Esai 11 - BII BILA

Masaa a masale co hunɔɔ len

¹ O kon kɔɔli tɛiye piaŋnin o yɔm tum Yisai-yo, yɔmndo piaŋnin mò fula o dumbun ndɔn.

² Kɔl Mɛlɛka-o vanin ndu coo, kɔl kɔlkaloo a kɔl dɛnɛ sinaa, kɔl silaa a kɔl mayoomoo, kɔl sinapɛngoo a kɔl siòòŋii Mɛlɛka-o.

³ O lueinin ndu siòòŋii Mɛlɛka-e o kɔl, o kilunin yamɛi le hɔlaa vannda le, o kilunin yamɛi o ɲɛ o tuei-yo coo le.

⁴ Kɛ o kialunin yamɛi vanaa bala fondoa a sandei, o kilulnin vanaa co o sangaa nin o lɛŋnden coo-a yamɛi sandɛi sakpo. O lɔanin lɛŋnden a sɔɛi ndɔɛi maa a lesiondoo. O hulnin a cɔcɔn ndɔn mo dii vana kɔlvesɛiyo.

⁵ Dɛnɛ sandaa vanin yáwle ndɔle sayiannden ni, toɲaa vanin yáwle ndɔle kandan o caŋ-nden ni.

⁶ Tun yondoo a saa téndóó vanin icali latulu nɛɛ pilɛ, tambillo nda cuin téndóó hininin o fonda pilɔɔ, naw téndóó, yàlà téndóó a cɔlua nda co cuɛiyan lueiyo-a vanin nɛɛ pilɛ, o kon, poombɔ pɔmbɔ-pɔmbɔɔ vanin kɔlan a nda ni.

⁷ Nawvo nda kɔ́lɔ́vúloo a vanin billo dioo nɛɛ pilɛ, cuavaa ndaa vanin hinilan o bɛ̀mɛ́lta pilɛlan nin, yàlàá vanin billo dioo maa naw.

⁸ Cɛlɛkpɔɔ pisulnin o soon yɛ́lɔ̀ɔ́ coo, cuaambɔ nda soli mɛɛlen o sondo-o vownin baa o soon hɔ̀ɔ̀lɔ́ɔ̀ nin.

⁹ Vana tosanin dɛnɛ vɔɔn a dɛnɛ tambɛi o pembii nii diandɛi kpow coo le, kani lɛŋnden le vanin lepiaalen a Mɛlɛka sinaa mɛɛ mɛmma ihɛllan ma pia o fonda ma co coo-o nuaa yɛ.

¹⁰ O palɛi ken nin, vana fula kon o polale Yisai len nin-ndo vanin maa lɛfɛ le vannda, vanaa-mangalaa-isɔɔa kpow a mulinin hɔlla o ndu lo, o biiloo nin calta ndɔlan la vanin ni.

Muungu vanaa va o ɲaanɔnndo nin-nda

¹¹ O palɛi ken nin, Maalii siɛndinin vɛlɛ ba ndɔɔ o diinndɔɔ le vanaa ndɔa tɔ̀a lonin-nda baŋaa, a co a saŋnannda Asiri, Esipte, Patrɔs, Etiopii, Elam, Sinear, Hamat a o tiŋnda co o mɛmma ihɛllan tɛɛn-ndan nin-nda.

¹² O heelunin lɛfɛ landaa le vanaa-mangalaa-isɔɔa, o cuungiaanin cuavaa Israɛlaa co o ɲaanɔnndo nin-nda, o mɔɔsiaanin vanaa sɛŋin fulaa o tàndá Yuda-o nin-nda. O cuungiaanin nda fulaa o kpengun hiɔɔlun ceendo.

¹³ Paŋala cuavaa-imamaa Efraim-nda nɔ-o cuunin, yaamɔaa Yuda-a cuunin kpow. Cuavaa-imamaa Efraim-nda paŋala lɛnin Polale Yuda len te, polale Yuda len bɛɛ le nɔ lɛnin nɛyɔn a cuavaa-imamaa Efraim-nda le.

¹⁴ Kɛ a cɛlannin, mà kɔ del Filistia coo a ba paalen le del-lo, a poondanin ɲɛm vanaa co a ba paalen le can-ndo-a diom pilɛ, a soaŋnin Edɔmnda a Moabua soŋɔ̀ɔ́ pila, a nɔlanin poaa Amɔnnda mà kɛsin nda o labɛngunin.

¹⁵ Mɛlɛka veesiaanin tɛyii mɛmma ihɛllan Esipte, o heelunin ba ndɔɔ o pee bɛndoo coo, mò hul ndu a hoeyii ndɔɛi taw-taw, mì pee bɛndu kon piɔwnun tɛiyon mún ŋɔmmɛw n vana nɔla taŋɔɔ a soli samtalan te-on.

¹⁶ Nɛiyo ndu pilɛ kpé vanin le vanaa tɔ̀a lonin yoomu o vanaa ndɔa tɛɛn-nda ni, a lo vɔnin yoomu Asiriia pɛɛn, maa mɛɛ nɛiyo va ndu pilɛ le cuavaa Israɛlla paale nda va fulaa Esipte len yɛ.