-vo soo lende ni.

⁴ O paale len nin, biilu cuavaa-imamaa Yakɔb-a dɔɔnannin. Cuɛiyan ma cuunin o dialun ndan nin ma ɲaw.

⁵ Ɲɔɔ tosannin maa mɛɛ vana koavaa va kovɔɔ nuaa, mì ba ndɔɔ yimi yasalan yɛ, mɛɛ vana va yasalan cɔwviaa o dɛɛlaa Refaim nin nuaa yɛ.

⁶ Kpɔnyɔlan la lonin le kiɔndɔɔ mɛɛ vana hiiluu oliviee tumndo nuaa mì oliven koaman n'miun, n'yáá lo o yɔmndo bollen, mì n'hiɔɔlu, ŋuɛɛnu n lo o kpɔ̀nyɔ̀lan yɛ. Mɛlɛka dimi lende ni, Hala Israɛlla pɛɛn.

⁷ O palɛi ken nin, vanacieo mulinin hɔlla o vana toosiaa ndu-o lo, o tofanin O-Diandaa Israɛlla.

⁸ O tofa lɛnin a kpengii máánndan te, ɲɛm vanndacieea toosiaa a laba-on co mun ni, o tofa lɛnin ɲɛm o cɔw a n'suon te, o tofa lɛnin tombun soolan a bonyun fuusan te.

⁹ O palɛi ken nin, kobila mayoomula vanacieo viannun nin-ndan la malnunnin mi la lo fondo mɛɛ kobila va o bundɔɔ nin a o pembon tullo lan la malnun mi la lo fondo cuavaa Israɛlla laci yɛ. Ɲɔɔ lonin maa lɛŋnde peownun-nden.

¹⁰ Kani la pɔɛɛnun Hala nɔ cinda niaa o ba-o, la loonun a Pow kpova co nɛɛ niaa viannannda-o le, lelan niaa co nakɔla kɛndɛlan tɔlɔɔ le halaa niaa ni, lelan niaa co kulun súú celenndon saŋɔɔ ni.

¹¹ Paale niaa tɔal tɔlɔɔ kon-nden, la ce ndu vulɔɔ, diimandɔɔ idiiyo, la ce kulun niaan mun cuuloo. Kɛ telen niaa bɛnda le kulun mun kovɔɔ-o, ɲɛ cuulu-o foofi, o kon dɛnɛ palaa kon cɛ̀wnun te.

Sɛ́lɛ́ bɛndu yaamɔɔa

¹² Má cè dɛnɛ palaa dɛ! Sɛ́lɛ́ bɛndu cuu cɔm too co vɔngaa! A co vɔngaa sɔkɔsɔkɔ mɛɛ mɛmma ihɛllan ma kuŋ nuaa yɛ! Vanaa-mangalaa-isɔɔa co bɔɔluuo vɔkɔ-vɔkɔ! A co bɔɔluuo mɛɛ mɛmma co hiovɔɔ a yoomuan-ndan ma kuŋ nuaa yɛ! Vanaa-mangalaa-isɔɔa co bɔɔluuo vɔkɔ-vɔkɔ! A co bɔɔluuo mɛɛ mɛmma co hiovɔɔ a yoomuan-ndan ma kuŋ nuaa yɛ.

¹³ Vanaa-mangalaa-isɔɔa a co tombolaa, ivóólun-vóólunnde mɛɛ mɛmma bɛnduan ma soli diomndo nuaa yɛ. Kɛ Mɛlɛka vueinun nda ma ɲaanun polon. A sɛŋin mɛɛ hoeyii fula o pembei coo-e saŋ foeende nuaa yɛ, mɛɛ hoeyii felenfelennde saŋ cundoo nuaa yɛ.

¹⁴ Icɔllo dɛnɛ isiòòn kon voolunin nda ni, nanu a paale siaalen, vana-vana lo lɛnin te. Lende dɛnɛ kon toalnin vanaa va ɲɛm naan poondiaa-a coo ni, lende dɛnɛ vanaa yunga naa-a yɔŋnunnin ni.