Esai 16 - BII BILA

Moabua ɲuna Yerusalɛmnda le malaa

¹ «La yoo vana bɛndu lelɛŋndo saa téndéa, la cua saa téndéa Sela, mì la kei a nda o lɛŋnde veselɛilen nin, mì la kɔɛ a nda o pembii vannda Siɔn coo!»

² Maa mɛɛ yovaa nda bendu o vɛɛnnden nin ma ɲaanun nda va nuaa yoloma-yoloma yɛ, lende vanlaandua Moab vanin o tɛyii peo Arnɔn taŋɔɔ ni.

³ Lelan a diminin aa: «La yɔngu naa silaa, la kiolu isɔɔ o kɔl niaa nin! La kumbu naa a vunduma niaan a paale kalalen mɛɛ ɲumndan ma kumbu vana yɛ. La vion vanaa nda co tovɔɔ-a, la yii vana co o ɲaanɔnndo nin-ndo dúmbú le!

⁴ La cɛl mì vanaa nda tow Moabua hun cal o niaa lo, la cɛl mi la va nɛɛ viannannda le nda, le vana co tɛɛmbuuo-o vionnɔnndo! Kani sanga imɔnɔɔ cuunin, ɲɔɔn tɛɛmbuuo bɛɛ cuunin. Vana co lɛŋnden bɛpɛlaa-o ɲumnin mo lo pɛ!

⁵ O kon, vanndo pum hun tosanin masalen o kpɛŋɛ lemasa David-o coo, masale ndɔlen le vannunnin le simiaa yili. O tosanin masalen vannda coo a dɛnɛ kɛndɔɔ a sandei. O kaolanin dɛnɛ sandaa a sakpoyɛi.»

Yerusalɛmnda nɔla Moabua mala le

⁶ N tuei yonga bɛndu Moabua tɔ́ɔ́, lekɛ́ndɛi, n tuei kuundian ndaa, hɔlaa heelaa ndaa, heelɔn ndaa a tombola nda fondo-fondoo tɔ́ɔ́.

⁷ Lelan vannda Moab a somisominin a caŋndo o lɛŋnde Moab len coo ni, nda kpow a koŋulnin. La co cɛɛŋɔnndo le fùlúfúlùla n'rɛsɛnndan Kir-Haresɛt, bau fùlúfúlùla lan la ve lɛnin te.

⁸ Kani yondolan Hɛsbɔn la kpennda, vanaa bɛndua vanaa-mangalaa-isɔɔa yimi tumnda n'rɛsɛnndan Sibma, tumnda n'rɛsɛnnda va kɔlan tiiyaa háá Yaesɛr lan, la va lativaa o lɛŋnde veselɛilen nin-ndan, lɛwvon va kɔlan a piɔsio a táláá háá o mɛmma ihɛllan leeloo polon.

⁹ Le ken ya co caŋndo o tumnda n'rɛsɛnndan Sibma coo ni, maa vannda Yaesɛr. Niaa co Hɛsbɔn-nda a niaa co icali Eleale-a, i pɔɔliaanin niaa a mɛmɛma niaan! Kani vɔkɔ-vɔkɔ kɔlkɛndɛ niaa cuu o malun niaa kow-von a o tɔlɔɔla niaa kɛndu lan coo.

¹⁰ Kɔlkɛndɔɔ a ɲaaloo cuu o yondola niaalan nin, condun co lɛ solin o nakɔla n'rɛsɛnndan nin te, kponyo kɔlkɛndɛ co lɛ lenin te! Vanaa kiandaa n'rɛsɛnnda co lɛ rɛsɛnndon nɛw le mɔiyan solio o doolala mamɔila niaalan nin te. I kpaa yoondiaala kɔlkɛndɛlan mí la ɲum pɔ́lì.

¹¹ Le hee, ɲɛm co ya nin-ndon co ɲiiyaa le lɛŋnde Moab len mɛɛ bangaa ɲiiya nuaa yɛ. Kɔl nuu co ɲiiyaa a mɔnɛi biyɔɔ le kobio Kir-Harɛs.

¹² N co vannda Moab cɔu sangaa le helɔɔ o fondala ndala soolaalan coo, a co luɛyɔɔ o cɛi máán ndaa nin le piɛilen. Kɛ a tiwnin ba le ɲɛ-ɲɛ sɔla le.

¹³ Sɔɛi Mɛlɛka dimi sindɛ pa o lɛŋnde Moab len coo-e yɔŋnun ken ni.

¹⁴ Sunsun yɛ niko, Mɛlɛka soo mó dimi aa: «Nanu a vɔsilan tan yáá, maa vɔsila vana nda co salaa le baalaa tosaa-o, biilu lɛŋnde Moab len le nɔ-o pɛɛsannin a sɛ́lɛ́ bɛndu co hoo lon-ndo kpede. Vanaa lonin lon-nda ve lɛnin a bɔɔ le. Mbɔ̀ vana dimi tuŋ maa vanaciee lo lɛnin ndon te.»