Esai 14 - BII BILA

Cuavaa Israɛlla muungu o fonda ndaa

¹ «Kɛ Mɛlɛka tuinun cuavaa Yakɔb-a iɲíí, o hɛlinin vɛlɛ cuavaa Israɛlla hɛli sɛnɛi, o minginin nda o lɛŋnde ndalen nin, mialla sɔɔnguunin nda coo, a holnunnin cuavaa Yakɔb-a.

² Mialla cuanin nda, mà mingi nda o calta ndalan. O kon, mì Israɛlla siinguu mialaa kan buɛyaa piaandua a buɛyaa laandua, o lɛŋnde Mɛlɛka len nin. A siinguunin vanaa óò bii nda o cɛlen nin-nda cɛa ndaa, mà siŋnun vanaa bɛndua vanaa va nda mɔnɛi lueiyo-a coo.»

Condei le masaa Babilɔn mamɔɔ

³ «Te sangala niaalan a bɛpɛla niaa cuu pɛ, te cɛle kàlà-kálàle nda tuisi niaa coo len le cuu pɛ, lɔ́ɔ́ Mɛlɛka kenin niaa pɛngio-o,

⁴ o kon la soli condei he le masaa Babilɔn mamɔɔ aa: ‹Kpòkóó, dɛnɛ bɛndu tosan dɛ! Masa kɔlvesɛiyo co lɛ le! Kɔlvesɛiyo cuu few!

⁵ Mɛlɛka yem siomnde vanaa kɔlvesɛiya, o kili kɔlule vanaa co masalen tosaa-a.

⁶ Vana va vanaa súúla celen lɔɔ a kɔltuw bɛndoo o ve pɛngi loo, vana va vanaa-mangalaa-isɔɔa bɛpɛlaa a kɔlfulaa taw-vo pɛɛn, ndu bɛɛ, a tisa ndu kɔɔli a labɛɛla kpeekpei!

⁷ Le hee, lɛŋnden kpow le sɔla pɛngio a kɔlɲuloo. Vannda co condon solio a kɔlkɛndɛ bɛndoo.

⁸ Hali yɔmii Siprɛs a yɔmii Sɛɛdrei Liban bɛɛ, i dɔwnun ɲaale le delɔɔ masa kon.› I co dimio aa: ‹Kabi n komba vuluvulu, vana kialaa iyɔm co lɛ helɔɔ nanu le naa kioŋ te.›

⁹ Hali ciee-piɔ́m hiilun o lɛŋnden bɛngu di-di le nɔm sɛɛnaa lon, o tindi vanaa vi-a, vanaa latɔ́ɔ́a o lɛŋnden coo nɔm laci, o cua masaa vanaa-mangalaa-isɔɔa kpede o kpɛŋɛla ndala lemasalan coo.

¹⁰ Nda kpow a cua sɔɛi ma va nɔm dimullo aa: ‹Nɔm bɛɛ, maa naa n co nin ni, a nɔ lɛ kpaaya oo kpaaya le. Tofa vɔ, nɔm bɛɛ siŋnun maa naa!›

¹¹ Biilu nɔmndo tol ciee-piɔ́m a vɔkɔ-vɔkɔ labanga va nɔm kɔɔli-o latulu. O càá coo fonda nɔm hinia co nin ni, càá co nin kola kuumban nɔmndo ni.

¹² Nɔm ɲɛ diandaa bɛndoo, nɔm ɲɛ-tengaa idiiyo, vɛɛ nɛ n looku yɛ fula o halataala ma del? Nɔm va vanaa-mangalaa-isɔɔa nɔlaa-o, a del má toal lɛŋ dí!

¹³ A va dimio o kɔl nɔmndo nin aa: I helnin o halataala mì kɔ kɛsi kpɛŋɛ ni lemasaa o loeon Hala-on coo. I calnin o pembii halaa celennda bɔɔŋian coo-e coo, o lɛŋnde maluaŋnden mɛɛlulan.

¹⁴ I helnin o yumbuyumboo coo mì siŋnun kpen-kpen a Ó-Hiow-Ɲɔɔn-Kpow-vo.

¹⁵ Kɛ a tol ciee-piɔ́m mɔlɔmɔlɔ, a tol o soon yingilaa nin di.

¹⁶ Vanaa co nɔm cɔu-va co nɔm mɛɛndanndo taw, a co nɔm tofaa ciŋ ma va ɲunanndo aa: mò va maa langbanɔ va lɛŋnden hiiloo a masɛi puusiaa-o co hoo ni?

¹⁷ Bàà mo va langbanɔ va ceendo mɛiyo fondo a kobilan pesio-o co hoo ni? Vana-vana ndóò mal pɛ o kaasoo, kon ndóò fula lɛ ndu o ba le few!

