Vana Kɔlkaloo 3 - BII BILA

Ɲɛ-ɲɛ nɔ telen ndɔ

¹ «Telenndo co le dɛnndan kpow, telenndo co le ɲɛ-ɲɛ co tosanndo o ceendo coo.

² Telenndo co le violɔnndo, telenndo co le vuo. Telenndo co le tɔlɔɔ, telenndo co le ɲɛ tɔlnun-ndo sungɔɔ.

³ Telenndo co le diyɔɔ, telenndo co le singio, telenndo co le puusiaa, telenndo co le tangullo.

⁴ Telenndo co le caŋndo, telenndo co le mamɔɔ, telenndo co le cɛɛŋɔnndo, telenndo co le yolan.

⁵ Telenndo co le powtan viiyo, telenndo co le powtan cɔwviaa. Telenndo co le kɔɔmianndo, telenndo co le sɛyanndo.

⁶ Telenndo co le nuwviaa, telenndo co le malɔɔ, telenndo co le mandaa, telenndo co le viovɔɔ.

⁷ Telenndo co le sɛɛsaa, telenndo co le sɔndɔɔ, telenndo co le meiyo, telenndo co le sɔɛi.

⁸ Telenndo co le kaolaa, telenndo co le nɛyɔnndo, telenndo co le cɔwvo, telenndo co le kɔlɲuloo.

⁹ Tɔnɔ yɛɛ vana baalaa co yɛ niko sɔlaa o sanga bɛndu o co-o nin?

¹⁰ I ce volɔɔ lusulaa bɛndu Hala siilu vanndacieea-o.

¹¹ Dɛnnda Hala co tosaa lan kpow la co tosanndo a telen bɛnda-o. Hala yɔngu vanndacieea kɔllo le ceen hiow-vo a le ceen co hunɔɔ siɔdii laci-o sinaa. Kɛ nda yɛ, dɛnnda o tosa lan, kandɔɔ a siowvo, a tiwba mà bii lan bila le.

¹² I bii bila maa ɲɛ-ɲɛ co fisà le vanacieo maa ɲaaloo dɔwnɔnndo a dɛnɛ kɛndɔɔ tosaa telen o co yoomu-o le.

¹³ Te vanndo va pɛ dioo a kolɔɔ, mò dɔwnun ɲaale o tɔnɔ baala ndɔɔ nin, mɛɛ Hala ke ndu kon ni.

¹⁴ I sinà maa ɲɛ-ɲɛ Hala tosa pɛ, o viow le fɛɛn a fɛɛn. Vana nɔlà ɲɛ handɔɔ lecoo le, vana nɔlà vɛlɛ ɲɛ faŋa lecoo le. O tosa kon, haliko mi vannda yɔŋ siòònde a ndu.

¹⁵ Dɛnnda co sisa lan a la vanin siɔdii laci lan kpow la tosan nin paandu. Hala co dɛnnda hiow nin sindɛ lan miinguuo ni.

Mɛɛlula ɲɔɔn kpow la co piɔ́mndo ni

¹⁶ O ya ce vɛlɛ o ceendo coo-o co hoo ni: nɛɛ dɛnɛ sandaa a dɛnɛ toɲaa ndóò bɛnda le tosanndo-a, lon dɛnnda kɔlvesɛilan la co tosanndo ni.

¹⁷ O kon, mí yiyan o kɔl nuu nin maa Hala kialunin vana sandaa a vana kɔlvesɛiyo iyama. Bau telenndo vanin le dɛnndan kpow, dɛnnda naalan kpede la kialunnin iyama.

¹⁸ Mí yiyan vɛlɛ a vanndacieea o kɔɔ, maa Hala co hunɔɔ nda kɔlɔɔ soli, mí nda pila cennun maa sɔ̀ngɔ́ cɔlua nda co ni.

¹⁹ Kani ɲɛ pilɔɔ koni co vanndacieea a cɔlua cumndo ni. Mɛɛ o pilɔɔ vu yɛ, lende koni o pilɔɔ bɛɛ vu ni. Yoomu pilɔɔ nda kpow nɔ ni. Hiovɔɔ vanacieo hiow cɔloo-o co ɲɛ-ɲɛ le. Kon kpow, ɲɛ fondoo o co ni.

²⁰ Nda kpow co kɔlan o fonda pilɔɔ. O puuloo nin nda fula ni, o puuloo nin nda co vɛlɛ muungu ni.

²¹ Nɛ̀ɛ́ sina yɛ te coocoo kɔl vanacieo hel ni, mì kɔl visia ndu mɔɲamɔɲa o puuloo bɛngu?

²² Mí ca maa dɛnɛ kɛndɛ celen co le vanacieo le, fɔ ɲaaloo dɔwnɔnndo o baalala ndɔlan nin. Ó co le ndu-o co kon ni. Kani nɛ̀ɛ́-nɛ̀ mingi yɛnin ndu yoomu mò hun cɔ ɲɛ tosannin ndu kɔɔli-o?»