Efɛsea 6 - BII BILA

Cuawva a kalan-ncuawva

¹ Niaa cuawva, mɛɛ mì la bii sɔɔn vanaa velu niaa-a Mɛlɛka o hɔl, kani dɛnɛ bɛnda-o co kon ni.

² «Ke fuɲa nɔm nda kala nɔm bɛɛlen». Tɔŋ tase dimin a duaa kɔɔlio co hoo ni aa:

³ «Haliko ma sɔla dɛnɛ kɛndɔɔ, mà viow si o lɛŋnden coo.»

⁴ Niaa fuɲaa yɛ, la tɛ́ɛ́mbùù cuavaa niaa kɔltan te, kɛ la pɛɛku nda mì la sila nda o nɛila Maalii lan coo.

Cɛa nda vanaa ndaa bɛndua

⁵ Niaa cɛa, la bii sɔɔn vanaa niaa bɛndua o lɛŋnden coo, mì la ke nda bɛɛlen, mì la nɔ siòòŋii ndɛi. La bii sɔɔn mun a kɔlta niaalan kpow maa mɛɛ niáà tosal nin Krista baalaa yɛ.

⁶ La tósa vallo nda o hɔl telen nda nɔ niaa hɔlten coo-o daama le nda hɛnanndo le, kɛ la tosa hɛnan Hala-o a kɔlta niaalan kpow maa cɛa Krista-a.

⁷ La tosal nda baalaa a kɔlta niaalan kpow maa mɛɛ niáà tosal nin Maalii baalaa yɛ, o co le n'vanndaciee le.

⁸ Kani mɛɛ mì la sina maa, o va cɛ, o va vana co o ba ndɔɔ coo-o, Mɛlɛka mingulnin vana-vana mɛɛ dɛnɛ kɛndɛ o tosa-o co yɛ.

⁹ Niaa vanaa nɔ cɛa o ba-a yɛ, la bii nda mɛɛ o bɛnda yɛ. La vueinun nda le, kani mɛɛ mì la sina maa niaa-ou, nda-ou, vana bɛndoo ndu pilɛ kpé niaa co o ba ni, o co o halataala-o pɛɛn. Ndu ndu, o tosa hiyan vanndacieea tɛɛn te.

La cua volɔɔla cɔwla Hala yɔngu niaa lan

¹⁰ Le sɔɛi siowvo, la luei yoomuan o Maalii nin a o kpaaya ndɔ bɛndu-bɛndoo nin.

¹¹ La cua ɲɛm cɔvun Hala-on kpow, haliko mi la tiwba kɔlkalu vɔɔn masa ɲinaa vɔɔnda simullo.

¹² Kani o co n'vanndaciee le naa co cɔlɔba le, kɛ kpaayala maɲumndan, vanaa mayoomua, masɛi a ɲinaa vɔɔŋaa co o halataala-a.

¹³ Lelan, sunsun la cua ɲɛm cɔvun Hala-on kpow. O kon telen paale vɔɔnnden le tiiyanin-ndo, la tiwba yaamɔaa niaa simullo. Nduyɛ, lɔ́ɔ́ niaa cɔlɔbanin háá o mɛɛlulan-ndo, la muungunin mì la sim vɛlɛ yili o fonda niaa.

¹⁴ Lelan, la va a bɛɛndiannda: la yiinun toɲaa o can maa leyaw, mì la vownun dɛnɛ sandaa maa doma cɔw.

¹⁵ La vownun dialun fulan maa lasamta le kɔlan vannda Yoongu kɛndɛ yɔngu vana kɔlɲuloo-o tiiyallo.

¹⁶ Laalanndo va niaa o ba lɔ́ɔ́-lɔ́ɔ̀ maa kɔ̀ɔ̀ cɔw. O kon, o tosanin mì la tiwba kɔɔn cɔvun Vana vɔɔndo kpow ɲumio.

¹⁷ La vownun cindaa maa mɔsil kálà-kálà vana kanda bollen-ndo, mì la cua sɔɛi Hala-e maa mɔɛi cɔvii Hala Kɔl-Diandaa yɔngu vana-e.

¹⁸ La piɛi Hala telen oo telen. La va piɛile súú-súù ka a tɛɛlɔnnda súú-súù ka tosaa a kpaaya Kɔl-Diandaa. Lelan, la mɛɛndian mì la kindin o ken coo taw. La piɛi le vanaa diandaa kpow.

¹⁹ La piɛi vɛlɛ Hala le ya, haliko te i va pɛ sɔɛi, mò ke ya diomnda bɛnda lan, mì soo a kɔlkɛsiaa, mì cɔm vannda sɔɛi vianaŋii co o Yoongu kɛndɔɔ nin-nde.

²⁰ I co bɛɛ o kaasoo nuaa, kɛ ya co hɔlte Krista len le Yoongu kɛndɔɔ yondaa ni. Lelan, la piɛi haliko mi soo a kɔlkɛsiaa.

Yilɔɔla mɛɛlalan

²¹ Tisike, puapilɛ naa naa n kaola taw-vo, o co naa malaa lɔ́ɔ́-lɔ́ɔ̀ o baala Maalii-o nin-ndo cɔmnin niaa sɔɔn nun kpow, haliko mi la sina mɛɛ ya co yɛ.

²² Lelan, i co ndu vomɔɔ o niaa lo, mɔ̀ kɔ dimul niaa mɛɛ naa n co nanun yɛ, mɔ̀ kɔ luei vɛlɛ niaa yoomuan.

²³ Puapilɛa naa, màá Hala Fuɲaa nda Maalii Yeesu Krista a yɔngu niaa kɔlɲuloo, kaolaa a laalanndo!

²⁴ Màá vanaa kaola Maalii naa Yeesu Krista kaola kpeekpeiyo-a kpow a sɔla dɛnɛ kɛndɔɔ!