¹⁸ A toɲa, masaa vanaa-mangalaa-isɔɔa kpede a co ihini o sɛila ndalan nin a biilu ndaa.

¹⁹ Kɛ nɔm, a viownun bɔɔ sɛi nɔmndo levil, maa hɔ́ɔ́ lende nda viiku-o, maa vanaa vi o mɔɛi cɔwve bɛngu-a, a nda ɲindu o powta soon bɛndoo coo-a, maa vana vílɛ́i nda nɛw a labɛngu-o.

²⁰ Nɔm sɔlanin fonda o sɛiyo nin nda ikɛi le, kani nɔm pila cii lɛŋnde nɔmnden tɛɛmbuu, a cii vanaa nɔmnda diw. Vana tui lɛnin isɔɔ a polale vanaa kɔlvesɛiya o kɔɔ le few.

²¹ Lelan, la bɛɛndian le cuavaa ndaa bololan kilio, le haki fuɲaa ndaa tosa-o! Màá a can ndɛ ma hɛlu vɛlɛ lɛŋnden te, yɔŋii nda pei kobilan o ceendo nin ca!»

²² Mɛlɛka-Nɔ-Kpaayaa-Kpow-vo dimi aa: «I cannin mi cɔlɔba nda, i ɲuminin diola kobio Babilɔn a vanaa ndɔa, cuavaa ndɔa a yɛyii ndɔɛi, ya Mɛlɛka dimi lende ni.»

²³ I co fonda kon siinguu bɛ̀mɛ́lta saiya, i siinguunin ndu fonda ɲulu bɔɔdɔɔ-o. I basunin ndu a bɛsu tɛɛmbuu ɲɛ-ɲɛ-o. Mɛlɛka-Nɔ-Kpaayaa-Kpow-vo dimi lende ni.

Le tambii Asiri-e

²⁴ Mɛlɛka-Nɔ-Kpaayaa-Kpow-vo mɛnan mó dimi aa: «A toɲa, sɔɛi ya kelu o kɔl nuu nin-nde tosannin lekɛ́ndɛi. Ɲɛ ya kɛɛsiaa-o, fɔ mo peelun kangalan.

²⁵ I pesipesinin Asirinɔɔ o lɛŋnde nilen nin. I nɛwnin ndu a labɛngu o pembun nun coo. I faŋanin yɔm lebol ndóò handu nda o lebol-lo, a tuisinin volɔɔla lusulaala ndɔlan nda o lacongú.

²⁶ Ɲɛ tuunun le lɛŋnden kpow tosallo-o co hoo ni, ba siɛndin le vanaa-mangalaa-isɔɔa kpow lɔɔ-o co kon ni.

²⁷ Nduyɛ Mɛlɛka-Nɔ-Kpaayaa-Kpow-vo kɛɛsiaa lende ni, Nɛ̀ɛ́-nɛ̀ co yɛ mo sɛɛngiaa diom ndɔɔ? Ba ndɔɔ cuu heelu, nɛ̀ɛ́ nɔla yɛ mò tuisi ndu?»

Le tambii Filistia

²⁸ Vɔsi masaa Ahas vi-o, mí sɔɛi he dimin aa:

²⁹ Niaa Filistia sei, la dɔawnun ɲaale le tùú tinda nda va niaa kɔɔlan lɔɔ-o yom-ndo le dɛ! Kani kɔɔmaa fulanin o kɛw siovɛiyo nin, cuale fulanin o kon nin-nden tambálakáà can coocoo-o le vanin ni.

³⁰ Vanaa hiow bala fondolan kpow-va a sɔlanin ɲɛdiaa ndaa, vanaa ikɔɔa vannunnin icali nila ɲulu. Kɛ i tosanin mì dumbulen le vi a yiaan, o kon, ɲɛ-ɲɛ lo pɛ yoomu o niaa tɛɛn, kon sɔlanin piɔ́mndo.

³¹ Lelan, niaa vanaa co o diola luɛyaalan-nda, la somisomin! Niaa co o kobilan nin-nda, la cɛɛŋun mì la ŋɔɔcian! Niaa co o lɛŋnde Filistia nin-nda, la ɲiiya! Kani kumnde co cɔnnɔnndo a ba luaŋ-ndo, vanaa cɔwva co a sɔsɔŋaa o polama yaamɔaa niaa nin.

³² Yɛɛ nda mulul-lɛnin vanaa lɛŋnden le vem-nda? A mululnin nda aa: Mɛlɛka pila cɔw Siɔn ni aa: vanaa co o sangaa nin o vanaa ndɔa tɛɛn-nda a sɔlanin nɛɛ viannannda lon.