Efɛsea 3 - BII BILA

Vali Pol tosa vanaa-mangalaa-isɔɔa tɛɛn-ndo

¹ Lelan, ya pol, ya co hoo o kaasoo le vali Yeesu Krista ya co tosaa le niaa vanaa-mangalaa-isɔɔa-o, i co Hala piɛiyo le niaa.

² Nduyɛ, i nɔ o kɔl maa la tuei nin sɔɛi vali Mɛlɛka yɔngu ya kon le tosaa o kɛndɛi ndɔɛi bɛngu le niaa-o,

³ Mɛlɛka yɔŋnun vana ikɛndɛ le ya, mó cɔɔmun ya le ya sɔɛi viannan o tuu-ve cɔmndo. I sɛva nin sɔɛi ken ɲɛ-pɔmbɔ o sɛbɔɔ ho nin.

⁴ Nduyɛ, te la va pɛ sɛbɔɔ ho tofaa, la sinanin kɔlkalu ya sɔla o dɛnɛ viannan Krista-o nin-ndo.

⁵ Paandu, dɛnɛ viannan kon ndóò cɔmnun vannda le, kɛ sisa Hala cɔm kiilaa ndɔa diandaa a vanaa-tɛɛngaa-diom Hala ndɔa diandaa ndu a Kɔl ndɔ Diandaa o kɔɔ.

⁶ Dɛnɛ viannan kon co hoo ni: le Yoongu kɛndɔɔ, mí vanaa co N'Yuifi le-a sɔla kɛ́ pilɔɔ nda Yuifia latulu, má siŋnun ɲɛ pilɔɔ o dialun pilɔn nin, má sɔla kpema o yiilul nda-o latulu o Yeesu Krista nin.

⁷ I siŋnun vana vallo le vannda Yoongu kɛndɛ kon dimullo. Hala tosal-la kɛndɛi o kpaaya ndɔɔ bɛngu.

⁸ I co vana sɔvɛ o vanaa laalannda kpow tɛɛn te, kɛ nduyɛ, kɛndɛi ken i yɔngun ya haliko mi cɔm vanaa co N'Yuifi le-a tɔnɔ bɛndu co o Krista nin-ndo,

⁹ haliko mi cɔm vannda kpow kɔlɔ dɛnɛ viannan kon. Hala, o cɔw ɲɔɔn kpow-vo ven dɛnɛ kon kabi paandu ni.

¹⁰ Kon yɔŋnun, haliko mi vanaa laalannda tosa, mì vanaa nɔ masalen o ba-a a ɲɛm kpaayan o halataala n sínà kɔlkalu Hala-o o nɛilan kpow coo.

¹¹ Ɲɛ ndu Hala tuu kabi o kandɔnndo le tosaa-o, mó peelu ndu o Maalii naa Yeesu Krista nin.

¹² Le mɛɛ naa n yiinun a Krista mì n laalan ndu yɛ, n nɔla mì n sɔɔnguu Hala ikɛi a kɔlkɛsiaa a á tiindanndo.

¹³ Lelan, i co niaa tɛɛlɔn, la vu n'dial le sanga ya co sɔlaa le niaa-o le, biilu niaa co kon ni.

Kaola Krista-o

¹⁴ Le hee ya co o vulan coo Hala Fuɲaa o hɔl ni,

¹⁵ o yungulan o halataala, a laan o ceendo coo kpow sɔlà diolan o ba-o.

¹⁶ I co ndu piɛi, mò luei niaa yoomuan a kpaaya Kɔl-Diandaa ndɔɔ mɛɛ tɔnɔ biilu ndɔɔ co yɛ,

¹⁷ haliko mi Krista cal niaa o lakɔl o laalanndo nin. I co vɛlɛ ndu piɛi mì la luei puundon, mì la sim yili o kaolaa nin,

¹⁸ o kon mì niaa vanaa diandaa kpow tiwba bilaa biyɔɔ mɛɛ kaola Krista-o pɛngɛlan yɛ, mɛɛ o bandu yɛ, mɛɛ o hel-lɛ a mɛɛ o yingila yɛ.

¹⁹ O kon, o va bɛɛ maa kaola ndɔ kon hiow dɛnɛ sinaa kpow, kɛ mì la sínà ndu, haliko mi la va a piaa cá a bolofaa Hala-o.

^20-21 Màá Hala co dɛnnda bɛndulan tosaa, mò va bɛɛ hiovɔɔ piɛile naalen a yiyannda naalan coo mɛɛ kpaaya ndɔ co naa nin-ndo co yɛ-o, sɔla biiloo vanaa laalannda tɛɛn a Yeesu Krista o kɔɔ o telenndan kpow nin a le fɛɛn a fɛɛn! Amiina!