Vana Kɔlkaloo 12 - BII BILA

¹ «Tuma n co vɔ felengi-o, loonun a Vana cɔw nɔm-ndo. Loonun a ndu lɔ́ɔ́ pá palɛi vɔɔnde toal nɔm coo, ma dimi aa: ‹Yoomoo fula ya iyeema›,

² tuma pá mì ɲɛ-tengaa siŋnunnin ɲumndan, mì paangei a loeon ɲum, mì piɔɔ vengu, mì yumbuyumboo cuungian vɛlɛ.

³ Paale len, vanaa co cɛiyo kandaa-a ɲiiyannin a siòònde, mí vanaa nɔ kpaayaa-a tundun. Vanaa vanin kpeyanndo cuvo-a malnin, kani a venin a bɔɔ le. Vanlaandua tofa o diola pɔmbɔlan-nda vanin o ɲumndan nin.

⁴ O kon, a kindanin dio co a ba nɛi kobio-o, mí sunndan la mei kpili. Yowva pɛngin caŋndo, mì diomnda n'condulan la mei kpili.

⁵ Siòònde biinin vannda le helɔɔ o fondala yesalan coo, mà buulan le balɔɔ o nɛilan coo. Yiinde muungunin nda o lebol ihumbu mɛɛ yɔmndo yandu peengela humbulan nuaa yɛ. Diallon lusulnin vannda mɛɛ sóónɔɔ lusulun mò del nuaa yɛ. Mɛɛ kullon deli o yɔmndo nuaa yɛ, lende ceendo hiawnin ni. Paale len, vana-vana kɔanin ciee-piɔ́m, calta ndɔla mɛɛlaalan la co lan ni. Vanaa caŋaa vanin pɔɔ hiiliaa o nɛilan coo.

⁶ O kon, yoole toosian a volin humbon-nden le kiolunin, mì taala kólaa n'sianio piɔl, mì kpɛɛnɛi mamɛnnde piɔl, mì yoole nanaa mamɛnnden le kiolu mì ɲɛ kɔandaa mamɛnndo del o soon kólaa nin,

⁷ mì diallon muungu o cundoo nin, nɛɛ n fula-a, mì yoomoo muungu Hala yɔngu ndu-o o ba,

⁸ Vana kɔlkaloo diminin aa: ‹Sanga fondoo fúú! Mbɔ̀ dɛnndan kpow sanga fondoo fúú la co ni.›

Sɔɛi liimɛi

⁹ Mí ca maa vana kɔlkaloo tosà kɔlkaloo le ndu pila daama le. O pɛɛkù vɛlɛ vannda kɔlkalu ndɔɔ, mò dimi talelan taw, mò keela kɔllo lecoo, mò soli lan kɔlɔ.

¹⁰ O dimì sɔɔn kɛndɔn, mò sɛva sɔɔn toɲan ɲɛkɛndɛi.

¹¹ Sɔɔn vanaa kɔlkalua co maa sionnde nɔ ciliŋii siɛɛmbiɛi o bollen le cɔlua kpeŋaa len. Talela nda dimì lan la co maa ciliŋii siɛɛmbiɛi nda baŋ o sionnde len bollen-nde. Kon kpow, Hala ke vana ni. Ndu pilɛ kpé sim vana laci ni.

¹² Po nuu, mandan! Handu ɲɛ-ɲɛ o sɔɔn mun coo le. Balaa sɛvaa lasɛbɔɔ co baala cuu o co le.

¹³ Sɔɔn dimin mun-ndon kpow, liima ndɔɔ co hoo ni: nɔ́ siòòŋii Hala-e, mà kela o tɔŋnda ndɔlan coo. O vanndacieea kpow bɛnda mà tosa-o co kon ni.

¹⁴ Kani Hala co hunɔɔ yamɛi dɛnndan kpow kiolɔɔ. Hali dɛnnda viannanndan o, la va lakɛndɛ, la va lavɔɔn.»