Tɔŋ miingua 9 - BII BILA

O co le naŋɔɔ nda le Israɛlla sɔla hɛlio le

¹ «Niaa Israɛlla, la yaŋ nilan! La co hau peo Yurdɛn taŋɔɔ le kɔlan vanaa-mangalaa-isɔɔa hiow niaa kpaayaa a sɛ́lɔ́ɔ́-a tovɔɔ, mì la hɛlu kobila bɛndulan a kobila co lakungaalan a kpakio háá o halataala lan.

² Vanaa kan a nɔ kpaayaa taw, a bandu vɛlɛ taw. O polale Anak len nin nda fula ni, a niaa sina kan-nda pɛɛn. La tuei nin vɛlɛ sɔɛi he aa: ‹Nɛ̀ɛ́ nɔla yɛnin mò simul cuavaa-imamaa Anak-a?›

³ Kɛ la bɛnda mì la sina vɛlɛ hau maa Mɛlɛka Hala niaa co kɔlan niaa laci maa yinnde bɛndu. O tɛɛmbuunin vanaa kan, mò tosa ma ɲaanun niaa, mì la puu lɛŋnde ndalen, mì la cii nda tɛɛmbuu cɔ́-cɔ́ mɛɛ Mɛlɛka yiilu niaa kpemaa yɛ.

⁴ Te Mɛlɛka Hala niaa puu pɛ nda lɛŋnden o ba mò yɔngu niaa len, la dimi le aa: ‹Le tùú naa n co vanaa sandaa-o Mɛlɛka hin a naa le lɛŋnden-nden hiɔlɔɔ ni.› O co le sandii niaa le, kɛ le mɛɛ vanaa-mangalaa-isɔaa kan laasian a yɔŋ vɔɔndo yɛ o co nda tovɔɔ niaa laci ni.

⁵ O co le kela niaa kɛndɛ le, o co vɛlɛ le dɛnɛ niaa sandaa le niaa co lakɔ lɛŋnde len sɔla le. Kɛ a toɲa, le tùú vanaa-mangalaa-isɔaa kan a laasian o yɔŋ vɔɔndo nin-ndo Mɛlɛka Hala niaa hialunin lɛŋnden nda o ba mò yɔngu niaa len ni. Handɔɔ o kon coo, o co niaa len ke le kpema o yiilu fuɲaa niaa mamaa Abraham, Isaak a Yakɔb-o peeloo.

⁶ Lelan, la cɔɔlu sina ɲɛkɛndɛi maa o co le dɛnɛ niaa sandaa le Mɛlɛka Hala niaa co niaa lɛŋnde kɛndɛle len yɔngu le, kani vanaa nila kalua niaa co ni.»

Sɔɛi naw téndé ndáà cɔw a sianion-ndo-e

⁷ «La loonun a sɔɛi he, la pɔɛɛnun ndi le, la loonun maa la tɛɛmbuu Mɛlɛka Hala niaa kɔl taw o lɛŋnde veselɛilen nin. Kabi paale niaa faŋan Esipte len, háá tiiya niaa nanu, la pɛngi diom ndɔɔ sɛɛngiaa le few.

⁸ Kɛ niaa kpow, la loonun a mɛɛ niaa tuulu ndu kɔl o pembei Horɛb yɛ. Lon, mó tuulu kɔl a niaa taw-taw háá mí ndóò yeema bɛɛ le niaa ciiyo diwvo.

⁹ Lɔ́ɔ́ ya hel o pembei coo le powta yɛ́ndɛ́la kpema Mɛlɛka yii a naa-o va o sɛvaa coo lan biyɔɔ-o, mí lo lon háá palɛi belehiɔɔlu a malɔ belehiɔɔlu, i ve ɲɛdiaa dio le, i ve vɛlɛ mamɛn kolɔɔ le.

¹⁰ Mí Mɛlɛka yɔngu ya powta yɛ́ndɛ́la tiɔnndan, la ndu Hala pila sɛva coo a suei ndɔɛi lan. Sɔɔn o soo o yinnden tɛɛn o pembei coo paale niaa va a cuungiannda ndu o hɔl-ten-ndon va n'sɛvaa lecoo kpow.

¹¹ O palɛi belehiɔɔlui ken a o ɲumma belehiɔɔluma man bɛngu, mí Mɛlɛka yɔngu ya powta yɛ́ndɛ́la tiɔnnda kpemalan,

¹² mó dimul-la aa: ‹Cɔn ma keleŋa tolɔɔ cɔ́-cɔ́, kani vanaa n soli o lɛŋnde Esipte nin-nda laasian, vannda ha keleŋa bɔɔ nɛi ya cɔm nda-o malɔɔ! A cownun piɔmndo a ciliŋun nda teengiaa o yin-ndon.›

¹³ Mí Mɛlɛka cɔɔlu vɛlɛ ya dimul aa: ‹I mɛɛndan vannda ha, vanaa nila kalua kposon nda co ni.

