Efɛsea 5 - BII BILA

Le kelaa o ɲɛ-tengaa nin

¹ Le tùú niaa co cuavaa Hala kaola-a-o, la kindin mì la tuula ndu o niinu niaa nin.

² Mì la va kelaa o kaolaa nin maa mɛɛ Krista kaola naa, mí ndu pila yɔngu yoomu ndɔɔ le naa, mó siŋnun sálà cun kɛndɔɔ a sálà hɛnan Hala-o yɛ.

³ Yungu co le Hala-o niaa co ni, lelan o bɛnda mì vana saalun bɛɛ dɛnɛ nɔɔlɛi súú oo súù a dɛnɛ laasiɛi kɛ́-kɛ̀, te kon te yeemɛi vɔɔnde niaa tɛɛn te.

⁴ O bɛnda vɛlɛ mi sɔɔn vɔɔnndon, sɔɔn diɔmndon, te kon te sɔɔn nɔɔlɛiyon n fula niaa o lasondo le. Kɛ la sínà kɛndɛi Hala-e mì la va ndu balikaa mello.

⁵ Kani mɛɛ mì la sínà hee ɲɛkɛndɛi: vana-vana co vana suundaa, vana nɔɔla Mɛlɛka o hɔl-lo, te kon te vana nɔ yeemɛi vɔɔnde-o (kani yeemɛi vɔɔnde nɔu, piɔmnda sooloo co kon ni), nda sɔlanin Masale Krista len a Masale Hala len maa kɛ́ le.

⁶ La cɛl mì vana-vana hui niaa a sɔɔn fondon te, kani le tɛɛmbuula vaa lende kɔltuw Hala-o toalnin vanaa co ndu simullo-a coo ni.

⁷ Lelan, la mɔɔsiaa ɲɛ-ɲɛ niaa ndaa le.

⁸ Ɲumndan niaa va paandu ni, kɛ sunsun, ɲɛ-tengaa niaa co o Maalii nin ni. La va niinoo maa vanaa co o ɲɛ-tengaa nin-nda,

⁹ kani tɔnɔ ɲɛ-tengaa co dɛnɛ kɛndɛ súú-súù ka ni, dɛnɛ sandaa a toɲaa.

¹⁰ La kindin mì la sínà dɛnɛ hɛnan Maalii-o.

¹¹ La vow balan o dɛnnda fondola vannda co tosaa o ɲumndan nin-ndan nin te, la cɔɔmuu lan ceen kpendekele.

¹² Kani dɛnnda vanaa kan co tosaa o vionnɔnndo nin-ndan, siɛmbulan la bii vana le lan dimio ni.

¹³ Kɛ dɛnnda lan kpow la fula pɛ ceen kpendekele, ndu siŋnun ɲɛ-tengaa.

¹⁴ Hiovɔɔ o kon coo, ɲɛ-ɲɛ fula pɛ ceen kpendekele, ndu siŋnun ɲɛ-tengaa. Lelan o co o sɛvaa ni aa: «Tiondu, nɔm vana co hoo o lɔan-ndo, cɔn mà fula vanvílɛ́iya tɛɛn, mì Krista tosa, mì ɲɛ-tengaa va niaa diondɔɔ coo.»

¹⁵ Lelan, la caa taw a niinu niaa. La va lɛ maa n'diɔm te, kɛ la va vanaa kɔlkalua.

¹⁶ Telen oo telen niaa sɔla pɛ dɛnɛ pum le tosaa, la tosà, kani palɛi naa n co hee nin-nde i niŋ te.

¹⁷ Lelan, la va n'diɔm te, la sínà ɲɛ co hɛnan Mɛlɛka-o o.

¹⁸ La hiaw ba a mɔiyan kolɔɔ le, kani o laasianndo nin kon luei vana ni, kɛ la va a piaa a Hala Kɔl-Diandaa.

¹⁹ La lueinan yoomuan vellaa-velle a condun lisan, condun kɔllon a á condun vana sangala Mɛlɛka-on, n co fulaa Kɔl-Diandaa o ba-on. La solùl Mɛlɛka condun kɔllon, mì la sangala ndu a kɔlta niaalan kpow.

²⁰ La va Hala Fuɲaa balikaa mello lɔ́ɔ́-lɔ́ɔ̀ o dɛnndan kpow nin o diola Maalii naa Yeesu Krista lan.

Le calii pɔnɔɔ a lanɔɔ

²¹ La biinan diomndan vellaa-velle le bɛɛle niaa co Krista keo len.

²² Niaa vanlaandua, la tuisin a piaandaa niaa maa mɛɛ niaa tuisin a Maalii yɛ.

²³ Kani vanapɔnɔɔ co simlacinɔɔ le vanalanɔɔ ni, maa mɛɛ Krista co simlacinɔɔ le kunda vanaa laalannda yɛ, o co dialun ndɔn mo va vɛlɛ vana ciindiaa ndaa-o.

²⁴ Vanlaandua bɛnda mà tuisin a piaandaa ndaa o dɛnndan kpow nin maa mɛɛ kunda vanaa laalannda tuisin a Krista yɛ.

²⁵ Niaa vanpiaandua, la kaola laandaa niaa mɛɛ Krista kaola kunda vanaa laalannda háá mì ndu pila yɔngu yoomu ndɔɔ le ndu yɛ.

²⁶ Le kunda vanaa laalannda bɛndaa Hala o hɔl, mó dindi ndu a mɛnndan a á sɔɛi.

²⁷ Kani ndu pila ndóò yeema mì ndóò ce kunda vanaa laalannda o diandaa, o biilu ndɔ bɛndoo nin, o ve a isɔw le, o ve a sɔŋ te, o ve o ɲɔfɔliaa le, te kon te tambii súú oo súù.

²⁸ Lende koni, vanpiaandua bɛnda mà kaola laandaa ndaa mɛɛ nda kaola dialun ndan yɛ. Vana-vana kaola pɛ laa ndɔ, mɛɛ ndu pila kaolan lende ni.

²⁹ Kani vana-vana mel dialun ndɔn ndu pila-on te, kɛ dɔvɔɔ o dɔaw mun balo ni, mò manda mun, maa mɛɛ Krista co tosaa a kunda vanaa laalannda yɛ,

³⁰ kani dialle ndii pilɛ naa n co o kɔɔle ndɔlen nin ni.

³¹ Maa mɛɛ o co o sɛvaa yɛ aa: «Lelan, vanapɔnɔɔ faŋannin fuɲa ndɔ nda kala ndɔ, mò yiinun nda laa ndɔ, mà siŋnun falei ndii pilɛ kpé.»

³² Toɲa bɛndoo co o vianaa o sɔɛi he nin. Le Krista a le kunda vanaa laalannda ya co ndu dimio ni.

³³ Kɛ le niaa sɔɛi he i co vɛlɛ ni. Mɛɛ mì vana-vana kaola laa ndɔ maa ndu pila, mì vana-vana ke pɔnɔ ndɔ bɛɛlen.