Esai 10 - BII BILA

Dɛnɛ palaa co le vanaa bɛndua sendu le-a

¹ Dɛnɛ palaa co le vanaa co tɔŋnda lakafalan yɔngoo-a, vanaa co tɔŋnda tuisi vannda sangaa coo lan sɛvaa-a pɛɛn,

² le vanaa bala fondoa kuunaa le luɛyɔɔ o fondala kialaa n'yamalan nin, le vanaa ikɔɔa o vanaa niaa tɛɛn dí ndaa tuŋɔɔ. Le vanlaandua piaandaa ndaa vi-a ɲɔɔn puuvo o laba, le ɲɛm vííya poondiaa a paa-kala!

³ Yɛɛ nɛ niaa tosa yɛnin o paale dɛnɛ palaalen coo? Vɛ̀ɛ̀ niaa yɔŋ yɛnin lɔ́ɔ́ dɛnɛ palaa cannin levil mò tol niaa coo-o? O nɛ̀ɛ́-nɛ̀ lo niaa ɲaanun yɛnin le malaa sɔlaa? Nduyɛ nɛ niaa mɛi yɛnin biilu niaa?

⁴ A pum a tundunnin vanaa co o biyɔɔ nin-nda tɛɛn, a pum a cɛɛlunnin vanvílɛ́iya tɛɛn. Kɛ a kon kpede, kɔltuw Mɛlɛka-o ɲulul-lɔnin te, ba ndɔɔ va vɔnin o heelaa.»

Yamɛi kilulun Asiriia-e

⁵ «Dɛnɛ palaa co le Asirinɔɔ, o yɔŋnun sionnde kɔl ni tuwvo-o! Sionnden ndu o ba, len le co volɔɔ vali kɔltuw nuu ni.

⁶ I mal ndu le vanaa sina Hala le-a kuello, I yɛɛ ndu le kɔlan vanaa tuulu ya kɔllo-a delɔɔ coo, haliko mo poondiaa nda ɲɔɔn o ba, mò nɛw nda a labɛngu mɛɛ vana nɛw loolio o nɛilan coo yɛ.

⁷ Kɛ o co lende le ndu masaa Asiri ce dɛnɛ kon te. O co lende le yiyan co ndu o kɔl-lo co le few, yiyan co ndu o kɔl-lo daama co le tɛɛmbuuo, a le vanaa-mangalaa-isɔɔa taw-taw diwvo ni.

⁸ Kani o dimi aa: ‹Vɛ̀ɛ̀ cuavaa lemasaa niaa o co maa masaa le nda co le?

⁹ Vɛ̀ɛ̀ Kalno siŋnun maa Karkemis le? Vɛ̀ɛ̀ o co ɲɛ yɔŋnun Arpad-o le yɔŋnun Hamat le? A toɲa, ɲɛ tosalan Damas-o tosalan Samari ni.

¹⁰ Maa mɛɛ ba nuu kposoŋa masɛi biilaa n'piɔmnde yɛ, nɛɛ piɔmnda va sɛ́lɛ́ hiovɔɔ haa Yerusalɛm a haa Samari-a,

¹¹ mɛɛ ya tosal Samaria a piɔmaa ndaa yɛ, lende koni ya tosalnin Yerusalɛmnda a piɔmaa ndaa ni.›

¹² Kɛ Maalii dimi aa: ‹Lɔ́ɔ́ ya ciinin baala nuu kpow tosa o pembei Siɔn coo a o kobio Yerusalɛm nin-ndo, i soaŋnin masaa Asiri le yiyan ndɔ kuundianndo a le tofa ndɔ yongaa.

¹³ Kani o co dimio aa: A kpaaya ba nuu ya tosa dɛnɛ nuaa ni, a kɔlkalu nuu ya tosa kon kpede ni, kani i sina bɔɔ dɛnɛ! I faŋa pɛɛngula vanaa-mangalaa-isɔɔa taw. I poondiaa nda bolofaa ndaa o ba. I faŋa vanaa va masalen tosaa o kpɛŋɛla lemasalan coo-a maa kuubanɔ dialun kala.

¹⁴ Ba nuu cɔwviaa bolofaa vanaa-mangalaa-isɔɔa mɛɛ vana cua vɛɛnnden nuaa yɛ. I punga lɛŋnden kpow mɛɛ vana punga pelta yowla sɛŋianndan yɛ, hali vanndo ndu pilɛ o ve le kumbanndo hiiloo le, vana-vana ve le cɔcɔɛi kumbio le, vana-vana kuŋ te, o soli le!›

¹⁵ Cuei nɔla pá mì i lisan vana co baalaa a ndi-o coo? Vɛ̀ɛ̀ síí tɛndaa yɔmndo nɔla pá mò tosal vana co yɔmndo tɛndaa a ndu-o yongaa? Siondoolen le nɔla vana co len heeloo coocoo-o hiiluu le, tindaa nɔla vana fula o yɔmndo loo cua coocoo le!