¹⁴ Lelan mal-la mì dɔw nda yɛɛvɛ, mì diw nda kpow, mì diola ndalan la ɲum o lɛŋnden coo. Kɛ nɔm, mì soli vanaa-mangalaa-isɔaa hiow vannda ha vaa sɛ́lɔ́ɔ́ a kpaayaa-a nɔm o ipulu.›

¹⁵ O kon, mí mulin, mí toal pembei, yinnden le va vɔ o pembii kalɛi coo. Powta yɛ́ndɛ́la kpemaa va o sɛvaa coo lan la va ya o ba.

¹⁶ Mɛɛ ya tofa niaa, mí sina maa la cua hakio a Mɛlɛka Hala niaa lekɛ́ndɛi. Kani mí la cɔaw naw téndóó a ciliŋun niaa teengiaa-on, mí la keleŋa faŋan cɔ́-cɔ́ o nɛi Mɛlɛka cɔm niaa-o coo.

¹⁷ O kon mí bii powta yɛ́ndɛ́la tiɔnndan, mí viaw lan lɛŋ, mí pesi lan niaa kpow o hɔl.»

Mɛɛ Moise tɛɛlun Mɛlɛka le naw téndé ndáà cɔw a sianion-ndo yɛ

¹⁸ «O kon kɔɔli, mí del vɛlɛ Mɛlɛka o labɛngunin, mí tosa vɛlɛ palɛi belehiɔɔlu a malɔ belehiɔɔlu maa o tasendɔ, i ve ɲɛdiaa dio le, i ve mamɛn kolɔɔ le. Le haki bɛndu niaa tosa kon-ndo yáà tosa lende ni, kani mí la tosa dɛnɛ hɛnan Mɛlɛka loo, mí la tuulu ndu kɔl.

¹⁹ Kani mí siòònde ndíì bii ya taw le kɔl niáà tuulu kon Mɛlɛka, mó yuulo kɔllo a niaa, mí ndóò yeema le niaa ciiyo diwvo-o. O kon vɛlɛ bɛɛ, mí Mɛlɛka cɛl piɛile nilen ɲɛkɛndɛi.

²⁰ Mí ndóò tuulu kɔl taw a Aarɔn háá mí ndóò yeema bɛɛ le ndu diyɔɔ. Kɛ paale len, mí piɛi vɛlɛ ndu le Aarɔn.

²¹ Ɲɛ niáà sooluu mí niáà pilan Hala tana-o yɛ, piɔm niáà cɔw kon a hɔlla maa naw téndé-o, mí cua ndu, mí mal ndu o yin, mí pesipesi ndu, mí cui ndu mululu, mí saŋ ndu o mɛmma pee pɔmbɔ tuusu pembei-yo-on nin.»

Hakila celennda Israɛlla tosa lan a tɛɛlɔn Moise tɛɛlun Mɛlɛka le nda-o

²² «Kandɔɔ Tabeera, Massa kɔ bii Kibrɔt-Hataava bɛɛ mí la tɛɛmbuu Mɛlɛka kɔllo.

²³ Mɛɛ Mɛlɛka ndóò yeema le niaa faŋaa Kadɛs-Barnea, mó dimul niaa aa: ‹La kɔ! La kɔ hiɔlu lɛŋnde ya ke niaa len.› Kɛ mí la kɛɛ Mɛlɛka Hala niaa diom, la laalan ndu le, la yeŋ nilan o sɔɛi ndɔɛi le.

²⁴ Kabi ya sina niaa, vanaa nila kalua niaa yɔŋnun a Mɛlɛka ni.

²⁵ Le hee ya del Mɛlɛka o labɛngunin ni, mí tosa palɛi belehiɔɔlu a malɔ belehiɔɔlu, kani o va sɔɛi le niaa diwvo kpow.

²⁶ Mí tɛɛlun Mɛlɛka, mí dimi aa: ‹A yandi, Maalii, Mɛlɛka, tɛɛmbuu vanaa nɔmnda le, kɛ́ nɔmndo pɛɛn, a n baŋa a masale nɔmnden má soli nda o lɛŋnde Esipte nin a ba nɔm kpaayaa-a.

²⁷ Loonun a vanaa nɔmaa baalaa: Abraham, Isaak a Yakɔb. Tofa nila kalula vannda ha le, tofa kɔlvesɛi ndaa a haki ndaa le,

²⁸ yɔŋii vanaa co o lɛŋnde naa n faŋan nin-nden nin-nda dimi aa: Mɛlɛka ndóò nɔla nda lueiyo o lɛŋnde o yiilu nda kpemaa len nin te. Nɛyɔn ndaa ndóò nɔ ni, lelan o faŋa nda nanu le kɔlan nda diwvo o lɛŋnde veselɛilen nin ni.

²⁹ Nduyɛ, vanaa nɔmnda vannda ha co ni, kɛ nɔmndo pɛɛn, a n soli Esipte a ba nɔm kpaaya bɛndoo-a.›»