Efɛsea 2 - BII BILA

Vanndacieea co muungu yoomu o Krista nin

¹ La va paandu a vílɛ́iya o kɔllo nin le tɛɛmbuula niaalan a le hakila niaalan.

² O dɛnnda lan nin niaa va kelaa telen kon ni maa vanaa ceenda, mí la va ɲɛ masa kpaaya ihoyo va dimio-o biyɔɔ, kɔl co kon baalaa tosaa telenndo ho vanaa co Hala diom tueyɔɔ le-a tɛɛn-ndo.

³ Naa kpow, maa nda naa n va kelaa telen pum ni, n va yeemɛi naa n'dial-le a ɲɛ va naa hunɔɔ o lebollo tosaa. Mɛɛ mì kɔl tambɛi Mɛlɛka-o ndóò tol naa coo maa vanaa celen le vanacieeyɛi nɛi paandui ken.

⁴ Kɛ nduyɛ, vana iɲíí bɛndoo Mɛlɛka co ni. Le tùú o kaola naa taw-vo,

⁵ mó mingi naa yoomu naa Krista-a, naa n va nin a vílɛ́iya le tɛɛmbuula naalan-nda. Le kɛndɛi Hala-e niaa sɔla cindaa ni.

⁶ Mí Hala mingi naa yoomu a Yeesu Krista latulu, mó kɛsi naa o fondalan o halataala naa ndaa.

⁷ O kɛndɛi bɛndui o cɔm ken o Yeesu Krista nin-nde nin, ndóò yeema mì ndóò cɔm kɛndɛi ndɔɛi fɛɛn-fɛɛnnde.

⁸ Kani le kɛndɛi Hala-e niaa sɔla cindaa ni, le laalan niaa laalan ndu-o. O co niaa pila o ba le cinda kon fula le, ke Hala-o co kon ni.

⁹ O co le dɛnnda niaa co tosaa lan te, yɔŋii vana lisan.

¹⁰ Kani Hala toosiaa naa ni, o cɔw naa o Krista nin haliko mi n va dɛnnda kɛndɛlan tosaa, dɛnnda kɛndɛla ndóò tuu paandu pá haliko mi n tosa lan-ndan pɛɛn.

Yuifia a vanaa co N'Yuifi le-a a muungu diom pilɛ o Krista nin

¹¹ La yiyan ndɔ mɛɛ niaa va paandu yɛ, la co N'Yuifi le. Yuifia a va niaa veeloo aa kɔndɛa, mí nda pila va veelɔnndo aa falennda le tooma n'falu nda dii-yo.

¹² O telen kon, la va Krista levil, la ve n'pilaciee Israɛlla tɛɛn te, mialla niaa va le kpema Mɛlɛka ndóò yii mí ndóò cua ciɛ́i-yo ni. Niáà nɔ tiindan kɛ́-kɛ̀ le, niáà nɔ vɛlɛ Hala le.

¹³ Kɛ sunsun, o Yeesu Krista nin, niaa vanaa va Mɛlɛka levil o tasendɔ-a, la sɔla sɔɔnguuo ndu o ibuŋ le piɔ́m ndu Krista sɔla-o.

¹⁴ Kani Krista pila co kɔlɲuloo le naa ni, ndu tosa ni mó siinguu Yuifia a vanaa ve N'Yuifi le-a ɲɛ pilɔɔ. A dialun ndɔn, mó tɛɛmbuu kpaki va naa tɛɛn-ndo, yaamɔɔlen pɛɛn.

¹⁵ Mó faŋa tɔŋndo a silala tɔŋndan, mó siinguu naa vanaa kundala tiɔnda haa yungu sɛnɛiyo ndu pilɛ kpé o ndu pila nin. Nuaa o mingi kɔlɲuloo toosiaa ni.

¹⁶ A piɔ́m Krista sɔla kon o yɔm singafilaa coo-o, mó mɔɔsiaa nda kpow kɔɔlen nden pilɛ, mó mingi nda diom pilɔɔ tɛɛn a Hala. O kon, mó tɛɛmbuu nɛyɔnndo.

¹⁷ O hin le niaa vanaa va Mɛlɛka levil-la a vanaa co ndu kpɛɛlun-nda Yoongu kɛndɛ kɔlɲuloo tiiyallo.

¹⁸ Kani a ndu o kɔɔ naa sɔla sɔɔnguuo vellaa-velle Hala Fuɲaa ikɛi o kɔl pilɔɔ nin ni.

¹⁹ Lelan, niaa vanaa co N'Yuifi le-a, la co lɛ n'mial te, la co vɛlɛ vanaa hiavan te, kɛ pilacieaa niaa co nin niaa vanaa diandaa latulu ni, vanaa pilɛa co o Cɛi-Hala-a nin-nda.

²⁰ La siŋnun maa ɲɛm tangulaa cɛi. Cɛi kon yɛ, kiilaa a vanaa-tɛɛngaa-diom Hala-a o kilan coo ni, Yeesu Krista pila co pow lebollo ni.

²¹ Ndu mɔɔsiaa cɛiyo ho nɛɛ pilɛ ni. Ndu co tosaa ni mì tangullo va biilanndo, mò siŋnun Cɛi-Hala diandaa o Mɛlɛka nin.

²² Niaa bɛɛ, la co a tangulaa latulu le siŋnɔnndo fonda calaa, nɛɛ Hala càl o Kɔl-Diandaa ndɔɔ nin-nda.