¹⁶ Lelan, Maalii, Mɛlɛka-Nɔ-Kpaayaa-Kpow-vo co ɲawvo tuisi kuubaa celulaa coo, ɲɔɔ vanin volio o naŋɔɔ ndɔɔ bɛngu maa yinnde biyaa.

¹⁷ Ɲɛ-tengaa Israɛlla siŋnunnin yinnden, mì Hala Diandaa ndaa siŋnun yelenyelen leyinndo, yinnde len le loamnin hɛɛnndon a siɛmbullon o paalen ten pilɛ nin.

¹⁸ Yinnde len le loamnin bundɛ nda kɛndɛ-kɛndɔɔ a yondola ndalan kpede, kandɔɔ a yɔmndo háá o boolan. Ɲɔɔ vanin maa vana del a nàá mo ɲaw taw-vo.

¹⁹ Yɔmii lonin o bundɛ nda kon nin-nde cɔmnunnin, mì poombɔ pɔmbɔɔ sɛva mɛɛ i vanin yɛ.»

Mangalan Israɛlaa tɔ̀a lonin yoomu-a

²⁰ «O palɛi ken nin, Israɛlaa tɔ̀a lonin yoomu-a, cuavaa-imamaa Yakɔb-a hialunnin-nda, a tiindan ndɛnin vana vanin nda lɔɔ-o le, kɛ a tiindannin Mɛlɛka pila kpeekpei, O-Diandaa Israɛlla pɛɛn.

²¹ Vanaa tɔ̀a muungunin, vanaa tɔ̀a fula o polale Yakɔb len nin-nda pɛɛn, a muungunin Hala latɔ́ɔ́-tɔ́ɔ́ o ibuŋ.

²² Kpòkóó Israɛl! Hali vanaa nɔmnda va bɛɛ sɛ́lɛ́ maa sióónndon o mɛmma ihɛlla kɔngɔ, a tɔ̀a daama muungunin ni, kani tambii ndɛi cuu kiolɔn, tambii ken tuisinin dɛnɛ sandaa taw-taw nda coo ni.

²³ Nduyɛ, tambii kelun ken-nde, Maalii, Mɛlɛka-Nɔ-Kpaayaa-Kpow-vo peelunin ndi o lɛŋnden nden kpow nin.»

Mɛlɛka kɔngɔlan vɛlɛ Asiriia

²⁴ Kɛ o va bɛɛ lende, o Maalii, Mɛlɛka-Nɔ-Kpaayaa-Kpow-vo dimi-o co hoo ni: «Oo vanaa niaa, niaa co icali Siɔn-nda, la yɔŋ isiòòn a Asirinɔɔ le! O co niaa lɔɔ a yɔm bingio, o co tinda ndɔɔ heeloo le niaa soŋɔ̀ɔ́ maa mɛɛ Esiptea va sindɛ tosaa yɛ,

²⁵ kɛ o lo telen pɔmbɔ cobe mì kɔl ni tambɛiyo cuu a niaa, o kon mì mululun ndu a kɔltuwvo le ndu ɲumio.

²⁶ Mɛlɛka-Nɔ-Kpaayaa-Kpow-vo hiŋnin sionnden mò soŋ ndu mɛɛ o soŋ Madiannda o pow kpova Orɛb-o yɛ, lende koni o heelunin tinda ndɔɔ o mɛmma ihɛllan coo ni, o heelunin ndu maa mɛɛ o tosa Esipte yɛ.

²⁷ Paale len, volɔɔla lusulaala ndɔlan la faŋannin niaa o congú, yɔm lebol ndɔɔ solinnin niaa o labolo. Yɔm lebol kon yominin le ɲɛm niaa sɔlanin taw-von.»

Yaamɔɔa cɛn le tiiyaa Yerusalɛm

²⁸ Má cè nda hunɔɔ! A co kobio Ayat kuello! A kei Mikrɔn ma mɛi volɔɔla ndalan Mikmas.

²⁹ Tofa vɔ, a taŋ bóllo má dimi aa: «Keba naa n lɔlnin cɔɛllɛn ni! Vannda Rama ɲiiya a siòònde,» vannda Kibea o Saul-lo ɲaanun.

³⁰ Niaa vanaa co icali Kalim-nda, la koŋul coocoo kpélén! Niaa co Lais-a, la yaŋ nilan! Niaa vannda Anatɔt taanin!

³¹ Vanaa co Madmena-a sɔɔndian, vanaa co icali Kebim-nda vennun kpíŋ!

³² O paale pilɛle len nin, a simnin Nɔb ma vueinun vanaa co o pembei Siɔn coo-a a laba, vanaa co icali o pembei Yerusalɛm coo-a pɛɛn.

³³ Tofa vɔ, Maalii, Mɛlɛka-Nɔ-Kpaayaa-Kpow-vo yimi lɛwvon a kɔltuwvo, lɛvun hiow vaa n'bɔɔ-on kelun. Lɛvun hiow helɔɔ-on n kilikilinnin.

³⁴ O kili yɔmii pɔmbɔɛi co o bundɔɔ nin-nde a lɛɛndo. Liban del a soŋɔ̀ɔ̀ vana kpaayaa soŋ ndu-o.