Vana Kɔlkaloo 1 - BII BILA

Dɛnndan kpow, sanga fondoo fúú

¹ Sɔɔn vana kɔlkaloo, po David va masaa Yerusalɛm-ndo dimi-on co mun ni.

² Vana kɔlkaloo dimi aa: «Sanga fondoo fúú! Sanga fondo láà sanga fondo! Dɛnndan kpow, sanga fondoo fúú la co ni.

³ Ɔ́ɔ̀ tɔnɔ vanndacieea nɔ o sanga bɛndu nda co hoo o paalen bɛngu nanu-o nin-ndo?

⁴ Lambio pilɛ hiow pɛ, lambi celen koma fula o fonda ndɔɔ, kɛ ceendo ndu connun o fonda ndɔɔ tuŋ.

⁵ Paalen le sɛ pɛ, paalen le del, le muungu vɛlɛ cɔ́-cɔ́ o fonda le can-ndo.

⁶ Hoeiye co hɔŋndo, i kɔɛ pɛ a ba too, i muungu vɛlɛ hɔŋndo a ba luaŋ-ndo. O kon kɔɔli, i mulin, i muungu a kpengii i va hɔŋndo-e.

⁷ Peelan kpow la co kɔlan delɔɔ o mɛmma ihɛllan coo, kɛ man ma co piɔ lɔ́ɔ́-lɔ́ɔ̀ le. Nduyɛ peelan ndan la hunɔɔ delɔɔ lecoo tuŋ.

⁸ Vana nɔla bɛɛ sondo cua le cɔmndo mɛɛ saangaa fula o kon kpow nin yɛ le. Hɔlten le sángà a cɔu lɔ́ɔ́-lɔ́ɔ̀ le, nilan bɛɛ la sángà a tueyɔɔ le.

⁹ Ɲɛ va paandu-o vanin vɛlɛ, dɛnɛ tosan nin paandu-o tosannin vɛlɛ. Ɲɛ-ɲɛ co ó sɛnɛi o paalen bɛngu le.

¹⁰ Te ɲɛ pum va pɛ, mì vannda dimi aa: ‹La tofa vɔ ɲɛ sɛnɛiyo›, mɛɛ o va nin paandu pá-pá, tuma náà n vilun-ndɔ loo.

¹¹ N co lɛ loonɔn a dɛnnda tosan sindɛ pá-pá lan te. Vanaa co koma hunɔɔ o naa kɔɔli-a, vanaa hunnin o nda kɔɔli-a bɛɛ loonunnin a nda o kɔɔ le.»

Sanga fondoo fúú kɔlkalu vanacieo bɛɛ co ni

¹² «Ya vana kɔlkaloo, i toso masalen Israɛlla coo Yerusalɛm,

¹³ mí kindin le ɲɛ co tosanndo o ceendo coo-o bilaa biyɔɔ a le ndu sinaa a kɔlkalu nuu kpow. Kon vɛlɛ bɛɛ, volɔɔla lusulaalan o co ni, o Hala siilu vanndacieea-o.

¹⁴ Mí ca dɛnnda co tosanndo o ceendo coo nanu lan kpow. Dɛnnda lan kpede, sanga fondoo fúú, ɲɛ fondoo kiltan kɔɔli co kon ni.

¹⁵ Ɲɛ co o tundanndo-o nɔla siɛndinndo le, vana nɔla ɲɛ co loo cɔmndo le.

¹⁶ Mí yiyan o kɔl nuu nin maa i cuungiaa kɔlkaloo, mí manda ndu hiovɔɔ vanaa tosa masalen ya tase Yerusalɛm-nda kpow coo. Mí yiyan maa kɔl nuu sɔla kɔlkaloo a dɛnɛ sinaa taw-taw.

¹⁷ Mí kindin a kɔl nuu kpow le kɔlkaloo, diɔmnde a seemaa sinaa. Kɛ mí bii bila ma kon vɛlɛ bɛɛ, ɲɛ fondoo kiltan kɔɔli o co ni.

¹⁸ Kani mɛɛ vana kɔa a kɔlkaloo sɔlaa taw yɛ, lende koni mɔnɛi kɔa a piɔu vana o kɔl ni. Mɛɛ vana kɔa a dɛnɛ sinaa sɔlaa yɛ, lende koni sangaa kɔa a vana tolɔɔ coo ni.»