Vana Kɔlkaloo 6 - BII BILA

¹ «Mí dɔaw vɛlɛ dɛnɛ palaa pum taasi o ceendo ho coo, ó lusul vannda o lebol taw-vo.

² Mì Hala ke vanndo bolofaa, ɲɛ-sɔlaa a bɛɛlen taw. Mò sɔla ɲɛm o yeema-on kpow. Kɛ mì Hala tosa, o di ɲɛm mun tɔnɔ le, mì vana celen de mun. Sanga fondoo fúú co vɛlɛ kon ni, o luei vana mɔnɛi-yo.

³ Mì vana pum velu cuawva kɛmɛ, mò viow yoomu vɔsilan taw-taw, kɛ mɛ̀ɛ́-mɛ̀ɛ́ o palɛi ndɔɛi bandu bɛɛ, te o ve o dɛnɛ kɛndɛ nin te, te sɔla bɛɛ kumbɔɔ kɛndɛ le, tɔnɔ yɛɛ co yɛ o kon nin? I ce maa hɔ́ɔ́ velun o vilɛiyo-o co fisa a vana kon.

⁴ Kani hɔ́ɔ́ kon ndu tosa ɲɛ-ɲɛ le, o ɲumndan nin o hin ni, o ɲumma pilɛma mam nin o kɔɛnnun vɛlɛ ni, vana yiyan bɛɛ a ndu o kɔɔ le.

⁵ Paalen bɛɛ o ci len mò sina len te. Nduyɛ, ndu hiow pɛngio sɔla a vana viow hoo yoomu-o.

⁶ Vanndo tosa bɛɛ yoomu vɔsilan vàálan tan tiɔn, te o sɔla dɛnɛ kɛndɛ le, ceen súú yɛɛ co yɛ kon? Vɛ̀ɛ̀ o co nɛɛ pilɛ le ɲɔɔn kpow n kɔanin te?

⁷ Le yeemɛi ndɔɛi peeloo daama vanacieo tosa baalaa nuaa ni, kɛ o hini kɔl lɔ́ɔ́-lɔ́ɔ̀ le.

⁸ Tɔnɔ yɛɛ vana kɔlkaloo nɔ yɛ hiovɔɔ diɔm sondo vesɛiyo coo? Vana bala fondoo caa bɛɛ kelaa vannda o hɔl, tɔnɔ yɛɛ o sɔla yɛ o ken nin?

⁹ Ɲɛ vana ca a lehɛl-lo co fisa a ɲɛ yeemɛi viam vana yiyanndo coo-o. Kon vɛlɛ bɛɛ, sanga fondoo fúú, ɲɛ fondoo kiltan kɔɔli co kon ni.

Silala kɔlkalulan

¹⁰ Ɲɛ-ɲɛ co hoo o ceendo coo, vannda ndáà sina nin ndu paandu. Vana sina vɛlɛ ɲɛ co vanacieo-vo. O cɛl le sɛɛngianndo nda vana hiow ndu-o le.

¹¹ Vana hiw pɛ sɔɔn dimio, a dimi sɔɔn fondon taw. Yɛɛ vana sɔla yɛ o ken nin?

¹² Ceen vanndacieea co maa levundu. Ɔ́ɔ̀ vana sina ɲɛ kelun le ndu o palɛi bingi o co yoomu-e bɛngu-o? Vana dimulnin ndu ɲɛ koma yɔŋnunnin ndu kɔɔli o paalen bɛngu-o le.»